سترانبێژێن گه‌ڤه‌رێ شیاینه فلكلۆرێ وێ ده‌ڤه‌رێ ب پارێزین
ئه‌ڤرۆ نیۆز،زنار تۆڤى:
خانما سترانبێژ زه‌ینه‌ب گه‌ڤه‌رى كو خه‌لكا گه‌ڤه‌را باكۆرێ كوردستانێ یه د هه‌ڤپه‌یڤینه‌كێ دا بۆ ئه‌ڤرۆ نیۆز دبێژیت:ئه‌ڤه ماوێ چه‌ندین سالانه ئه‌ز سترانا دبێژم و مالباتا من گه‌له‌ك پشته‌ڤانى ل من كریه،كو ئه‌ز سترانان بێژم و هه‌روه‌سا خوشكا من ژى ل ئاهه‌نگ و دیلانان ل گه‌ل من سترانان دبێژیت،دیسا هه‌تا نوكه من سێ كلیپ چێكرینه و هه‌روه‌سا نوكه ئه‌ز كار د چێكرنا كلیپه‌كا نوو دا دكه‌م ب ناڤێ”ئه‌رێ جیرانێ” كو ل ڤان نێزیكان دێ وێ كلیپێ ژى به‌لاڤكه‌م،هه‌ر چه‌نده هه‌تا نوكه من دو ئه‌لبۆم چێكرینه،له‌ورا ژبه‌ر ئاسته‌نگیێن ژیانێ ئه‌ز نه شیایمه گه‌له‌ك ئه‌لبۆم و كلیپان به‌لاڤ بكه‌م.
زه‌ینه‌بێ دیاركر ژى:چێكرنا به‌رهه‌مێن هونه‌رى ل باكۆر گه‌له‌ك زه‌حمه‌تى تێدایه،ژبه‌ركو حوكمه‌تا توركیا سانسۆر دانایه سه‌ر به‌رهه‌مێن مه و ئه‌م نه‌شێین وه‌كو پێدڤى به‌رهه‌مێن خوه چێكه‌ین،هه‌ر چه‌نده ئه‌و كار و به‌رهه‌مێن هه‌تا نوكه من چێكرین و به‌لاڤه‌كرین ژى خه‌لكێ پێشوازى لێكریه و به‌رهه‌مێن من كرینه،هه‌روه‌سا تاراده‌یه‌كێ ره‌وشا سترانا كوردى ل باكۆر یا باشه،لێ گه‌له‌ك ژ سترانبێژێن تورك ستران و فلكلۆرێ كوردان دزیه و ب ناڤێ خوه به‌لاڤكرینه،ناڤهاتیێ گوت ژى:نوكه ئه‌ز به‌رهه‌ڤیان بۆ چێكرنا ئه‌لبۆمه‌كا نوو دكه‌م و بۆ سالا نوو من ل به‌ره وێ ئه‌لبۆمێ به‌لاڤ بكه‌م و هه‌روه‌سا دێ هنده‌ك سترانان ژێ كلیپ كه‌م ژى،هه‌روه‌سا ئه‌ز ل گه‌ل كۆما ده‌شتا گه‌ڤه‌رێ ژى كار دكه‌م،كو ئه‌ڤ كۆمه ل سالا 1998 هاتیه دامه‌زراندن و نوكه ئه‌م شه‌ش كه‌س دڤێ كۆمێ دا كار دكه‌ین و پێكڤه دچینه داوه‌ت و دیلانێن كوردى.
زه‌ینه‌بێ ئه‌و چه‌ند ژى دیاركر:سترانبێژێن ده‌ڤه‌را گه‌ڤه‌رێ شیاینه ستران و فلكلۆرێ ده‌ڤه‌را مه ب پارێزن و نه‌هێلایه سترانێن فلكلۆرى یێن ڤێ ده‌ڤه‌رێ ژناڤ بچن،هه‌روه‌سا من چه‌ندین جاران سه‌ره‌دانا هه‌رێما كوردستانێ كریه و من پشكدارى د چه‌ندین به‌رنامێن ته‌له‌فزیۆنى و ئاهه‌نگان دا كریه.