سالح كه‌كو: قاره‌مانیا عه‌ره‌بی قۆرجا هێزێ دا وه‌رزشا كیك بۆكسینگا پارێزگه‌هێ
ئه‌ڤرۆ،
د داخویانیه‌كێدا راهێنه‌رێ یانا دهۆكێ و هه‌لبژارتیێ ئیراقێ بۆ یاریا كیك بۆكسینگێ دیاركر كو قاره‌مانیا ئه‌ره‌بی ئه‌وا دوهی هه‌ڤڕكیێن وێ ل زانكویا دهۆك ب دوماهی هاتی قۆرجا هێز و گه‌شبینیێ دا ئه‌ڤێ وه‌رزشێ ل پارێزگه‌ها دهۆكێ ب تایبه‌تی و كوردستان و ئیراقێ ب گشتی و ئێك ژ مه‌زنترین خرڤه‌بوون و قاره‌مانیه ل سه‌ر ئاستێ عه‌ره‌بی دهۆك مێڤانداریا وێ دكه‌ت.
زێده‌تر سالح كه‌كو بۆ رۆژناما ئه‌ڤرۆ گوت: پێخووشحالین پارێزگه‌ها دهۆكێ شیا ب سه‌ركه‌فتیانه ئێك ژ گرنترین و مه‌زنترین قاره‌مانی ل سه‌ر ئاستێ رۆژهه‌لاتا ناڤین مێڤان بكه‌ت كو قاره‌مانیا عه‌ره‌بی بوو ب پشكداریا 11 وه‌لاتێن عه‌ره‌بی و زێده‌تر 160 یاریزانێن كور و كچ بۆ سیسته‌مێن، فۆل كونتاك، سیمی كۆنتاك وk1 ل زانكویا دهۆك دهاتنه ئه‌نجامدان ژ هه‌رێما كوردستانێ سێ یانه ب ناڤێ پارێزگه‌هێن خوه پشكداربووینه و ئه‌نجامێن باش هه‌بووینه، سه‌رباری مێڤانداریا سه‌ركه‌فتی یاریزانێن مه ل سه‌ر ئاستێ هه‌لبژارتیان و یانا شیاینه رێزێن پێشیێ ب ده‌ستڤه بینن، ئه‌وێن بۆ هه‌لبژارتیێ ئیراقێ كرین ژوانا عه‌لی عزه‌ت رێزا سێیێ بۆ كێشا 75كگم ب ده‌ستخوه‌ڤه‌ئینا، به‌نگین ئه‌حمه‌د بۆ رێزا سێیێ سیسته‌مێ فۆل كۆنتاك، زانا سالح رێزا سێیێ بۆ كێشا 63 ب ده‌ستڤه‌ئینان, هه‌روه‌سان هه‌ردو كچێن پارێزگه‌هێ جیهان ئه‌حمه‌د كیشا 65كگم و سیداد سه‌عید 51كگم رێزێن دویێ و سێیێ ب ده‌ستڤه‌ئینان زێده‌باری یاریزانێ مه ئه‌حمه‌د ئیدریس ئه‌وێ كاروانێ خوه ب دووماه ئینایی پشكداری كربوو.
ژلایه‌كێ دیڤه ناڤهاتی ئه‌وچه‌نده ژی دیاركر كو سه‌ر ئاستێ یانێن پشكدار د قاره‌مانیێ دا یانا دهۆك شیا بۆ 12 كێشا نه‌ه یاریزان ده‌ربازبنه یاریێن دووماهیێ كو دهێته هژمارتن ئێك ژ ده‌ستكه‌فتیێن مه‌زن و دیروكه‌كا زێرینه بۆ پارێزگه‌هێ و كوردستانێ و گوت: شانازیه قاره‌مانیه‌كا بڤی قه‌باره‌یی و فه‌رمی و پله‌داركری ل سه‌ر ئاستێ جیهانێ ویا ژ هه‌موویا گرنگتر مێڤانداریا سه‌ركه‌فتی و ئه‌نجامێن دلخووشكه‌ر بوون، سۆپاسیا به‌رێز مه‌سرور بارزانی سه‌رۆكێ حوكمه‌تا هه‌رێمێ كو پشته‌ڤان و هاریكاربوویه ژبۆ مێڤانداریی و هه‌ردیسا عه‌لی ته‌ته‌ر پارێزگارێ دهۆكێ و شاكر ئه‌حمه‌د سمۆ رێڤه‌به‌رێ گشتی یێ وه‌رزشی و دیار ته‌یب ئه‌ندامێ په‌رله‌مانێ ئیراقێ ئه‌وێن خالێن سه‌ركه‌فتنا ڤێ قاره‌مانیێ بوون و قاره‌مانیا عه‌ره‌بی قۆرجا هێزێ دا وه‌رزشا كیك بۆكسینگا پارێزگه‌هێ ب تایبه‌تی و كوردستانێ و ئیراقێ ب گشتی.
