ساویلكه‌یی
من نه‌دزانی كانێ ساویلكه‌یی چیه
مێوه‌كا زه‌ركیه ل خرابه‌كێ په‌رجانكری
یان ئاخه‌كا كێلایه ل ئاقاره‌كێ پاوانكری
گولاڤه‌كه
هه‌تاڤه‌كه
پێلاڤه‌كه
یان سوولاڤه ژ رزده‌ك بلند
د هوڕیێته هه‌ستێن كه‌ل و دوجانكری؟!
ئه‌وێ كچكا هه‌رده‌م لاپتۆپێ وێ ل ملی
ل زانینگه‌هێ ل من دنێڕی و دگۆت ساویلكه
بازرگانه‌ك ئه‌نی حولی
هه‌كو ڤه‌دگه‌ڕیا كارگه‌هێ، ب كه‌نی ڤه دگۆتی ساویلكه
ده‌مێ من دز دوورپێچ دكرن
مافیا ئۆرگانێن مرۆڤان سه‌رپێچ دكرن
ڤه‌دگه‌ڕیامه نك پۆلیسی ل خه‌فه‌رگه‌هێ و
دا گازی من كه‌ت ساویلكه
ئوو هه‌كو ئه‌ز بوویمه خۆكوژ ژبۆ جیهادێ و فتۆحاتان
دا بانگێ “الله أكبر” ببیت مناره و
هه‌می ژیوار ببیت كباره
مه‌لایه‌كێ ریه درێژێ مشتی ته‌لقین
ل پاپۆسا په‌رسگه‌هێ ژ ده‌لعین، ناڤێ من كربوو ساویلكه
ئوو هه‌كو بوویمه بارگێر و
وه‌لات ل سه‌ر پشتا من باره‌كێ گران
وه‌لاتڤانێن ل به‌ر په‌ڕاڤێن ڕێژگه‌هێ
ب تلێن گوستیرك لێ مه‌خه‌ل
ب بازدانێن ل سه‌ر وه‌غه‌رێن بێ جێژڤان
چاڤێن خوه ل من دنقاندن و دگۆتن ساویلكه
ئه‌رێ ما ساویلكه چیه؟
مێوه‌كا مایه ژبۆ شه‌رابێ
یان ژی جه‌ریفكێ سه‌رابێ
یان كچكه‌كا پرچ زه‌ر و مه‌مك مه‌زنه
پیاسێ دكه‌ت ل به‌ر ده‌رێ پشكا ئادابێ؟!
ئه‌رێ ما ساویلكه كیه؟
ئاهه‌نگه‌كا بێ ته‌وقیتا خه‌ون و خه‌یالێن میریه
یان گوله‌كه ژ مالبات و جۆرێ جۆریه
یان ژی ئه‌زم… ئه‌زه‌كێ د خه‌فكێ دا خه‌مگین
مژێ دادایه سه‌ر ئه‌نیێ و
هه‌ستێن وی داگرتین برین
ل پشت گوهێ وی دوڕیێ به‌نیێ و
دده‌ستێن وی دا حه‌ز و ڤین
د قه‌یدێ دا ئێخسیرێ كه‌نیێ و
ژ په‌رمووچكێن تفا وی خوین!
ئه‌زه‌كێ ترسیایی ژ قه‌ده‌رێ و
ده‌ستكێ زێڕینێ خه‌نجه‌رێ
ئه‌زه‌ك دێم سار و مه‌نده‌هۆش
ل هه‌مبه‌ری كه‌ڤاله‌كێ ده‌ورێ به‌رێ
پڕ دترسم…
ژ ڤێ ئاییردا ئاهه‌نگیا ل سه‌ر كه‌ڤالی
كو كه‌سه‌ك ژێ ده‌ركه‌ڤیت و
زه‌رگه‌هه‌كێ بگه‌هینته من
پاشی ل جه‌ژنا سه‌رێ سالێ ببیته دژمن
من بدزیت ژ منێ من
ئوو من بكوژیت..
به‌ری ئه‌زه‌ك شین ببیت ژ من.
***
