ستودیۆیه‌كا نوو دێ ل دهۆكێ هێته ڤه‌كرن
ئه‌ڤرۆ، رێوار محه‌مه‌د:
مۆزیكژه‌نێ گه‌نج (رۆژهات) كورێ هونه‌رمه‌ندێ ناڤدارێ پارێزگه‌ها دهۆكێ (محسن به‌ندی) یه د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ ئاشكرا كر كو نوكه ئه‌و دگه‌ل سترانبێژه‌كێ رۆژئاڤایێ كوردستانێ بناڤێ (عه‌لی خه‌مگین قامشلۆ) یێ به‌رهه‌ڤیان بۆ ڤه‌كرنا ستودیۆیه‌كا مودرێن بناڤێ (ئامه‌د) دكه‌ن و پێنگاڤێن باش بۆ ڤێ مه‌ره‌مێ هاڤێتینه و ل ده‌مه‌كێ نێزیك دێ هێته ڤه‌كرن و كه‌ڤیته د خزمه‌تا هه‌موو هونه‌رمه‌ندان دا و گۆت: “مه دڤێت ب رێیا ڤێ ستودیۆیێ خزمه‌تا هه‌موو هونه‌رمه‌ندان بكه‌ین ژ به‌ر كو مه مۆزیكژه‌نێن خودان شیان ل پارێزگه‌ها دهۆكێ هه‌نه و دشێن هه‌ڤڕكیا مۆزیكژه‌نێن بیانی بكه‌ن، به‌لێ مخابن ده‌زگه‌هێن مه یێن راگه‌هاندنێ وه‌كو پێدڤی گرنگیێ ناده‌نه مۆزیكژه‌نان ژ به‌ر ڤێ چه‌ندێ شیانێن وان ڤه‌شارتی ماینه”.
ناڤهاتی خویا كر كو ژ بلی كارێ خوه یێ مۆزیكێ كو ئامیرێ (ئۆرگێ) دژه‌نیت و به‌رده‌وام دچیته داواتان و پشكداریێ د گه‌ل سترانبێژان د به‌رنامێن ته‌له‌ڤزیۆنان دا دكه‌ت، نوكه سه‌رپه‌رشتیا كارێن هونه‌ری ژی ل ته‌له‌ڤزیۆنا (ئامه‌د) دكه‌ت و گۆت: “ل ده‌مه‌كێ نێزیك دێ پارچه مۆزیكه‌كا فلكلۆری ب شێوه‌یه‌كێ سه‌رده‌مانه تۆماركه‌م و كلیپ ژی كه‌م و پێشكێشی حزژێكه‌ر و گوهدارێن مۆزیكا ره‌سه‌نا كوردی كه‌م”.
