سالانه نێزیكێ 500 بارێن دارا د رووباری دا دهێنه ڤه‌گرتن
شێلادزێ، نه‌وزاد هلۆری:
هه‌ر چه‌نده بلندبوونا ئاستێ ئاڤا رووباران مه‌ترسی ل سه‌ر ژیانا وه‌لاتیان دروستكریه، به‌لێ ل گه‌ل ڤێ یه‌كێ ژی هه‌ر سال ل ڤی ده‌می ل گه‌ل بلندبوونا ئاستێ ئاڤا رووباری هژماره‌كا زۆر یا وه‌لاتیان ل ده‌ڤه‌را شێلادزێ بۆ كومكرنا دارا قه‌ستا هه‌ردوو رووبارێن زێ و ئاڤا شین دكه‌ن. وه‌لاتیه‌كی ژی گۆت: سالانه ب تنێ ل سه‌ر رووبارێ ئاڤا شین نێزیكێ 500 تراكتور و پیكئابێن دارا دهێنه كومكرن.
نازك سیته‌یی، وه‌لاتیه‌كێ گوندێ سیته یا سه‌ر ب ناحیا شێلازێ یه بۆ رۆژناما ئه‌ڤرۆ گۆت: (هه‌ر سال ل ده‌ستپێكا هه‌یڤا ئادارێ هه‌تا ناڤه‌راستیا هه‌یڤا نیسانێ ل گه‌ل بلندبوونا ئاستێ ئاڤا رووبارێن زێ مه‌زن و ئاڤا شین هژماره‌كا زۆر یا وه‌لاتیان ژی قه‌ستا سه‌ر رووباری دكه‌ن بۆ كومكرنا دارا، هه‌ر چه‌نده ڤێ یه‌كێ مه‌ترسی بۆ سه‌ر ژیانا وان هه‌یه، به‌لێ ل گه‌ل هندێ ژی بلندبوونا ئاستێ ئاڤێ خێر و به‌ركه‌ت ژی هه‌یه و دارا و چه‌ندین كه‌لوپه‌لێن دی یێن وه‌كو به‌رمیل و رۆن و قه‌نینه‌یێن غازێ و توڤچا و چه‌ندین كه‌لوپه‌لێن ل گه‌ل خوه دئینن و خه‌لك بخوه ڤه‌دگرن).
زێده‌تر گۆت: (داخوازێ ل خه‌لكی دكه‌ین كو ب هشیارانه بچن بۆ كومكرنا دارا، دا كو گیانێ وان سلامه‌ت بیت، دیسان داخوازێ ل ئالیێن شوله‌ژێ دكه‌ین ئاگه‌هداری خه‌لكی بن ده‌مێ بۆ كومكرنا دارا دچن، ئه‌گه‌ر نه‌فت د ده‌ما خوه دا بهێت و سۆته‌مه‌نی بۆ وه‌لاتیان بهێته دابینكرن ئه‌ز باوه‌رم كه‌س قه‌ستا سه‌ر رووباری و كومكرنا دارا ناكه‌ت).
دلشاد نه‌سرولا، ئه‌و ژی وه‌لاتیه‌كێ شێلادزێ و ل سه‌ر رووباری مژوولێ ڤه‌گرتنا داران بوو، بۆ ئه‌ڤرۆ گۆت: (سالانه ل ڤی ده‌می ئه‌م ل گه‌ل بلندبوونا ئاستێ ئاڤێ قه‌ستا سه‌ر رووباری ده‌ین بۆ كومكرنا دارا، سوپاس بۆ خودێ ئه‌ڤ ساله ژی رووبار بلندبوویه و دار ل گه‌ل دهێن، هه‌ر چه‌نده وه‌كو پێدڤی باران نه‌هاتنه رووبار بلند نه‌بوویه، به‌لێ دهێته پێشبینیكرن رۆژانێن بهێت ئاستێ ئاڤێ بلند بیت، ژ به‌ر كو ئه‌ڤ رووباره ل توركیا دهێن و وێرێ باران زۆر دبارن).
زێده‌تر گۆت: (سالانه ب تنێ ل سه‌ر رووبارێ ئاڤا شین نێزیكێ 300 تراكتور و پیكئابێن دارا دهێنه كومكرن، ژبلی ئه‌و وه‌لاتیێن ل سیریێ و شێلادزێ و گونده‌وارێن دی یێن ده‌ڤه‌رێ قه‌ستا رووباری دكه‌ن بۆ كومكرنا دارا، هیڤیه وه‌لاتی زۆر ب هشیاری دارا كوم بكه‌ن، ژ به‌ر كو رووبار بلندبویه و زۆر ژی ساره، هه‌ر كه‌سێ بكه‌ڤیته د رووباری دا زۆر ب زه‌حمه‌ت بشێت رزگار بیت خوه ئه‌گه‌ر چه‌ندێ مه‌له‌ڤان ژی بیت).
ب گوره‌ی پێزانینان وه‌لاتیێن سیریێ و شێلادزێ و گونده‌وارێن سه‌ر رووباری یێن ده‌ڤه‌را بارزان و بلێ و گوندێ هه‌ردان و پرێسه و چه‌ندین گوندێن دی دارا كوم دكه‌ن كو هژمارا وان دگه‌هیته پتری 500 تراكتور و پیكئابێن دارا، ئه‌ڤه ژبلی وان گوندێن ب درێژاهیا رووباران هه‌تا ناحیا كه‌له‌ك ڤه‌گرن.
