سربێ ژ خوە رەڤیایی
باڤێ نازێ
مەتینۆ ل مالێ، پشتی گۆتنا وی، ب دو تشتان دهاتە نیاسین، ب خوە مایین و بێ دەنگی. دیا وی دگۆت: «پشتی كو ئەو ژ رەفێ خوە ما وهاتە گرتن، ژبەر ئیسكەنجێ كورێ من نە ما یێ بەرێ یە.؟
ب راستی ژی، مەتینۆ ل مالێ ل جیێ هەری تەنگ كو ئەو ژی قۆرزیك بوو، دروونشت و ل ور ژی رێ ل بەر خوە تەنگتر دكر. ب روونشتنێ سەرێ خوە دخست ناڤ كابۆكێن خوە و لاشێ خوە ددا سەرهەڤ.
ئەو ل مالێ بینگ بوو و تەنێ چەند گۆتنێن وی هەبوون. ئەو ژی دەما ئەو داوەتی تاشتێ دكرن و دگۆت: «وەرێ تاشتێ« ئێدی ئەو ژی گۆتنا خوە « تاشتێ – تاشتێ« دگۆت و دهات سەرخوارنێ.
ب خوە فراڤین و شیڤا وی ژی ب هەمان شێوەیێ گۆتنان بوون:» فراڤین – فراڤین» و « شیڤ – شیڤ» و ژێ پێڤە بێ دەنگی.
لێ تەنێ جارەكێ پشتی ئاخڤتنا داییكێ ل سەر خوارنێ « حەجیكۆ هەڤژینا خوە یا خوەشك وندا كر و ما خوەلیسەرەكی ب تەنا خوە.»
پشتی ڤێ ئاخاڤتنێ، ئەو ل دیا خوە نەری و گۆتنێن وێ دوبارە كر:» حەجیكۆ هەڤژینا خوە یا خوەشك وندا كر و ما خوەلیسەرەكی ب تەنا خوە.»
دایێ ب متمایین لێ نەری، لێ هەر ئەو ب خوە ما و ب بێدەنگیا خوەرە.
ژ وێ رۆژێ و پێڤە، دەما دهاتە سەر خوارنێ ئەوی دگۆت:» حەجیكۆ هەڤژینا خوە یا خوەشك وندا كر و ما خوەلیسەرەكی ب تەنا خوە.»
ل مالێ چاوا فێری چەند گۆتنێن وی یێن پێشین ببوون، وەها ژی فێری چەند گۆتنێن وی یێن داوی ببون و ژێ پێڤە، مایینا ب خوەرە .
رۆژەكێ، دەما داییكێ خوەست كورێ خوە داوەتی تاشتێ بكە، ئەوی دیت كو ئەو نە ل جیێ خوە یە. ئەو ل هەر دەڤەرێ، ل مالێ ل گەریا لێ هەر ئەوێ ئەو نەدیت»
ب خوە، مەتینۆ، ب ئەلندێ رە، ژ مالێ دەركەت و بەرێ خوە دا كۆلانا سەرەكە ل باژاری. دڤێ ریا خوە دە، ئەوی جەلەبەك ژ خەلكێ دیت كو وان بازددان و ل یاركێ راهنەری ژ بۆ تەمەندرێژیێ ل ڤێ دونیایێ دكرن. و كەنگی ئەو ب وردە چوو، ئەوی جەلەبەك دن ژ خەلكێ كو بەرێ خوە ددان مزگەڤتێ، دیت . ڤێ قەفایێ ژی، دخوەست ل ئاخرەتێ ب بەهشتێ شاد ببن.
مەتینۆ هین ب رێ دە بوو، ئەوی جەلەبێ سییەمین ژ خەلكێ دیت كو وان ژی ل سەر مەزبەلا باژاری ل خوارنێ دگەریان، ژبەر برچیبوونێ.
دڤێ ریا خوە دە، جارا پێشین پشتی ئازادیا خوە ژ زیندانێ، ب دەنگەكە بلند چوو ڤان گۆتنان:» من ناسكر هوون كینن و ژ چ جەلەبان بوون، لێ وە ناسكر ئەز كی بووم وكی مە و ژ چ جەلەبێ مە؟»
