ستاندنا ره‌مادی و پاشڤه ڤه‌كێشانێت ته‌كتیكی
ئه‌ڤه هه‌یڤا دویماهیا بهارێیه، به‌لێ بهارا جوتیارا، نه بهارا قه‌سابێت ژیانێ و كوته‌كیێ و نه بهارا عه‌ره‌بی. جوتیارا به‌رێ ب داس و قه‌یناغا گه‌نم و جه‌ه ددروین. رۆژهه‌لاتێ ناڤه‌ڕاست، رۆژهه‌لاتێ خوینڕێژ و مرۆڤخۆر، بهارا، هاڤینا، زڤستانا و پاویزا مرۆڤا شاتانه‌دكه‌ته، روح دهێنه دروین.
پشتی سه‌رۆكێ ژ ئه‌خلاقی شویشتیێ سوریێ چووی هه‌وارا خۆ د بیانیا ئێخستی دا بهێن خه‌لكێ وه‌لاتێ وی بكوژن، سوری بووینه پێتڕانكێت سه‌همدارێت قه‌سابێت ئیرانێ و حیزبوللاهێت وێ و رێكخستنێت سوننیێت سه‌همێ. گه‌لكو ل جهه‌كی ل ئیرانێ هه‌لكه‌ت دێ جهه‌كێ دی تێكشێلیت و پێكۆلێكه‌ت بارێ خۆ سڤككه‌ت.
نوكه پێلا ڤه‌گرتنا ئیرانێ یا هاتیه راوه‌ستاندن. ل سوریێ رژێمێ خه‌به‌رێت نه‌خۆش ژ به‌رۆكێت شه‌ڕی بۆ دچن و بێهنا ئیرانێ ته‌نگ دبیت. یه‌مه‌نێ ئێكا هند كر عه‌ره‌بێت لسه‌ر هندێ پێكهاتین (چ جارا پێكنه‌هێن) هه‌می هێزێت خۆیێت له‌شكه‌ری كرنه‌ئێك و پێشكرنه به‌رۆكێت شه‌ڕێ حوسیێت ژ پێش ئیرانێڤه شه‌ڕیدكه‌ن و ره‌وشا وان هند یا باش نینه.
چاوا كوردا داخازا ده‌وله‌تبوونێ كر ئیرانێ فه‌رماندا مالكی میسلێ بچه‌ك و جه‌بلخانه‌ڤه و ب ده‌ور و ته‌سلیم بۆ داعشێ بهێلیت، دا داعش رێڤه‌به‌ریا كوردا ب هه‌ڕفینیت و نه‌خاسمه وان وه‌سا هزر دكر كو گه‌له‌ك عه‌ره‌بێت سوننه به‌ریڤ كوردستانێ هاتینه راته‌قاندن و ژ دلسۆتنا خۆ دێ هاری داعشێ كه‌ن كوردستانێ ستینن، چنكی ئه‌و وه‌سا ددانن كورد دۆستێت شیعانه و پاشی ئیرانی ب ناڤێ نه‌هێلانا ده‌سته‌كا سه‌همدار و سه‌همێ (ته‌رۆرێ) شێن سه‌همكه‌را برینن و هوسا دێ دو كه‌وا ب به‌ره‌كی كوژن. كوردا ب عه‌ره‌بێت سوننه ده‌نه براندن و پیرۆزباهیا ئه‌وروپا و ئه‌مریكا ده‌ست خۆڤه ئینن، چنكی شه‌ڕێ سه‌همێ دكه‌ن. هه‌روه‌سا دێ گه‌له‌ك سوننا كوژن ڤێجا چ كورد بن ئان عه‌ره‌ب هه‌ر سوننه‌نه و لنك شیعا فه‌رقا سه‌یێ ره‌ش و سپی نینه. به‌لێپا ئه‌مریكا زوی د هانا كوردا هات و كوردا ژی ده‌ست نه‌داهێلان، چنكی یا خۆ ب ڕستا ئایدیۆلۆجیا نفشپه‌رێسڤه دیتی و ته‌ڤنێ ئیرانێ ل كوردستانێ كره رویس.
ئه‌م دبینین، چاوا به‌رپێڕهێ رژێما سوریێ یێ ته‌نگ دبیت و رۆژ بۆ رۆژێ پێت وێ بۆ بنزكی دهێنه پالدان. رۆسیا زڕته‌كا ئیرانێ و سوریێ ژی ئێدی ده‌ستێ ژ ڤیتۆیا به‌ردای و ل پاریه‌كێ نانی بۆ خه‌لكێ خۆ دگه‌ڕیێت و لاڤرۆڤ و جۆن كێری ده‌مێ ئێكدو دبینن بده‌ڤ كه‌نینه و دڤێت هه‌ڤپشك ئارێشێت ده‌ڤه‌رێ چاره‌كه‌ن. ئه‌ڤه بۆ ئیرانێ شكه‌ستنه و نوكه دلێ وی وه‌لاتی هزار ئاوازا لێدده‌ت چنكی كرمێ رحا ئیرانێ د ده‌ستێ ئویرسادایه.
سه‌ره‌دانا ڤێ دویماهیێ یا سه‌رۆكێ كوردستانێ بۆ ئه‌مریكا، دربه‌ك بوو بناڤ چاڤێت مه‌لایێت نه‌جه‌فێ و قۆمێ و ته‌هرانێ كه‌تی. ئه‌مریكا ئێدی رێگرا چێبوونا ده‌وله‌تا كوردستانێ نینه و نه‌دویره پشته‌ڤانیێ ژی لێ بكه‌ت هه‌كه ژ پێشكه‌تنێت نێگه‌تیڤێت ده‌ڤه‌رێ بێ هیڤی ببیت. یا فه‌ر بۆ ئه‌مریكا و دنیا ئازا ئه‌وه ل ڤێ ده‌ڤه‌رێ سیناهیه‌ك هه‌بیت مرۆڤ خۆ تێڕا ببینیت. ئیران قه‌بیلناكه‌ت كوردا چ به‌رپێڕه ل ده‌ڤه‌رێ ده‌ستكه‌ڤن و نوكه هه‌بلێر بوویه كه‌لا پاراستنا هه‌می رۆژهه‌لاتی.
ئه‌م كورد دبێژین (نیشانێت مرنێ تانه و نیشانێت به‌فرێ بانه)، شه‌ڕێت ڤی هه‌یامی هندی وێڤه‌تره دشارهایترن و هندی رۆژا پاشتره بهارا عه‌ره‌بی یا پێتر ب داس و قه‌یناغ و ترپانا مرۆڤێت رۆژهه‌لاتی ددرویت و ڤه‌دزه‌لینیت و به‌ر حاكما وه‌ردكه‌ت و پێ پێجاندكه‌ت.
هندی ئیران و پشته‌ڤانێت وێ ل یه‌مه‌نێ دسه‌ركه‌فتی و رۆژ بۆ رۆژێ پێتر عه‌رد دگرت، ده‌وله‌تا ئیراقێ وه‌نه‌دكر داعش ل ره‌مادی بهۆسته‌كێ پێشكه‌ڤیت و وه‌كی پێكهاتنه‌كێ لناڤبه‌را حكومه‌تا به‌غدا و داعشیا هه‌بوو، دا داعشی چن جهه‌كی گرن و پاشی دا به‌غدا حه‌شد و مه‌شدا و له‌شكه‌رێ خۆ ب سه‌دا ته‌ننێت چه‌ك و جه‌بلخاناڤه كێشیته سه‌ر و ژێ ستینیته‌ڤه و چه‌ند له‌شكه‌ره‌كێت كێم و تێرا هه‌می له‌شكه‌رێ ئیراقێ چار پێنج هه‌یڤا شه‌ڕی پێ بكه‌ت چه‌ك و جه‌بلخانا ل وێرێ هێلیت و زڤڕیته‌ڤه، پاشی دا جاره‌كا دی داعش هێته‌ڤه و شه‌ڕه‌كێ ژ قه‌ستا كه‌ن و وێ قیامه‌تا چه‌ك و جه‌بلخانا بۆ خۆ به‌ن.. . هه‌ما هوسا. ئه‌ڤه دیاردكه‌ت كو حكومه‌تا ئیراقێ نه‌ڤێت جه‌بلخانا داعشێ نه‌مینیت دا بشێت لسه‌ر شه‌ڕێ دگه‌ل كوردا به‌رده‌وام بیت، ئانكو مێتناهێزا (ئیستینزافا) كوردا بهێته‌كرن. ب دیتنا من خودانێت ڤێ پلانێ ئیرانینه، چنكی وان دڤێت:
ئێك: ب مه‌هانه‌یا شه‌ڕێ داعشێ بهێن ل ئیراقێ بنه‌جهببن و ژ دو لاڤه، رۆژهه‌لاتی و ژێری، كوردا دورپێچكه‌ن و پێكۆلا هندێ بكه‌ن چێكرنا ده‌وله‌تا كوردا به‌ربه‌ندكه‌ن.
دو: بهێن ب چه‌كێ خۆیێ پێشكه‌تیڤه ل داعشێ و جه‌ماهیرێ وێ بده‌ن و كوشتنه‌كا نه‌هۆمار ژێ بكه‌ن و ب مه‌هانه‌یا شه‌ڕێ سه‌همداریێ (ته‌رۆریزمێ) گه‌له‌ك عه‌ره‌بێت سوننه بكوژن.
سێ: ئه‌و چه‌كێ ئه‌مریكا دایه ئیراقێ بۆ خۆ ببه‌نه ئیرانێ، ب ڤێ چه‌ندێ ته‌كنیكا چه‌كێ ئه‌مریكی بدزن و لبه‌ر چێكن و دێ شێن ته‌كنۆلۆجیا له‌شكه‌رێ ئه‌مریكا ده‌ست خۆ ئێخن.
چار: نوكه له‌شكه‌رێت ئیراقێ پێتریا وان شیعه‌نه و دڤێت عه‌ره‌بێت سوننه نه‌چاركه‌ن گوهداریا وان بكه‌ن سوننه‌یێ بهێلن. هه‌كه ئه‌ڤه چێبوو، هینگێ دێ كه‌رێ هه‌یڤا شیعی ژ لایێ جوگرافی و دیمۆگرافیڤه ژ لوبنانێ حه‌تا ئیرانێ هێته پێكڤه‌گرێدان و دێ تركی و كوردا و ده‌وله‌تێت عه‌ره‌بێت سوننه ژێكڤه‌قه‌تینیت. ئه‌ز دویر نابینم ئیران داعشێ پالده‌ت دا شه‌ڕێ مه‌مله‌كه‌تا هاشمیا ئۆردنێ ژی بكه‌ت.
پێنج: هزردكه‌ت دێ كێنجا سۆزبه‌ندا عه‌ره‌بی لسه‌ر حوسیێت یه‌مه‌نێ كێمكه‌ت و سعۆدیێ و هه‌ڤالێت وێ نه‌چاركه‌ت هنده‌ك ژ هێزێت خۆ بیننه سه‌ر تخویبێت ژووریێ نیڤگرزیرتا عه‌ره‌بی و به‌ر ئۆردنێ دا نه‌كه‌ڤیته ده‌ستێ ئیرانێ و رێ بۆ حوسیا ڤه‌ببیت ده‌وله‌ته‌كا شیعی ل یه‌مه‌نێ چێكه‌ن و رێكێت بازرگانیا ده‌ریایی ده‌ستێ خۆ داننه سه‌ر و هوسا ئیمپه‌راتۆریه‌ته‌كا فارسی شیعی دانن و پاشی نه‌دویره به‌رێ قیبلێ ژی بێخنه نه‌جه‌فێ چنكی ئه‌و هزردكه‌ن كو مه‌حه‌مه‌د پێغه‌مبه‌ری (س. خ) پێغه‌مبه‌رینیا ژ عه‌لی دزی.
به‌لێپا گه‌له‌ك جارا بایێ جوخینێ لدویڤ دلێ جوتیاری ناهێت و دبیته زڤڕۆك و بسه‌ر دگریت و حالێ وی دكه‌ته حالێ زه‌مبیلفرۆشی هه‌كو ژ خۆشیێ ره‌ڤی خۆ د بانیدا هاڤێتی و مری. داعشێ هندی پێتر چه‌ك بۆ دهێته هێلان، ئه‌و پێتر ل دور به‌ژنا ئیرانێ دزڤڕیت. ئیرانێ داعش چێكر ب ده‌ڤه‌رێڕا به‌ردا، به‌لێ نوكه هندی دهێتێ نه‌شێت ژ ته‌شك و ته‌لیشكێت خۆ ڤه‌كه‌ت.
حه‌تا ئه‌مریكا چاره‌كێ بۆ یه‌مه‌نێ دبینیت دێ داعشێ مفای ژێكه‌ت بۆ راوه‌ستاندن ئان گیرۆكرنا ئیرانێ و ژبه‌ر هندێ ئه‌مریكا ل ره‌مادی گه‌له‌ك ب دژواری ل داعشێ نه‌دا و دڤێت ئاگرێ ئیرانێ هه‌لكریب ده‌همانێت وێ بێخیت.
ئاڤڕیێت ژ به‌رپرسێت له‌شكه‌ریێت ره‌مادی دهێن، هه‌می لسه‌ر هندێ دكۆكن، له‌شكه‌رێ ئیراقێ شه‌ڕ نه‌كریه و ره‌مادی یا بده‌ست داعشێڤه به‌ردای و دبێژن ئه‌ڤه ته‌كتیك بوو مه كری و دێ لێ زڤڕینه‌ڤه. ئه‌ز بخۆ دبێژم ئه‌ڤه ته‌كتیكا پێتر كوشتنا عه‌ره‌بێت سوننه‌یه و پاشی تژیكرنا وێرێ ب عه‌ره‌بێت شیعه و له‌شكه‌رێت ئیرانێ و داعش ڤێ دزانیت و هه‌ر وه‌كی دیار داعشێ ئه‌و هزر هه‌یه ژ وێرێ بهێته ده‌رێخستن و ژبه‌ر هندێ چوو ته‌دمورێ گرت، دا رێیا پێكڤه‌گرێدانا شیعا و عه‌له‌ویا بگریت و هه‌كه داعشێ ئه‌ڤ سومعه‌تا پیس نه‌با دا ده‌وله‌تێت عه‌ره‌بی، نه‌خاسمه سعۆدیێ و ئۆردنێ، هاریكه‌ن و نه‌دهێلا ژ ئه‌نبارێ بهێته ده‌رێخستن.
تشتێ چریسه‌ت ئه‌وه، ڤێگاڤێ ئیران د روحا وه‌ختی ناگه‌هیت و ئارێشا وێ نه‌به‌س عه‌ره‌بێت سوننه‌نه، به‌لكی ئه‌و جوگرافیا ئیرانێ دڤێت بۆ خۆ چێكه‌ت گه‌فه‌كا مه‌زنه لسه‌ر ته‌ناهی و بسته‌هیا ئسرائیلێ و د دنیا نوكه‌دا ئه‌ڤه بڤه‌یه. ئه‌و دبێژن مه پێتری هه‌شتێ هزار سارۆخا ل لوبنانێ هه‌نه و دێ ته‌لئه‌ڤیڤ و حه‌یفایێ پێ كه‌ینه‌ڤه ئاخ. د ره‌وشه‌كا هۆسادا ئه‌ز باوه‌رناكه‌م رۆژئاڤا هه‌می پشتا ده‌وله‌تا جهوییا نه‌گرن و د هانێ نه‌چن و هه‌روه‌سا ئسرائیل ژ لایێ له‌شكه‌ریڤه هندا بهێزه دشێت ل هه‌می ده‌ڤه‌را رۆژهه‌لاتێ ناڤه‌ڕاست زڤستانه‌كا ناڤكی چێكه‌ت، ئانكو ژیار و هه‌می ژیار لێ ببریێت.
هه‌كه بێت و ئیران ئێستگه‌ها ده‌یمۆنه یا زاخكرنا یۆرانیۆمی بپه‌قینیت، هند زیان ناگه‌هیته جهوییا هندی ب عه‌ره‌بێت بسورمان دكه‌ڤیت. قه‌تكا غه‌ززه نامینیت و سینایێ دێ ژیار لێ بریێت.
