ستراتیژیا ئەمریکا و ئسرائیلێ بۆ ئیرانێ یا زەلال نینە
چاڤدێرێن سیاسی دیار دکەن، هەتا نها ژی ستراتیژیا ئەمریکا و ئسرائیلێ بۆ پاشەرۆژا ئیرانێ دیار نینە و ل هەمبەر دا ئیرانێ ژی دڤێت شەڕ ڤەکێشیت دا ئەمریکا و ئسرائیل نەچار بن شەڕی راگرن و گرنگە کوردێن رۆژهەلات ژی هشیار بن و نەبنە قوربانی.
چەنگیز چاندار ئەندامێ پەرلەمانێ تورکیا دیار کر، هەتا نها دیار نینە کا ئەمریکا و ئسرائیلێ چو بەرنامە بۆ ئیرانێ هەنە یان نە؟ لێ دەمێ مرۆڤ بەرێ خوە ددەتە داخویانیێن ترامپی و بەرپرسێن ئسرائیلێ دیار دبیت جارێ وان دڤێت رژێما ئیرانێ لاواز بکەن و هەکە بشێن ژناڤ ببەن، لێ چو بەرنامەیێن وان بۆ پشتی ژناڤچوونا رژێما نها نینە و ئەو یەک ژی ئاریشەیەک گەلەک مەزنە، چونکی ئیران وەلاتەک مەزنە و خوەدان هێزە و شیایە هەتا نها ب رەنگەکێ باش بەرگریێ بکەت و گۆت: (ئیرانێ دڤێت شەڕ بۆ دەمەکێ درێژ ڤەکێشیت، ئیرانێ دڤێت رۆژهەلاتا ناڤین و هەتا بشێت جیهانێ ژی تووشێ قەیرانا ئابووری بکەت، ئیرانێ دڤێت دەستهەلاتا خوە بپارێزیت، هەرچەندە هەتا نها گەلەک زیان گەهشتینە ئیرانێ، لێ هێشتا ژی زوویە ئەم بەحسێ ژناڤچوونا رژێما ئیرانێ بکەین).
ناڤهاتی سەبارەت ب کوردێن رۆژهەلاتێ کوردستانێ ژی دیار کر، راستە نها دەلیڤەیەکا باش بۆ کوردان هاتیە پێش، لێ د هەمان دەمی دا گەلەک مەترسی ژی هەنە، دڤێت کورد ب رەنگەکێ ئاقلانە سەرەدەریێ ل گەل رەوشا نها بکەن، چونکی هەکە کورد بێی بەرنامە د شەڕی دا پشکدار بن دێ زیانێن گەلەک مەزن گەهنە کوردێن رۆژهەلاتێ کوردستانێ و دیار نینە کا دێ ئەمریکا و ئسرائیل کوردان بۆ دەمەک درێژ پارێزن یان نە.
ل ئالیێ دی حسام دەستپیش ماموستایێ زانکۆیێ ل ئۆرۆپا کو د هەمان دەمی دا خەلکێ رۆژهەلاتێ کوردستانێ یە دیار کر، ژ ئەنجاما شەڕی هەتا نها ئیران گەلەک لاواز بوویە، ئێرشێن ئیرانێ یێن ل سەر وەلاتێن کەنداڤی و هەرێما کوردستانێ ژی نیشا ددەت کو ئیران گەلەک لاواز بوویە و ژ بەر ڤێ یەکێ ژی بەردەوام گەفان دکەت، گرنگە هەرێما کوردستانێ خوە ژ شەڕی دوور بکەت و ل ئالیێ دی هێزێن سیاسی یێن کورد ل رۆژهەلاتێ کوردستانێ ژی دڤێت خواندنەکا راست بۆ رەوشا هەی بکەن و نابیت کورد بێی بەرنامە بچنە ناڤ شەڕی، چونکی وی دەمی دێ کورد بنە قوربانی و ئەزموونا رۆژئاڤایێ کوردستانێ ژی سەلماند کو ئەمریکا و ب تایبەتی ژی ئیدارەیا ترامپی جهێ باوەریێ نینن و تنێ وان بەرژەوەندیێن خوە دڤێت.
ناڤهاتی ئەو یەک ژی دیار کر، راستە نها ئەمریکا و ئسرائیل بەردەوام سازیێن سەربازی و بنگەهێن پاسدارێن ئیرانێ ل رۆژهەلاتێ کوردستانێ دکەنە ئارمانج و گەلەک بنگەهێن پاسداران ژناڤبرینە، لێ هێشتا ژی هێزێن ئیرانێ ل رۆژهەلاتێ کوردستانێ بهێزن و خوە ل قوتابخانە و جهێن دی ڤەشارتینە، ئانکو هەکە هێزێن کوردی بچنە رۆژهەلات ئەو دشێن مەترسیێ بۆ خەلکێ سڤیل ژی دروست بکەن، ڤێجا گرنگە کورد گەلەک د هشیار بن.
ل ئالیێ دی گەلەک ژ چاڤدێرێن سیاسی یێن کورد ل رۆژهەلاتێ کوردستانێ و ئۆرۆپا ژی وەسا دبینن کو هەکە شەڕ بۆ دەمەکی درێژ ڤەکێشیت دێ ئەمریکا و ئسرائیل پێدڤی ب هێزێن کوردی یێن رۆژهەلاتێ کوردستانێ بن، بەس هەتا تەهران نەکەڤیت و ل دەڤەرێن دی یێن ئیرانێ ژی بەرهەڤی نەهێنە کرن نابیت کورد پشکداریێ د شەڕی دا بکەن، چونکی ئیدارەیا ترامپی ل رۆژئاڤایی کوردستانێ کورد ب تنێ هێلان و گەلەک زیان گەهشتنە کوردان، ڤێجا گرنگە کورد رێ نەدەن هەمان تشت ل رۆژهەلاتێ کوردستانێ ژی روو بدەت، چونکی دەمێ پێدڤیا ئەمریکا ب کوردان نەما دێ ب ساناهی دەست ژ کوردان بەردەت.
هەروەسا سەرۆک کۆمارێ ئیرانێ مەسعود پزیشکیان ژی دوهی دیار کر، ئیرانێ نەڤێت شەڕێ چو وەلاتێن هەڤسو و ب تایبەتی ژی وەلاتێن کەنداڤی بکەت و هەکە وەلاتێن کەنداڤی نەبنە مەترسی ئیران ژی ئێرشی وان ناکەت و گۆت: (من فەرمان دایە هێزێن لەشکری کو ئێرشێن ل سەر وەلاتێن کەنداڤی بدەنە راگرتن و گرنگە وەلاتێن کەنداڤی ژی هاریکاریا ئەمریکا و ئسرائیلێ نەکەن و نەبنە مەترسی بۆ ئیرانێ).
