سالانە 300 بنەدارێن هنارا ئەرمشتێ ژ ناڤ دچن
زاخۆ، دلۆڤان هالۆ:
نێزیكی ١٢٠ بیستانێن هناران ل گۆندێ ئەرمشتێ هەنە و سالانە داخوازیەكا زێدە ل سەر بەرهەمێ وان هەیە، لێ د نوكە دا ژبەر كێمیا ئاڤێ مەترسی كەڤتییە سەر ژ ناڤچوونا هنارا گۆندێ ئەرمشتێ ل زاخۆ، ب تایبەت د پێنج سالێن دەربازبوویی دا بەرهەمێ هنارێ ل ڤی گۆندی كێم بوویە.
خەلیل یۆسف، ئێك ژ جۆتیارێن كەڤن یێ گۆندێ ئەرمشتێ بۆ ڕۆژناما ئەڤرۆ دیار كر، ژ سەرجەمێ 11 دۆنەمێن بیستانێن هناران یێن گۆندێ ئەرمشتێ تا نوكە 3 دۆنەم ژبەر كێمیا ئاڤێ هشك بووینە، ئەڤە سالا پێنجێ یە گۆندێ ئەرمشتێ بێ ئاڤ و هنارا وێ گەلەك یا لاواز بوویی، هندی سالا وێڤەترە بەرهەمێ وان لاوازترە، سالانە نێزیكی 300 هەتا 400 بنەدارێن هناران ژ ناڤ دچن.
ناڤهاتی ئاماژە ب وێ چەندێ ژی كر، ب مەرەما زێدەكرنا ئاڤێ ل گۆندێ ئەرمشتێ هەتا نوكە چار بیرتەوازی لێ هاتینە كولان، لێ ژ سەرجەمێ هەر چاران ب تنێ ئێك بیرتەوازی سەركەڤتی بوویە و ئەڤ چەندە ژی تێرا وێ چەندێ ناكەت كو بیستانێن هناران یێن ل گۆندێ ئەرمشتێ تێر ئاڤ ببن.
ئەدیب جەعفەر، ڕێڤەبەرێ ناحیا ڕزگاری گۆت:» حكۆمەتا هەرێما كوردستانێ كابینا نەهێ پشتەڤانیا جۆتیاران و كەرتێ چاندنێ كرییە، و مە ژی هەمی پێكول و بزاڤ یێن كرین ب ڕێكا ئیدارەیا سەربخوە یا زاخۆ كو پڕۆژەیەك ل گۆندێ ئەرمشتێ ب نیڤەڕوو مایە كو بهێتە دروست كرن دا كو هێلەكا ئاڤێ ژ خابیری بهێته كێشان و ئاریشەیا ئاڤدانا داروبارێن جۆتیارێن گۆندێ ئەرمشتێ بهێتە چارەسەركرن».
