سروشتێ كوردستانێ دێ قارەمانیێ ب رەوشتر و هێزتر ئێخیت
پشتی ب دووماه هاتنا هەڤڕكیێن وەرزێ 2025ێ یا قارەمانییا ئیراقێ ئەوا ب چار قۆناغان بۆ ماوەیێ شەش مەهان بڕێڤە چووی، فدراسیۆنا پایسكلڤانێن ئیراقێ هەرچار ئاستێن پێشكەڤتی، لاوان، تازەپێگەهشتی و كچان بۆ ناڤ ڕێزێن هەلبژارتیێ ئیراقێ دەستنیشانكرن، خوە بەرهەڤكرن بۆ قارەمانییا عەرەبی ئەوا بڕیارە هەڤڕكیێن وێ ل باژێرێ سلێمانیێ یا هەرێما كوردستانێ ل دویێ هەتا 10ێ مەها چرییا ئێكێ یا بهێت ب پشكدارییا 10 وەلاتێن عەرەبی بهێتە كرن.
ل دووڤ لیستەیا ناڤێن پشكدار دگەل هەلبژارتیێ ئیراقێ، تارق سەعید وەكو ڕاهێنەر بۆ هەلبژارتیێ تازەپێگەهشتیێن ئیراقێ، دیسان هەرسێ یاریزانێن یانەیا دهۆكێ ل سەر ئاستێ لاوان، ئاڤەند هشیار فەریق، یوسڤ جیهاد و عیسا عەلی بۆ ناڤ ڕێزێن هەلبژارتیێ ئیراقێ هاتنە داخوازكرن، ژلایەكێ دووڤە دو یاریزانێن دی خەلكێ پارێزگەها دهۆكێ نە و یاریێ بۆ یانەیێن دەرڤەیی پارێزگەهێ دكەن ئەوژی ل سەر ئاستێ پێشكەڤتیان وەهبی سلیمان- یانەیا سیناعە یا بەغدایی و سەربەست عەبدوللا- یانەیا كۆیە یا هەولێری.
د داخویانیەكا رۆژنامەڤانی دا یێ ئیماراتی فەیسەل بن حەمید ئەلقاسم سەرۆكێ فدراسیۆنا عەرەبی یا پایسكلان گۆت: دهێتە پێشبینیكرن قارەمانییا وەرزێ ئەڤ سالە یا جودا بیت ژ یێن پێشتر، ژبەر هەبوونا هندەك خالان ژ وانا پشتی 40 سالێن ڤەقەتیانێ دوبارە ئیراق ڤەگەڕیا مێڤاندارییا قارەمانییێ، هەروەسان سرۆشتێ كوردستانێ دێ ب رەوشتر و هێزتر ئێخیت ژبەركو پێشتر پرانییا قارەمانیێن مە ل جهێن ڤەدەر و جادەیێن ڕاست بووینە، ئەڤچارە دێ كەڤیتە بەرانبەر چیا و نەهال و شرۆشتەكێ جوان.
ژلایێ خوەڤە تارق سەعید ڕاهێنەرێ هەلبژارتیێ ئیراقێ و یانەیا دهۆكێ گۆت: پێخوەشخالین دگەل پێنچ یاریزانان دناڤ ڕێزێن هەلبژارتیێ ئیراقێ داینە، ئەڤە نە جارا ئێكێ یە بەلكو زێدەتری 10 سالان، ل سەر ئاستێ تازەپێگەهشتی، لاوان و پێشكەڤتیان یاریزانێن پارێزگەهێ بەردەوام بووینە و دەستكەڤت ژی ئیناینە ل سەر ئاستێ عەرەبی و ئاسیا و نێڤدەولەتی.
هەروەسان گۆت: بۆ قارەمانییا عەرەبی ل دووڤ پلانا هاتییە دانان كەمپێن نافخوە و دەرڤە دهێنە دانان، مە باوەری ب شیانێن یاریزانێن خوە هەنە دێ ئاست و ئەنجامێن گەلەك باش دەستڤە ئینن، ڕاهێنانێن مە د بەردەوامن، یا دشیان دا بیت دێ هێتە كرن.
