سالانە زێدەتر ژ ٨٠٠٠ نەخۆشان دچنە دەرڤەی وەلاتی
ئەڤرۆ نیۆز، ئەمیر ئەترووشی:
ل دووڤ داتا و ئامارێن کۆمپانیێن پزیشکی ئەوێن نەخۆشان دبەنە دەرڤەی وەلاتی بۆ چارەسەریێ، ل ھەرێما کوردستانێ ژ ئەگەرێ لاوازیا کەرتێ ساخلەمیێ و نەبوونا چارەسەریا ھندەک نەخۆشیان، سالانە زێدەتر ژ ٨٠٠٠ نەخۆشان ژ ھەرێما کوردستانێ قەستا نەخۆشخانێن دەرڤەی وەلاتی دکەن بۆ چارەسەریێ.
د. خالس قادر، پەیڤدارێ وەزارەتا ساخلەمیا ھەرێما کوردستانێ بۆ ئەڤرۆ نیۆز دیارکر سالانە ل ھەرێما کوردستانێ ھژمارەکا زۆر یا نەخۆشان دچنە دەرڤەی وەلاتی بۆ چارەسەریێ، لێ ئەو ھەموو نەخۆش ل دەڤ مە ناھێنە تۆمارکرن و ب تنێ ھژمارا وان نەخۆشان ل دەڤ مە ھەیە ئەوێن ب رێیا مە دچنە دەرڤەی وەلاتی بۆ چارەسەریێ کو د سالا بۆری دا نێزیکی ٤٠٠ نەخۆشان بووینە و گۆت: پتریا وان ژی ئەون یێن نەخۆشیێن گران و دومدرێژ و پەنجەشێر ھەین و چارەسەریا وان ل کوردستانێ نینە.
ئاشکرا ژی کر کو کۆمپانیێن پزیشکی ریکلامەکا مەزن بۆ نەخۆشخانێن دەرڤەی وەلاتی دکەن و نەخۆشخانێن کوردستانێ ل پێش چاڤێن خەلکی لاواز دکەن و گۆت: وەزارەتا ساخلەمیا ھەرێما کوردستانێ مۆلەت دایە شەش کۆمپانیان نەخۆشان ببەنە دەرڤەی وەلاتی بۆ چارەسەریێ و گەلەک خەلک ژی ھەیە ب ترۆمبێلێن خوە یان ژی بێ کۆمپانی بۆ چارەسەریێ دچنە دەرڤەی وەلاتی و ب تایبەت ژی بۆ وەلاتێ تورکیا و ئیرانێ.
د. خالس قادر ئاماژی ب ھندێ ژی ددەت کو ھەر نەخۆشەکێ بۆ چارەسەریێ دچیتە دەرڤەی وەلاتی زێدەباری خەرجیێن ھاتن و چوونێ، پارەیەکێ ئێکجار مەزن ل وان وەلاتان د مەزێخیت ھەتا چارەسەریا خوە دکەت.
