سـالا نــوی یا خـواندنـێ
رەحیما بەرواری
ل دەستپێكا سالا نوی یاخواندنێ قوتابی هەست ب كەیف و خۆشیێ دكەن و ب حەز و ڤیان پێشوازیێ ل سالا نوی یا خواندنێ دكەن. ئەڤ دەستپێكە نە بتنێ بۆ چوونا قوتابخانێ یە یان دەم بۆراندن دگەل هەڤالان یان یاریكرنە، یان ژی روینشتنا ل سەر رەحلەی، بەلێ دێ بیتە دەرفەتەك بۆ قوتابیان كو پشێت بەرهنگاریا وێ ژیانا سەخت و دژوار بكەن بۆ دەسڤەئینانا ژیانەكا خۆش و ئارام.
قوتابخانە، مالا دووێ یاقوتابیانە و مامۆستا ژی هەر وەكو دەیك و باب و خویشك و برایێن وان یێن مەزنن، سالێ (9) هەیڤان دگەل ئێك دانە د ئێك قوتابخانە و د ئێك پۆل ڤە. مامۆستا نە بتنێ ب ئەرك و رۆلێ فێركرن و زانینێ ڕادبن، بەلكو وەك دەیك و باب سەرەدەریێ دگەل قوتابیان دكەن و هەر ئاریشەكا بۆ دروست دبیت، مامۆستا هەولا چارەسەریێ دكەت و بەردەوام شیرەتێن پڕ مفا لێ دكەن كو ئارمانج پێ گەهاندن و ئاڤاكرنا قوتابیانە. دیسا پشكداربوونا مامۆستا و رێڤەبەر و فەرمانبەرێن قوتابخانێ ل ئاهەنگ و خۆشی و نەخۆشیێن قوتابیان دبیتە پشتەڤانی و هاریكاری بۆ پێشڤەچوونا ئاستێ رەوشەنبیرییا قوتابیان.
پێدڤیە ل سەر قوتابییان رێزەكا مەزن ل مامۆستایێن خۆ بگرن و رێز ل هەڤالێن خۆ ژی بگرن و ئەركێن خۆ یێن رۆژانە یێن قوتابخانێ جێبەجێبكەن و خۆ ئامادەكەن بۆ فێربوونەكا نوی و پێشڤەبرنا رەوشتەكێ باشتر. دڤێت قوربانی بهێتەدان ژبەركو زانست و فێربوون ب سانەهی ناهێت وەك قوربانیدان ب دەم بۆراندنا بێ مفا یان یاریكرنا زێدە و دەركەفتنا بێ ڕامان ل گەل هەڤالان و خۆ مژویلكرنا ب بەرنامەیێن تەلەفزیۆنی و خۆ دویركرن ژ كارئینانا ئەنترنێتێ. سالا نوییا خواندنێ دڤێت پێنگاڤێن باشتر و جیاوازتر و رێكئیخستی بهێنە هاڤێتن بۆ پێشڤەچوونا زانین و زانستی و سەركەفتنا قوتابیان. هەر وەك گۆتنا پێغەمبەرێ مە سلاڤێن خۆدێ ل سەربن د فەرموودەكێ دا بێژیت (العلم نور والجهل ڤلام) یان ژی دبێژیت (اگلبو العلم من المهد إلی اللحد) «صدق رسول الله». هەروەسا ئامادەكرنا چالاكیێن هەمەرەنگ بۆ قوتابیان بهێنە ئامادەكرن، چونكی پشكداربوون د چالاكیێن قوتابخانێ دا زۆرا گرنگە ژبەركو پتر قوتابی دگەل ئێكودو كۆم دبن و دانوستاندنێ دا رەهوان دبن و فێر دبن كا چاوا هاریكاریا ئیكودو بكەن و بزانن كارێ كۆمەلایەتی چەندێ ب بهایە و گرنگە و باوەریی ب خۆبوونەكا ب هێز بۆ وان چێدبیت.
قوتابخانە دبیتە دەستپێك و هاریكار بۆ قوتابی كو هەر رۆژ لێ زانینا نوی و رەفتارێن نوی فێر ببیت. پێدڤیە سالا نوی ب دلەكێ پڕی هیڤی و ریەكێ پڕی خۆشی و ئیرادەكا ب هێز دەستپێ بكەین.
ل دوماهیێ دبێژم سالا خواندنا نوی نە بتنێ دەسپێكا وەرزێ خواندنێ یە، بەلكو ئاڤاكرنا ژیانەكا نوێ یا تژیە ژ زانین و زانست و رەوشت و هیڤیێن گەشە، و گەهەشتنا هیڤیان و خەونێن سەركەفتنێ پێدڤی ب پرسیاركرن و هەول و لێگەریانا بەردەوام یا بەرسڤان و ئیرادەكا ب هێزە. هیڤیخوازم ئەڤ سالا خواندنێ ببیتە دەرگەهێ زانین و زانست و پێشڤەچوونەكا بەرفرەهتر و پێشكەفتییانە.
