سعوودیە یا بەرھەڤە قەیرانا یەمەنێ چارە بکەت
ئەڤرۆ:
شاھی سعوودیێ مەلک سەلمان د داخۆیانیەکێ فەرمی دا راگەھاند کو سعوودیە بەرھەڤە مێھڤانداریێ ژ ئالیێن سیاسی یێن یەمەنێ بکەت دا کو ل سعوودیێ ب رێیا دانوستاندنان پرسێن خوە چارە بکەن و گۆت: (بەری نھا وەلاتێن کەنداڤی پشتەڤانیا خوە بۆ چارەکرنا قەیرانا یەمەنێ ب رێیا دانوستاندنان دیار کربوون، نھا ئەم ژی بەرھەڤین کو ھاریکاریا ئالیێن جودا جودا یێن یەمەنێ بکەین کو ل پایتەختێ وەلاتێ مە کۆم ببن و پرسێن خوە چارە بکەن و ئەم دێ ببینە ھاندەرەک باش دا قەیرانا یەمەنێ چارە ببیت).
ل ئالیێ دی مالپەرێ ئەلعەرەبیە ژی د راپۆرتەکێ دا دیار کر کو ھەفتیا بۆری سەرۆک کۆمارێ یەمەنێ مەنسور ھادی داخواز ژ شاھێ سعوودیێ کربوو کو بۆ چارەکرنا قەیرانا یەمەنێ ھاریکار بیت و ئەو داخوازیا سەرۆک کۆمارێ یەمەنێ ژ ئالیێ شاھێ سعوودیێ ڤە ھاتیە قەبوول کرن و ژ بەر ھندێ ژی شاە مەلک دیار کریە کو سعوودیە بەرھەڤە مێھڤانداریا ئالیێن جودا جودا یێن یەمەنێ بکەت دا پرسێن خوە چارە بکەن.
چاڤدێرێن سیاسی دیار دکەن کو یەمەن جیرانا سعوودیێ یە و مەترسیا ڤێ یەکێ ھەیە کو وەک عیراقێ بکەڤیتە دەستێ ئیرانێ و ژ بەر ھندێ ژی سعوودیە بزاڤەکا مەزن دکەت کو نەھێلیت تشتەکێ وەسا روو بدەت و شاھێ سعوودیێ ب پشتەڤانیا ئەمریکا دخوازیت چارەیەکێ بۆ قەیرانا یەمەنێ پەیدا بکەت دا دەستێ ئیرانێ ل وی وەلاتی کورت بکەت.
