سالح كەكۆ: ناسناڤێ سۆپەرا ئیراقێ دەرگەهێ قارەمانیێن نێڤدەولەتی بۆ زانای ڤەكر
ستێرێ كیك بۆكسینگا یانەیا دهۆك زانا سالح كەكۆ شیا ناسناڤێ قارەمانییا سۆپەرا ئیراقێ یا وەرزێ 2023ێ ل سەر ئاستێ كێشا 67كگم بۆ سیستەمێ فۆل كۆنتاك یێ پلەكرییا نێڤدەولەتی، پشتی شیایی د یارییا دووماهیێ دا ب سەركەڤیت ل سەر هەڤڕكێ خوە یەحیا جەمیل ژ یانەیا ئتیفاق یا دیوانیە، د یاریێن واندا ئەوا 50 یاریزانێن خودان رێزبەندێن ئێكێ و دویێ یێن قارەمانییا ئیراقێ بۆ گشت یانەیان و یاریزانێن هەلبژارتیێ ئیراقێ ئەوا ل باژێرێ بابل هاتییە كرن.
ل دۆر ڤێ یەكێ سالح كەكۆ راهێنەرێ زانایی و هەلبژارتیێ ئیراقێ بۆ رۆژنامەیا ئەڤرۆ گۆت: سۆپاسیا خودێ دكەین كو ئەو زەحمەتا چەندین هەیڤە ب راهێنانێن بەردەوام ل دووماهیێ زانا شیا پێنگاڤا ئێكێ و جهێ خوە د ناڤ هەلبژارتیێ ئیراقێ پارێزیت ژبۆ پشكداریێ د قارەمانیێن نێڤدەولەتی و عەرەبی دا، سەركەفتنا كوڕێ پارێزگەهێ و یانەیا دهۆك ل سەر هەڤڕكێ خوە بەحیا جەمیل ب سانەهی نەبوو بەلكو شەڕەكێ درێژ و ئاگرین هەبوو، پشتی سێ گەڕا شیا ب دربێ كەتنێ یاریزانێ خوە بێخیت.
ژلایەكێ دووڤە زانا سالح گۆت: ئەز سۆپاسییا راهێنەر و بابێ خوە دكەم یێ ب شەڤ و رۆژ خوە ب من ڤە ماندی كری و هەمی شێوازێن راهێنانێ و چاوانییا بەرگێریی و وەرگرتنا خالان و دربێ كەتنێ نیشا من دایە، دیسان سۆپاسییا یانەیا خوە دكەم بەردەوام پشتەڤانن، قۆناغا ئێكێ ب زەحمەت مە دەرباز كر ئەو ژی وەرگرتنا پلێتا هەلبژارتیێ ئیراقێ و ئارمانجا من ژی مەزنترە ژ ڤێ ناسناڤێ سۆپەرێ، ئەوژی پشكداریێ د قارەمانیێن نێڤدەولەتی دا بكەم.
