سزایێ بکارئینانا مادێن ھوشبەر یێ دروست نینە
ئەڤرۆ نیوز:
رێکخراوەکا دژی مادێن ھوشبەر ئاشکر دکەت کو بەردەوام وەلاتی ب تۆمەتا بکارئینان و بازرگانیکرن ب مادێن ھوشبەر دھێنە دەستەسەرکرن و ئاماژە بڤێ چەندێ ژی کر کو ل ھەرێما کوردستانێ ب قانوونا سەردەمێ رژێما بەرێ سزا بۆ ڤان کەسان ھاتیە دیارکرن و پێدڤیە قانوون بھێتە گۆھۆڕین، ژبەرکو دا سزایێ وان کەسێن بکاردئینن و بازرگانیێ دکەن جۆدابیت.
سەرمەند بەرزنجی، کارگێڕێ رێکخراوا رەوشنبیر و ھشیاریا دژی مادێن ھوشبەر بۆ رۆژناما ئەڤرۆ گۆت: بکارئینان و بازرگانیکرن ب مادێن ھوشبەر ل ھەرێما کوردستانێ یا بەردەوامە و بکر زێدەتر بوویە، بەلێ ھەتا نوکە ئامار بەردەستێ مە نینە ل دۆر ھژمارا وان کەسێن بارزگانیێ ب مادێن ھوشبەردکەن یان ژی بکارتینن، بەلکو تنێ مە زانیاری ھەنە کو رۆژانە دەزگەھێن ئەمنی وەلاتیان ب تۆمەتا بکارئینان و بارزگانیکرن ب مادێن ھوشبەر دەستەسەر دکەن و دھێنە سزادان، گۆتژی: ھەبوونا سنورەکێ درێژ دگەل عێراقێ وەکریە کو بارزگانی ب مادێن ھوشبەر ب ڤێ رێکێ بھێتەکرن، لێ بەھرا پتر ل کۆمارا ئیسلامیا ئیرانێ دھێتە ھەرێما کوردستانێ، دەربارەی وان کەسێن بازرگانیێ پێ دکەن و بکار دئینن، گورەی زانیاریێن مە ھەموو تەمەن و تەخ و توێژ تێدا ھەنە و نەشێم بێژم تنێ ھندەک کەسێن دەستنیشانکرینە.
سەرمەندی گۆتژی: قانوون یا لاواز و نەرم نینە ھەمبەر ڤان کەسێن ب ڤێ تۆمەتێ دھێنە گرتن، ئاریشەیا سەرەکی ئەڤەیە قانوون ب ئێک چاڤ بەرێ خوە ددەتە ڤان کەسێن ماددێن ھوشبەر بکاردئینن و یێن بازرگانیێ پێڤە دکەت، ئەڤەژی تشتەکێ ئاسایی نینە، چونکو ئەف قانوونە ھێشتا یا سەردەمێ رژێما بەرێ یە کار پێ دھێتەکرن و پێدڤیە سزایێ ڤان کەسێن بازرگانیێ دکەن و یێن بکار دئینن بھێنە جۆداکرن و ھەر ئێکی سزایێ خوە یێ تایبەت ھەبیت، ب تایبەتی بۆ ڤان کەسێن ئالۆدەبووینە ب مادێن ھوشبەر و پشتی سزادانێ نەخۆشخانەیێن تایبەت ھەبن بھێنە پاقژکرن ژ ئالۆدەبوونا مادێن ھوشبەر و وەکی کەسەکێ ئاسایی ڤەگەڕێن ناڤا جڤاکی، نابیت پشتی سزادانێ دوبارە ڤەگەڕێن و دەست ب کێشانێ بکەن، نوکە ل ھەرێما کوردستانێ ئەف ئاریشەیە ھەیە و دڤێت بھێتە چارەسەرکرن، نابیت ھەر بھێنە گرتن و دۆبارە ڤەگەڕێن سەر کارێ خوە.