سالا 2016 نه‌یا سه‌خت و دژوار بوو
ب گشتى هه‌كه په‌یوه‌ندیا خودێ هه‌ر د ئه‌زه‌ل دا ب ئافراندنا ده‌مى و جهیڤه (الزمان و المكان) هه‌بیت، پشتى هینگێ په‌یوه‌ندیا مرۆڤان ئێكسه‌ر ب دانانا سالان و رۆژێن بیره‌وه‌ریان ڤه هه‌یه. ئانكو هه‌ر ژ چه‌رخێن كه‌ڤنار وه‌ره هه‌تا نۆكه، هه‌ر مرۆڤن بووینه سه‌ده‌مێ سه‌ره‌كی ل دووڤ حه‌ز و به‌رژه‌وه‌ندیێن خوه سالان خوه‌ش كن و نه‌خوه‌ش كن، رڤشتێن بشتى وان ل دووڤ هه‌مان به‌رژه‌وه‌ندیێن زكماكى و ژ ژینگه‌هێ وه‌رگرتین وان رۆژان و سالان بكه‌نه بیره‌وه‌ریێن پیرۆز و نه پیرۆز و هه‌چیێ لدووڤ نه‌چت ب ڤاڕێ و نه‌ژیێ وێ نه‌توه‌یێ بهێت ل قه‌له‌مدان.
ل په‌ى ڤێ نێڕینێ، د گه‌وهه‌رێ خوه دا سالا 2016 نه‌یا سه‌خت و دژوار بوو، وه‌ك دیرۆكا وه‌خته‌ك دیار كرى، به‌رى بهتر ژ دو هزار سالان هه‌ر هنده‌ك مرۆڤان ده‌یناى، لدووڤ وێ سته‌ما ل هه‌زره‌تێ مه‌سیح هاتیه كرن. سالا بۆهرى ژى دبت هه‌ر مرۆڤان ل دووڤ حه‌زێن خوه و ئارمانجێن دیار و نه‌دیار، مینا گه‌له‌ك سالان سه‌خت و دژوار كر و ب سالا قه‌یرانان هاته نیاسین، وه‌لێ كر هه‌تا كو خه‌لكه‌ك ل هه‌رێما كوردستانێ نفرینان ل ڤێ سالێ ببارینت و بێژت: باش بوو سالا 2016 ب قه‌داو به‌لاڤه قه‌شیا.
كه‌واته هه‌كه خه‌لكى ل هه‌رێما كوردستانێ سالا 2016 ب ساله‌ك نه‌خوه‌ش و تژى قه‌یران دیتبت، ئه‌مریكا، فنله‌ندا، ئوسترالیا، ژاپۆنێ و پرانیا وه‌لاتین دن یێن جیهانى ب ساله‌ك نۆرمال و دبت پێشكه‌ڤتى دیت؛ ژ به‌ر كو گه‌لێن وان وه‌لاتان گه‌لێن هوشیار و خودان ئیراده‌نه، خودان قانوون و ده‌ستوور و سازیێن مه‌ده‌نینه، مفا ژ سه‌ر بۆهرێن خوه یێن دیرۆكى وه‌رگرتیه، وه‌ناكه‌ن ده‌ستهه‌لاتدارێن ده‌وله‌تێ مافێن وان بخۆن و پێشێل بكه‌ن، دووماهیێ ئه‌و گه‌لێن هوشیار حزبێن خوه ب ده‌ستهه‌لاتڤه نه‌چار دكه‌ن كو د خزمه‌تا گه‌ل دا نه یا كه‌سان دا كار بكن، لێ خه‌لكێ مه ژ نه هشیار و لاوازیا ئیراده‌یا هه‌یى وه‌ل حزبێن هه‌رێمێ كریه كو حزب ل سه‌ر حسابا خه‌لكى تنێ د به‌رژه‌وه‌ندیا خوه دابن و ل دووڤ وژدانا خوه سه‌ره‌ده‌ریێ د گه‌ل خه‌لكى بكن.
گۆره‌ى ڤێ ژیوارێ هه‌یى، هه‌كه ده‌ستهه‌لاتێ ئه‌و رێژه‌یا مووچه‌یێ كێم و ئه‌و ساتێن كاره‌ب ژى ل سالا 2016 نه دابانه خه‌لكى هه‌رێمێ، مه‌زنترین نه‌رازى بوون، دیسا خه‌لك دا بۆ خوه گازنده‌یان كه‌ت و ئه‌و هشیارى و ئیراده نه‌بوو كو ب ریكێن قانوونى و مه‌ده‌نى پسیارا مافێن خوه بكن.
راسته سالا 2016 ژى چو، لێ ئه‌و ده‌ستهه‌لاتدارێن بووینه ئه‌گه‌رێن قه‌یرانێن هه‌رێمێ هه‌ر ماینه و ب هه‌مان ئه‌قلیه‌تا به‌رییا چل پێنجى سالان حوكمى ل هه‌مان مرۆڤان دكه‌ن. كه‌واته، هندى ئه‌ڤ خه‌لكه ب سه‌ردارێن خوه‌ڤه خوه نه‌گوهۆڕن بۆ ئاڤا كرنا وه‌لاتى د خزمه‌تا گشتى دا، سالا 2017 و سالێن د دووڤ دا د هێن، دێ ژ سالێن به‌رێ كامباختر بن.
ئه‌وا مایى من نه گۆتى. راسته ئه‌و كه‌سانێن خودانێن ڤێ ئه‌قلیه‌تێ و بووینه رابه‌رین حزبێن كوردستانى، ژ ئه‌فریقیا و ئه‌مریكا نه‌هاتینه حوكمه ل مه بكن، هه‌لبه‌ت وه‌ك دیار هه‌ر ژ مه‌نه و دبت كیژ مه ژى ل شوونا وان بت وه‌ك وان ره‌فتارێ بكه‌ت، هندى كو جه‌ماوه‌ر هشیار نه‌بت و نه‌بته خودان ئیراده و بڕیار و قوربانیان همبه‌ر بده‌ستڤه‌هینانا مافێن خوه نه‌ده‌ت.
