سالا بهێت فیستەڤالا زاخۆ یا شەل و شەپك و جلکین کوردی دێ ڕەهەندەکێ ناڤدەلەتی وەرگریت
زاخۆ، دلۆڤان هالۆ:
دلخاز مووسا، رێڤەبەرێ ڕەوشەنبیری و هونەری ل زاخۆ بۆ ڕۆژناما ئەڤرۆ دیارکر کو ئیدارا سەربەخۆ یا زاخۆ ب هەڤکاری لگەل ڕێڤەبەریا ڕەوشەنبیری و هونەری یا زاخۆ سالانە کریە پلان کو هەر دوو چالاکیێن سەرەکی فیستەڤالا زاخۆ یا شەلوشەپك و جلوبەرگێن کوردی و ئاهەنگا سەرێ سالێ ب باشترین شێوە بهێنە ئەنجامدان.
رێڤەبەرێ ڕەوشەنبیری و هونەری ل زاخۆ ئاماژە ب وێ چەندێ ژی کر کو ئارمانجا مە ئەوە کو ئەم ئیدارا سەربەخۆ یا زاخۆ بکەینە بنگەهێ سەرەکی یێ پیشەسازی و نیشاندانا شەلوشەپك و جلوبەرگێن کوردی، و سال بۆ سالێ جیاواز تر و باشتر فیستەڤال بهێتە ئەنجامدان و ڕەهەندێن ناڤدەولەتی وەرگریت و گرۆپێن نێڤدەولەتی پشکداریێ تێدا بکەن.
گۆت ژی:»چەندین بزاڤ هاتینەکرن بۆ دەستنیشانکرنا ڕۆژا باژێڕێ زاخۆ ژی، لەوڕا بۆ ڤێ مەرەمێ ل سالا 2023 کۆمبوونەكا بەرفرەهـ لگەل هەموو سازیێن زاخۆ و سەنتەر ڕێکخراوان و کەسایەتیێن دیار یێن زاخۆ هاتیەکرن و چەندین پێشنار هاتنە کرن وەکو ڕۆژا قەزا بوونا زاخۆ ببیتە ڕۆژا باژێڕی، هندەكان پێشنیار دکر کو ڕۆژا ئیدارەبوونا سەربەخۆ یا زاخۆ ببیتە ڕۆژا باژێڕی، و چەندین پێشنیارێن دی، لێ ژ بەرکو گەلەك پێشنیاربوون، لەورا بۆ مە یا ب زەحمەت بوو کا دێ کیژ ڕۆژێ هەلبژێرین، ژ بەر ڤێ چەندێ ئەم نە گەهشتینە چو ڕێکەفتنان».
