سالانه پتری شه‌ش هزار و 400 نه‌خوشێن ده‌روونی سه‌ره‌دانا نه‌خوشخانا ئازادی دكه‌ن
دهۆك، نه‌وزاد هلۆری:
ب هه‌لكه‌فتا رۆژا جیهانیا ساخله‌میا ده‌روونی، هژماره‌كا چالاكیێن جودا ل سنورێ پارێزگه‌ها دهۆكێ هاتنه ئه‌نجام دان، نوژداره‌كا ده‌روونی ژی دده‌ت دیاركرن كو سالانه پتری شه‌ش هزار و 400 نه‌خوشان سه‌ه‌ردانا نه‌خوشخانا ئازادی دكه‌ن و پرانیا وان ژ دهێنه چاره‌سه‌ركرن.
د. وارژین یاسین، تایبه‌تمه‌ندا نه‌خوشیێن ده‌روونی بۆ ئه‌ڤرۆ گۆت: (نه‌خوشیێن ده‌روونی ئێكه ژ وان نه‌خوشیێن به‌ربه‌لاڤ ل هه‌موو جیهانێ و كوردستان ژی ئێكه ژ وان وه‌لاتێن كو ئه‌ڤ نه‌خوشیه ژ به‌ر چه‌ندین ئه‌گه‌رێن جودا هه‌یه، دده‌ما 10 سالێن بوری دا نێزیكێ 46 هزار و 420 كه‌سان سه‌ره‌دنا پشكا ده‌روونی ل نه‌خوشخانا ئازادی كریه و 15 هزار و 852 كه‌سان سه‌ره‌دانا سه‌نته‌رێ ساخله‌میا ده‌روونی یا زارۆ و سنێله‌یان كریه و هزار و 470 كه‌سان ژی سه‌ره‌دانا سه‌نته‌رێ پشته‌ڤانیا كچ و ژنان ل پارێزگه‌ها دهۆكێ كریه، كۆما گشتی دبیته 64 هزار و 12 كه‌سان، ئه‌ڤه ژبلی وان نه‌خوشێن سه‌ره‌دانا سه‌نته‌ر و كلینیكێن تایبه‌ت دكه‌ن كو هژمارا وان 54 سه‌نته‌رن، كو ئه‌ڤ یه‌ك ژی رێژه‌ییه‌كا زووره زێده‌تر گۆت: (ل نه‌خوشخانه و سه‌نته‌ر و كلینیك و جهێن تایبه‌ت ب نه‌خوشیێن ده‌روونی ڤه ل سنورێ پارێزگه‌ها دهۆكێ خزمه‌ته‌كا هه‌ری باش بۆ نه‌خوشێن ده‌روونی دهێته‌كرن، ئه‌و نه‌خوشێن ده‌روونی یێن سه‌ره‌دانا ڤان جهان دكه‌ن پێكدهێن ژ 30% زارو و 40% ل ئافره‌تان و 30 ژی زه‌لام، پترانیا وان ژی نه‌خوشیێن وه‌كو دودلی و خه‌مۆكی و ئیدمان ب بكارئینانا مادێن بێهوشكه‌ر و چه‌ندین نه‌خوشیێن دی، هه‌ر چه‌نده چو ئامار ل به‌رده‌ست نینن كا چه‌ند مفا ژ ڤان جها دهێته وه‌رگرتن، به‌لێ ب گشتی پرانیا وان هاتینه چاره‌سه‌ركرن، ژبه‌ركو پرانیا نه‌خوشان مراجعا ناكه‌ن، ل سنورێ پارێزگه‌ها دهۆكێ پتر ژ وێ رێژا هاتیه دیاركرن هه‌یه، به‌لێ نه‌بوونا هوشیاریا جڤاكی و ره‌وشه‌نبیری و چه‌ندین ئه‌گه‌رێن دی نه‌خۆش زوو ب زوو قه‌ستا وان جهان ناكه‌ت.
ژلایه‌كێ دنڤه د.عدنان ئه‌سعه‌د بۆ ئه‌ڤرۆ گۆت: (هه‌ر چه‌نده ل سنورێ پارێزگه‌ها دهۆكێ سازی و جهێن تایبه‌ت ب چاره‌سه‌ركرنا نه‌خوشیێن ده‌روونی هه‌نه، به‌لێ دكێمن و ئه‌م پێدڤی ب زێده‌تر یا كه‌لوپه‌ل و ستافێ نوژدار و كارمه‌ندایه، چه‌ندین جاران مه داخوازكرینه، به‌لێ هێشتا وه‌كو پێدڤی داخوازیێن مه نه‌هاتینه بجهئینان و دێ ل سه‌ر هه‌ول و بزاڤێن خوه به‌رده‌وام بین ژبه‌ركو نه‌خوشیێن ده‌روونی ژی وه‌كو هه‌ر نه‌خوشییه‌كا دی هه‌یه و ئه‌و كه‌سێن تووش دبن پێدڤی ب چاره‌سه‌ركرنێ نه.
