سال د غای(١) دچن و بیرییا تە دکەم
عارف حیتۆ
سال.. داڤێن پرچا تە دخۆن
کێلیکێن خۆشیێ دالدە ددەن و
بویسەیێن نەپێشبینکری ل بەر ڤەددەن
ب کاسۆیی، حەزێن قەڕمتی پێ دشۆن
هەر نووچەیێ نەگەهشتییە خەریبییا من..
ل سەر تیکتۆکێ دجوون و ڤەدجوون.
سال د بێ رەحمن، بێ نیشان
دربێ خوە ددانن و ل سەرێ دیوانێ دڕوونن،
دبنە گۆچان
هەمی دیتنێن سەرڤەسەرڤە و ژ نشکاڤە،
دکەنە ئێشان
تم ڕووگەها کەسەرانە و دەرمانێ دەردێن بێ دەرمان
داخوازکریێن سەر سفرەکا وەریانێنە و دبنە ستران.
ئو د بەرڕا بیرییا تە دکەم..
پەیڤ وەک ستێران ل دۆر خامەیێ من هەلدپەڕن
تویرکێ عەشقێ پێ پڕ نابیت..
بیرەهی خوە ل شەڤەڕۆکان دجوحنینن
دارا خەریبیێ توڕ نابیت
ما چەند زەمەنێن دی دێ هەبن
ڕائێخ بن، ل بن پی یێن مە بن!
ئەڤە ئێکەمین نامەیا دوماهیێیە
بۆ تە ددانمە د کولەکێدا
داکو هەکو باران دباریت
گوڕگوڕا عەڤران لاڤژە بیت و برویسی،
مەشخەلەکێ ژ گوڕییا دلێ من ڤەدکەت و
بۆ تە دئینیت
بشکوڕینەک ژ پاشکەفتکریێ من ڤەببیت و
ل ڕاستا چاڤێن تە بسەکنیت
بسە.. تا پەرمویچکێن گڕنژینێ ب گولان وەردبن
دەرگەهێن هاتنێ ڤەدبن
داکو نەکو ئێک هزرکەت
ئەڤ سەمایا ل پێشوازییا کەنینا تە
تیرن ل دلێ تە پالە دبن
ئەز نە تیرڤانم، شڤانم
دەمێ بێری دهێنە بێرێ،
پەزێ من یێ بەلاڤەیە و بلوورا من ژی بەرزەیە
ژ شەرمادا خوە ڤەدشێرم
دستارێ هێجەتان دهێرم
لێ چ هێجەت نەشێن هەلچوونێ هاویشکەن
حەزێن بەردایی قاییشکەن
ئو (من)ەکێ (من) یا خوە دایە سالێن خرش
بهێلنە ل سەر هێلەک تەریب.
(١) غای : نیڤ نڤستی