سالا بۆری ئیرانێ نێزیکی هزار کەسان ل سێدارێ داینە
رێکخستنا مافێن مرۆڤی یا ئیران راگەهاند، ژ سالا ٢٠١٥ هەتا نها رەێژەیا سێدارەدانێ ل ئیرانێ سال بۆ سالێ زێدەتر لێ دهێت و سالا بۆری ئیرانێ نێزیکی هزار کەسان ل سێداریداینە و چاڤدێرەکێ سیاسی یێ کورد ژی دیار دکەت هەری زێدە سزایێ سێدارەدانێ ل سەر کوردان هاتیە سەپاندن.
رێکخستنا مافێن مرۆڤی یا ئیرانێ راگەهاند، رێژەیا سێدارەدانێ ل ئیرانێ سال بۆ سالێ زێدەتر لێ دهێت و سالا بۆری ل ئیرانێ نێزیکی هزار کەسان هاتینە سێدارەدان و سزایێ سێدارەدانێ ژی ل سەر ب سەدان کەسان هاتیە سەپاندن و ئەو یەک ژی مەترسیەکا گەلەک مەزنە و مخابن رێکخستنێن مافێن مرۆڤی و وەلاتێن ئێکەتیا ئۆرۆپا و ئەو سازیێن رۆژانە بەحسێ مافێن مرۆڤی دکەن ژی ژ بەر بەرژەوەندیێن خوە یێن ل گەل دەستهەلاتا ئیرانێ ل هەمبەر رێژەیا سێدارەدانێ بێدەنگن.
هەمان رێکخستنێ ئەو یەک ژی دیار کریە، پشتی خوەنیشادانێن سالا بۆری ل ئیرانێ رێژەیەکا ئێکجار زۆر چالاکڤان هاتینە دەستەسەر کرن و سزایێ سێدارەدانێ ل سەر گەلەک ژ وان هاتیە سەپاندن و مەترسیا ڤێ یەکێ یا هەی ئەڤسالە ژی ئیران گەلەک ژ وان کەسان ل سێدارێ بدەت.
ل ئالیێ دی رێکخستنا مافێن مرۆڤی یا رۆژهەلاتێ کوردستانێ ژی راگەهاند، پشتی ئیبراهیم رەئیسی وەکو سەرۆک کۆمارێ ئیرانێ دەست ب کارێ خوە کری، رێژەیا سێدارەدانێ ژی ل ئیرانی گەلەک زێدە بوویە، ئەو یەک ژی نیشا ددەت رێز ل مافێن مرۆڤی ناهێتە گرتن و گەلەک کەس نەشیاینە بەرەڤانیێ ل خوە بکەن و پارێزەر بۆ وان نەهاتینە گرتن یان ژی رێ نەهاتیە دان ژ مافێن خوە یێن دەستپێکی ژی مفادار بن، رەوشا نها یا زیندانێن ئیرانێ گەلەک خرابە و ب هزاران گرتیێن کورد نها ل زیندانێن ئیرانێ دانە و رەوشا وان ژی گەلەک خرابە.
ل ئالیێ دی حەمید داوودی چاڤدێرێ سیاسی یێ رۆژهەلاتێ کوردستانێ ژی راگەهاند، ل گۆر ئامارێن ژ ئالیێ رێکخستنا مافێن مرۆڤی یا ئیرانێ و رۆژهەلاتێ کوردستانێ هاتینە بەلاڤکرن، دیار دبیت هەری زێدە کورد ل ئیرانێ هاتینە دەستەسەر کرن هەروەسا سزایێ سێدارەدانێ ژی هەری زێدە ل سەر کوردان هاتیە سەپاندن و گۆت: (رێکخستنا مافێن مرۆڤی یا ئیرانێ دبێژیت هزار کەس سالا بۆری هاتینە سێدارەدان، لێ ل گۆر ئامارێن هندەک ژ سازیان رێژە ژ هزار کەسان ژی بۆریە و مخابن هەری زێدە ژی کورد هاتینە سێدارەدان).
ئەو یەک د دەمەکێ دایە کو بەری نها ب سەدان مالباتێن کورد ل ئیرانێ و رۆژهەلاتێ کوردستانێ داخواز ژ سکرتێرێ گشتی یێ نەتەوەیێن ئێکگرتی کربوون کو فشارێن خوە ل سەر دەستهەلاتا ئیرانێ زێدەتر لێ بکەن دا ئیران سزایێ سێدارەدانا لاوێن وان هلوەشینیت، چونکی مەترسیا سێدارەدانا ب سەدان کەسان ل ئیرانێ یا هەی.
