سترانا نوكه یا وه‌رزی یه و زووكا بێ تام دبیت
ئه‌ڤرۆ، هه‌رهین:
هونه‌رمه‌ند مه‌حمود بامه‌رنی د دیداره‌كێ دا بۆ رۆژناما ئه‌ڤرۆ ئاشكراكر كو هه‌تا دو سێ سترانێن نوو وه‌كو په‌یڤ و ئاواز ل به‌ر ده‌ستێ وی نه، به‌لێ ژ به‌ر نه‌بوونا سپونسه‌ران نه هاتینه توماركرن.
زێده‌تر گۆت: به‌رهه‌مێ بێ سپونسه‌ر دێ یێ لاوازبیت و د سه‌ر هندێ را مه گه‌له‌ك سپونسه‌ر ژی هه‌نه، به‌لێ جوداهیێ دكه‌ن دناڤبه‌را سترانبێژان دا و ئه‌و چه‌نده ژی كه‌فتیه سه‌ر په‌یوه‌ندیێن تایبه‌ت.
ناڤهاتی گۆت: گه‌له‌ك گه‌نجان ل ده‌ستپێكا خوه و ستران گۆتنێ زارڤه‌كرنا هنده‌ك سترانبێژان كریه و ل سه‌ر ستایلێ وان دچوون و ده‌نگێ خوه وه‌كو وان لێكریه پاشان چ ستایل نه‌گرتینه و هه‌تا نوكه ده‌نگێ وان یێ زارڤه‌كرنێ یه وه‌كو یێ وان هونه‌رمه‌ندایه مرۆڤ جوداهیێ ناكه‌ت دناڤبه‌را ده‌نگێن وان دا و گه‌له‌ك سترانبێژێن نوكه سترانێن هونه‌رمه‌ندێن نه‌مر نووكرینه و دبینم ئه‌و سترانه‌كێ نوی چێكه‌ن باشتره ژ نووكرنا سترانه‌كێ و نا بیته مولكێ وی و هه‌ر ئه‌و سترانه بۆ خودانێ وێ دزڤریت.
هه‌روه‌سا مه‌حمودی گۆتژی : سترانا نوكه‌یا وه‌رزی یه و زووكا بێ تام دبیت ئه‌و ژی ژبه‌ركو هه‌لبژارتنا وان دپه‌یڤ و ئاوازادا یا لاوازه و ئه‌و سترانا په‌یڤ و ئاوازێن وێ ب هێز بن ئه‌و سترانه دمینت.
