سبه‌هی پێله‌كا گه‌رمێ دێ هه‌رێما كوردستانێ ڤه‌گریت
هه‌ولێر، قائید میرۆ:
میدیایێن عیراقی به‌لاڤكریه، كو ئه‌ڤ ساله پلێن گه‌رمێ ل هه‌رێما كوردستان و عیراقێ دێ گه‌هنه 63 پله‌یێن سه‌دی و رێڤه‌به‌رێ كه‌شناسی و ئه‌ردهه‌ژێن هه‌رێما كوردستانێ ئاشكرا كر، چو راستی بۆ ڤێ چه‌ندێ نینه و سبه‌هی پێڤه دێ پلێن گه‌رمێ بلند بن و ل دهۆكێ دێ گه‌هیته 44ێ، به‌لێ ناگه‌هیته ئه‌ڤێ هژمارا هاتیه به‌لاڤكرن.
فازل ئیبراهم، رێڤه‌به‌رێ كه‌شناسیا هه‌رێما كوردستانێ بۆ رۆژناما ئه‌ڤرۆ دیار كر، ئه‌و زانیاریێن ل دۆر بلندبوونا پلێن گه‌رماتیێ دهێنه به‌لاڤكرن ل سۆشیالمیدیایێ و هژماره‌ك ده‌زگه‌هێن راگه‌هاندنێ جهێ باوه‌ریێ نینه و گۆت: “پێدڤیه وه‌لاتیێن هه‌رێما كوردستانێ بۆ پشتڕاستبوونێ زێده‌تر زانیاریێن كه‌شناسیا هه‌رێما كوردستانێ وه‌ربگرن، چونكو ل سه‌ر بنه‌مایێن زانستی و ب ئامیرێن پێشكه‌فتی دهێنه دیاركرن، نه‌ك هنده‌ك بناڤێن شاره‌زایێن كه‌شناسیێ زانیاریێن شاش به‌لاڤه دكه‌ن”.
فازل ئیبراهیم گۆتژیك “ژ حه‌فتیا بۆری وه‌ره ئه‌م كه‌فتینه ناڤا وه‌رزێ هاڤینێ و پلێن گه‌رمێ ژی به‌ره‌ڤ بلندبوونێ دچن، ب تایبه‌تی سبه‌هی دێ پلێن گه‌رمیێ زێده‌تر بلند بن، ئێك دو پله ژ رۆژێن بۆری دێ بلندتر لێهێن، به‌لێ وه‌كی هنده‌ك ده‌زگه‌هێن راگه‌هاندنێ به‌لاڤكری كو پلێن گه‌رمیێ دێ ل هاڤینا ئه‌ڤ ساله گه‌هنه 63 پله‌یێن سه‌دی چو راستی بۆ نینه و پێدڤیه وه‌لاتی ژ وه‌رگرتنا زانیاریێن شاش هشیار بن”.
