ســـهربـهخـۆیـی مـافـه. .. نـه دروشــمـه !!!
دیاركرنا چارهنڤیسێ وان ب رێكێن قانوونی و فهرمی مافهكێ رهوایێ ههر مللهتهكی یه كو دڤێت دگهل سهركردێن خوه یێن سیاسی دهستپێشخهر بن بوَ هاڤێتنا ئێكهم پێنگاڤ ب شیوهیهكێ پراكتیكی و بێ گیروبوون ئهگهر بڤێن ب مافێن خوه شاد بن و د ههمان دهم دا دئامادهبن بوَ ههر قوَربانیهكێ پێخهمهت گههشتن ب ئهوێ ئارمانجێ. نهك بتنێ مژوولی بلندكرنا هندهك دروشمێن رهنگا و رهنگ و بێ پلان و بهرنامه بن ل هندهك ههلكهفتا دا و ل هیڤیا وێ روژێ نهبن كو دوژمن و داگیركهر ئهوان ب مافێن وان شاد بكهن یان ئارمانجێن وان بجه بینن وهك ئهو دروشمێن بێ بنهما كو بدههان ساله دناڤا میدیایین عهرهبی دا دهێنه بلندكرن و خهملاندن و بوینه جهێ بێ زاریێ و پێترانكا ل دهف بینهر و گوهدارێ وان.
كورد وهك مهزنترین نهتهوێ بێ دهولهت و مهزنترین قوَربانی داینه پێخهمهت گههشتن ب ئارمانجا سهربهخوَیا ئێكجارهكی د نافڤ ئاخا وهلاتێ خوه دا ههرچهنده هندهك كهس و لایهن ههنه كو ئهڤی مافی ب تنێ ب دروشم دبین بوَ هندهك مهرامێن خوه یێن تهسك و بلا ههر بمینیت دروشم بهلێ دناف مێشكێ ئهوان بتنێ دا چنكو دهلیڤه ژ دهست وان دهركهفت. ئهڤروَ باشترین دهلیڤا میژوویی ژههموو لایهكی ڤه بوَ مللهتێ مه پهیدا بویه كو ب بهرههمێن ئهوان شوَڕهش و راپهرین و ژێههلی و نشێڤی و قوَربانیێن سهد سالێن بوری ب چاڤێ خوه ببینن برێكا ریفراندوَمهكا گشتی و ب شێوهیهكی قانوونی و ب چاڤدێریا نێڤ دهولهتی كو ئهڤه ماوهیهكێ درێژه بویه مژارا سهرهكی یا سهروَك بارزانی كو ب شێوهیهكێ روون و ئاشكرا كار ل سهر ئهڤێ پروسێسێ دكهت ب پشتهڤانیا گهلێ كوردستانێ و زوَربهی سهركردێن جیهانی ئهوێن دسیاسهتا حهكیمانهیا سهروَك بارزانی گههشتین. ژ لایهكێ دی ڤـه ئهڤروَ ژ ههر قوَناغهكا بوری زوَربهی ناوهندێن میدیایێن جیهانی بهردهوام دمژوولن ل سهر دروست كرن و بهلاڤكرنا راپورتێن جودا جودا ل دور سهربهخوَیا كوردستانێ و گرنگیا وێ كو دێ بیته فاكتهرهكێ بهێز بوَ سهقامگیریێ ل دهڤهرا روَژههلاتا ناڤین ئهوا تژی كێشه و گرفت و ئالوزی و نه سهقامگیر چنكو ئهزموونا ههرێما كوردستانێ د ڤان سالێن بوری دا نهبویه ههرهشه و گرفت بوَ چ وهلاتهكی ب تایبهتی وهلاتێن جیران بهلكو بهروڤاژی پێگههێ خوه یێ ئارام و سهقامگیر ژ ههموو لایهكی ڤه پاراستی یه و شیایه ئهڤێ پارچا عهردی د ناڤا دهوروبهرهكێ تژی كێشه و ئالوزی و تیروَرێ دا ب پارێزیت ههروهسا ئهو قههرهمانی و بهرگریا پێشمهرگێن كوردستانێ فاكتهرهكێ دی یێ ب هێزه بوَ گهلێ مه كو ههموو جیهان سهرسورمان كری چ ب ڤهگهراندنا دهڤهرێن كوردستانی و پاراستنا سنوورێن كوردستانی و پاراستنا گهلێ كوردستانێ ب ههموو تهخ و چینێن جودا جودا ڤه بێ جیوازی و بهرقرار كرنا ئێنماهیێ ل دهڤهرێ بهرامبهر مهزنترین دوژمنێ ڤی سهردهمی كو تیروَره ب ههموو شێوازێن خوه یێن درندانه ڤه.
ل دوماهیكێ دروست بوونا دهولهتا كوردستانێ بتنێ روودانهكا ساده و سڤك نابیت بهلكو پێنگاڤهكا دیروَكی یه و دێ گهلهك گوَڕانكاریان ل دووڤ خوڤه ئینیت و ژلایهكێ دی ڤه دێ ئاسویهكێ گهش ل دهف تهڤایا نهتهوا كورد و كوردستانی ل ههر جههكی پهیدا كهت و دێ بیته سهركهفتنا ههموو كوردستانیان نهخاسمه ل ههرسێ پارچێن دی یێن كوردستانێ و دێ بیته پالپشت و پشتهڤانێ ههموو لایهكی.
