سترانگۆتن بارەكێ گران و ب زەحمەتە
سندس سالح سلێڤانەیی:
سترانبێژ (هەلكەت محەمەد) د دیدارەكێ دا بۆ رۆژنامەیا ئەڤرۆ گۆت: دژیەكێ بچووكدا من حەزژ گۆتنا سترانان دكر و سترانا منا ئێكێ ب ناڤێ (من ژبیرنەكە) ل سالا 2016 هاتە بەلاڤكرن و خەلكەكێ زۆر حەزژێكرن.
هەروەسا گۆت: ستایلێ من یێ جوودایە كو دبێژنێ (سلۆ) ئەڤ ستایلە پتر ل گەل دەنگێ من دگونجیت و هەر سترانەكا من بابەتێ خوە یێ تایبەت هەیە، لێ سترانا پتر ژ هەموویان ئەز حەزژێدكەم ب ناڤێ (نەچە) یە، كو ژ پەیڤ و ئاوازێن من بوو، هەروەسا تایبەتمەندیا خوە ل دەف من هەیە و ناڤەرۆكا پتریا سترانێن من ئەڤینی نە، هەروەسا من سترانەك ب سەرۆك (مەسعود بارزانی) ب ناڤێ (ئەم خودان مەسعودین مەسعود) گۆتیە كو خەلكەكێ زۆر حەزژێكرن و ببوو ترێند، نوكە ئەز كاری ل سەر دو سترانێن نوو دكەم، ئێك ژوان دویتە ل گەل كچەكێ دێ بێژم، سترانا دویێ ژی ب ستایلێ (سلۆ) یە، لێ هەردەم ئەز دبێژم سترانگۆتن بارەكێ گران و ب زەحمەتە و هەموو كەس نەشێن بێژن. لەورا داخوازا من ژ هەموو سترانبێژان ئەوە سترانێن پاقژ و د ئاستدا بێژن، نە بۆ چەند ڤیۆ و لایكان كاربكەن، چنكو هونەر كارەكێ گەلەك پیرۆزە.
