سترانا (جانێ ده‌لالا من) سیاسی یه و نیاز ئه‌و بوو هونه‌رمه‌ند گولبهار ل گه‌ل ئه‌یازی بێژیت
ئه‌ڤرۆ، هه‌رهین:
هه‌لبه‌ستڤان و ئاوازدانه‌ر عه‌بدولعه‌زیز سلێمان، دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ده‌رباس بوویه ژ نوت و سێ هونه‌رمه‌ندان من هه‌لبه‌ست و ئاواز داینێ و نوكه ژی یێ به‌رده‌وامم و من هه‌لبه‌ست و ئاواز داینه گه‌له‌ك سترانبێژێن نویخاز و كار ل سه‌ر دكه‌م و من چو هونه‌رمه‌ندێن تایبه‌ت نین كو حه‌ز بكه‌م هه‌لبه‌ت و ئاوازان بده‌مێ و ئه‌و بخوه دلخاز دكه‌م و پێشكێشی وان دكه‌م و ئه‌ز په‌یڤ و ئاوازان چێدكه‌م و ده‌نگه‌كێ ب دلێ من هه‌بیت دده‌مێ و ب دلێ من نه بیت ناده‌مێ و هونه‌رمه‌ند هه‌نه من په‌یڤ و ئاواز داینێ و یێ په‌شێمانم، چونكو ده‌رحه‌قێ سترانێ نه‌ده‌ركه‌ڤتینه ئه‌و په‌یڤ و ئاوازێن خوه‌ش مراندینه، به‌لێ ب چو ره‌نگان كارتێكرن ل من نه‌كریه، چونكو خه‌لك من دنیاسیت و من تشتێ جوان و رێكو پێك پێشكێشكریه
زێده‌تر گۆتژی: سترانا جانێ ده‌لالامن ژ په‌یڤ و ئاوازێن من و هونه‌رمه‌ند ئه‌یاز یوسڤ گۆتیه و ستران بخوه دوقولی یه و من وه‌سا چێكربوو ئه‌یاز و گولبهار پێكڤه بێژن و ئه‌م چووینه مالا گولبهارێ، به‌لێ وێ ئه‌و شیانه نه‌بوون، له‌ورا ئه‌یازی بتنێ گۆت و باوه‌رناكه‌م دو ده‌مژمێران من ل سه‌ر ئه‌وێ سترانێ كاركربیت ل ئه‌وی ده‌می ئه‌ز ره‌ڤی بوومه ره‌مادی و ئه‌یاز هه‌ر دهاته سه‌ره‌دانا من و ئه‌و ئه‌و سترانه ب تمامی سیاسی یه و دبیت گه‌له‌ك هزر بكه‌ن ئه‌ڤینداری یه و هه‌كه ب ته‌ركیز گوهداری بهێته كرن وه‌سا كوردستانێ و چیا و لات و ه‌ری و خورتێن كوردستانێ دهێته‌كرن و دپه‌یڤێن خوه دا ئه‌ز هێمایان ب كاردئینم.
ل دووماهیێ گۆت: دژیانا خۆدا په‌شێمانێ بێ وه‌فاییا هنده‌ك كه‌سانم و ئه‌و كه‌سێن من زه‌حمه‌ت ڤێرا بریه و لدووماهیێ مرۆڤی ژبیربكه‌ت و ئه‌و قه‌نجێن مرۆڤی لێ كرین ل به‌ر چاڤ نه‌بن و یێ په‌شێمانم من تێكه‌لیا ئه‌وی كری.
