سزایێ من
ژینێ رێكانی
ستێرێن عەسمانێ مە دشڕن
وەك سەرخۆشا
ل رێكا دهلنگڤن
شوین دەوسێن خوە
ل پێلێن خەمێن من دڤەرەنن.
ستێرێن عەسمانێ مە دشڕن
ب دەهمانێن رۆژێ و هەیڤێڤە
لۆپك و بەكرۆك
خوە ل رێكا وان ڤەددزن
هند بوونە كاروان كوژ
هند رێكا دزا دڤەوژێرن
خەمێن من تاریێ هنگاڤتن
تەڤ سترانێن بێ ئاواز ماین
ل رێكا بێرێ
همبێزەكا گەرم و كویڤی
ژ دلی دزیت
ژانێن بیرهاتنان
دەنگڤەدانا وان
ل نهالێن كەڤرێن بیرهاتن لێ بێ مەخەل ماین
ژ ڤان ستێرێن
ل دادگەهێ شەهدەزۆری ل كچینیا من كری
ژ نەفرەتێن كچینیا من
شەرمێ رویێ لێ داخكری
لەو وەسا بشڕیڤە
ژ دەهمەنێن رۆژێ و هەیڤێ ڤەنابن
ئەز نارینا پێلێن» زێی «مە
دەنگڤەدانا خەمێن فێهاتییا عەشقەكا
هەر رۆژ ب ساتۆرێن تیتالێن لاستیكی
ل دادگەهەكێ تاوانبارم
ل كۆلانا
ل مۆلا و بازار
ل پێش چاڤێن (..)
دەست دهێنە پاخلێن من
ڕانێن من ژ پەنجێن وان
خوین ژێ دزێت لێ دیسا ئەز تاوانبارم
گونەهكارم.
ستێرێن عەسمانێ مە دشڕن
بۆ شەهدەزۆریێ
دئامەد و دەست ل ژوورن.
ئەز ل حزوورا بیرهاتنا
دەنگڤەدانا هیڤی و عەشقەكا قنارەدای
ل سێریانێن باژێری
خەجۆكا سلیڤی مە
كۆڤانێن عەشقێ ددم بای.
