ستران و مۆزیکا کوردی ژ یا گەلەك مللەتێن دی زەنگینترە
زاخۆ، دلۆڤان هالۆ:
سترانبێژ و مۆزیکژەنێ گەنج عەبدوللا هەژار، د دیدارەکێ دا بۆ ڕۆژناما ئەڤرۆ دیارکر کو هەر ل قوناغا سەرەتایی ئەز بوومە هەڤالێ ستران و مۆزیکێ، ئەز دەرچوویێ پەیمانگەها هونەرێن جوانم و نوکە ژی مامۆستایێ وانا مۆزیکێ مە ل قوتابخانێ، و ئێکەم بەرهەمێ من بەلاڤکری پێکهاتیبوو ژ چەندین سترانێن فۆلکلۆری.
ناڤهاتی ئاماژە ب وێ چەندێ ژی کر کو ئەز گۆهداریا هەموو شێوازێن سترانان دکەم چونکی هەر شێوازەکێ تاما خوە یا تایبەت هەیە، گۆهداریا وان هونەرمەندان دکەم یێن کو ژ دل کار دکەن و هونەرەکێ دورست پێشکێش دکەن، لێ ئەز بخوە حەز ژ شێوازێ عەرەبێسك دکەم چونکی ئەو پتر لگەل شێواز و دەنگێ من د گۆنجیت.
گۆت ژی:»ستران و مۆزیکا کوردی ژ یا گەلەك مللەتێن دی زەنگین ترە، چونکی هەر باژێر و دەڤەرەکا کوردستانێ د بیاڤێ هونەری دا شێواز و زاراڤێ خوە یێ تایبەت هەیە، و زۆربەیا مللەتێن ڕۆژهەلاتا ناڤەڕاست مفا ژ ستران و مۆزیکا کوردی وەرگرتیە، ئەڤ چەندە ژی زەنگینیا هونەرێ کوردی د سەلمینیت».
زێدەتر ژی گۆت:»تەکنەلۆژیا سەردەم مفایەکێ باش گەهاندیە ستران و مۆزیکا کوردی، چونکی د نوکە دا باشترین جۆرێن ئامیرێن مۆزیکێ ل بەردەست هەنە، و مۆزیکژەن مفایی ژێ دبینن، و هەر دیسان ستۆدیو و سیستەمێن دەنگی یێن پێشکەفتی ژی بۆ تۆمارکرنا سترانان هەنە».
