سترانێن فۆلكلۆری چو جاران كەڤن نابن
بێوار حەمدی:
سترانبێژێ فۆلكلۆری (هشیار سندۆری) كو ئەڤە پتر ژ سیه سالانە سترانان دبێژیت، د دیدارەكێ دا بۆ رۆژناما ئەڤرۆ گۆت: هەرچەندە تەكەنۆلۆژیا پێش دكەڤیت و بەردەوام ژیان د گوهۆڕینێ دایە، بەس خەلكێ هەر حەزژ سترانێن فۆلكلۆری دكەن و چو جاران كەڤن نابیت، لەورا ئەم ژی هندی دژیانانێ دا بمینین و مە شیان هەبن دێ خزمەتا سترانا فۆلكلۆری كەین، چنكو فۆلكلۆر ناسنەمایا مەیە و ئەم ب هەبوونا وی د سەرفرازین.
هەروەسا گۆت: بەرهەمێ من یێ ئێكێ ل سالا 1991 ب هاریكاریا هونەرمەند(رەباح تەمەر) هاتبوو بەلاڤكرن و هەتا نوكە من نێزیكی (130) سترانان ژبەركرینە، بەلێ كلیپێن من دكێمن و ئەز داخبارێ دەنگێ هەردو هونەرمەندان(محەمەد عارفێ جزیری و ئیسفێ ئەبۆ خورتا) مە، سوپاس بۆ خودێ كو خەلكێ مە سترانێن باب و باپیرێن خوە ژبیرناكەن، هەروەسا گەلەك گرنگیێ ب دابونەریتێن خوە یێن جڤاكی ددەن.
