سزایێن تیرۆرێ ب گۆرەیی قانوونێ
ئه‌ڤرۆ نيوز:
تیرۆر دھێتە روونکرن ل دووڤ بارودۆخێن وان جھێن ئەو تیرۆر لێ، قانوون دانەرێن کوردستانێ نێزیکی پێناسەیا دورست یا تیرۆرێ نەبوویە، لێ ل دووڤ ڤەکولینا سێ یا سالا ٢٠٠٦ێ قانوون دانەرێن کوردستانێ دیاردکەن کو تیرۆر بکارئینانەکا رێکخستیا توندۆتیژیێ یە یان گەفە یان پاڵدانە بۆ کارێ تیرۆرێ، ھینگێ سزایێ کاری دێ ل دووڤ قانوونا تیرۆرێ بیت، لێ ئەگەر بکارئینانا کاری نە یا رێکخستی بیت (ئانکو بکارئینانا نەرێکخستی) دێ کار ژ قانوونا تیرۆرێ دەردکەڤیت دێ کەڤتە ژێر بارێ قانوونا سزایێن عیراقی.
د. ئاری عارف ماموستایێ زانکۆیێ بۆ رۆژناما ئەڤرۆ دیارکر، قانوون دانەرێن عیراقی رابوون ب سنووردارکرنا تاوانان و دابەشکرنا وان ل دووڤ مەزنیا وان، مادە (٢) ژ قانوونا تیرۆرێ دبیژیت ھەکە کەسەک رابوو ب دامەزراندن و رێکخستنا کۆمەلەکێ (جماعە) یان رابوو ب کارگێریا وان و ئاراستەکرنا وان ب مەبەستا زۆرداریکرنێ ل سەر خەلکی و کوشتنا وان پتر ژ کەسەکی، بۆ نموونە ھەکە کەسەک رابیت ب خرابکرن یان پەقاندنا ترۆمبێلەکێ ل بارەکایێ پارتەکێ یان فەرمانگەھەکا میری. ماددە (٤) ژ ڤێ قانوونێ سزایێ وێ دگەھیتە زیندانیکرنا ھەرو ھەر ھەکە تیرۆرستەک ب ھاندنا کریارێن کرنا تاوانێن تیرۆرێ ب رێیا فلمان و بەلاڤکرنا وان ل ئەنترنێتێ رابیت.
ھەروەسا مامۆستایێ قانوونا تاوانێ گۆت: “ماددەیێ (٥) ژ ڤێ قانوونێ دبێژیت ھەرکەسەکی نیاز ب تاوانێن نوویێن تیرۆرێ ھەبیت سزایێ وی زیندانکرنا توندە بۆ ماوێ (٦) ھەیڤان ھەتا پێنچ سالانە وەکو ھەکە کەسەکی نیازکر ترۆمبێلەکێ ب پەقینیت ل جھەکێ پر مرۆڤ لێ وەنەکر، بەلێ ئەو کوردێن گەھشتینە رێکخستنا داعش وەکو مەلا شوانی ئەوێ بەردەوام گەفا دکەت کو دێ تاوانێن تیرۆری ل کوردستانێ کەت و ترۆمبێلان پەقینیت، دڤێت داواکارێ گشتی داوایێ ل سەر مەلا شوانی ل دادگەھا تایبەت تومار بکەت بۆ دەرکرنا بڕیارەکا پاشمەیی (حکم غیابی) ل سەر وی.
ل دووماھیێ د. ئاری خویاکر، مادەیێ (٨) ژ قانوونا تیرۆرێ دبێژیت ھەر کەسەک ئاگەھداریا دەستھەلاتێن تایبەت بکەت بەری تاوان بھێتەکرن، دێ ھێتە لێبوورین ژ تاوانێ (یعفی من الجریمە) بۆ نموونە ھەکە کەسەک گەھشتبیتە رێکخستنا داعش پاش پەشیمان بوو و رابوو ب ئاگەھدارکرنا دەستھەلاتان ب ھەبوونا تاوانەکا تیرۆری کو دێ ھێتەکرن ل کوردستانێ و نەھاتەکرن ئەو کەس دێ ھێتە لێبوورین ژ سزایی. بەلێ ھەکە ئەڤ کەسە رابوو ب ئاگەھدارکرنا دەستھەلاتان پشتی کرنا تاوانێ ب زانیاریێن ھەبوونا شانەیێن نڤستی یان ھەبوونا ھندەک تیرۆرستان، کارێ وی دێ ھێتە ھەژمارتن بیانوو (عزر) بۆ سڤککرنا سزایی، ھەکە سزایێ وی سێدارەدان بیت دێ بیتە زیندانیکرنا ھەروھەر و ھوسا.
