سـەرۆك بـارزانـی فریادڕەسێ كـورد و كوردستانـێ یە
عـەمـەر هـەرگـوشی
سەرۆك بارزانی وەك خەمخۆر و پێشمەرگەكێ راست و دروستێ كورد و كوردستانێ، هەمی ژیانا خۆ یا تەرخانكری داكو چڕكەكێ زێدەتر د خزمەتا دۆزا رەوایا خەلكێ كوردستانێ دا بیت، ل هەر جهەكی كوردستانێ زۆرداریەك ل سەر كوردان هەبووبیت؛ ب گۆرەی شیان پێچێبوونا یێ د هەوارا وان چووی؛ هەمی هاریكاریێن بەردەست یێن پێشكێشكری.
ل دەستپێكا سەرهەلدانا ئالۆزیا د ناڤبەرا هەسەدێ و دەولەتا سووریا سەرۆك بارزانی یێ ل دویڤ چارەسەریا گەریا و هەمی شیانێن خۆ یێن مەزاختی دا بشێن چارەسەریێن گونجای و بۆ ڤان ئالۆزیان و شەڕ و ئاژاوا ڤەبینن یێن بووینە سەدەما شەهیدبوونا هژمارەكا زۆرا شەڕڤانان و خەلكێ سڤیل و ژدەستدانا خاكەكا زۆر كو ل بەردەستێ هێزێن هەسەدێ بوو.
ژ بۆ وێ چەندێ كو سنوورەك بۆ ڤان پێشێلكاریان بهێتە دانان كو هەنبەری گەلێ كوردستانێ دهێنەكرن و نەهێلن زۆرداری و تەعدا ل كوردان بهێتەكرن، ژ لایەكی ڤە د رێكا دەزگەهێ خێرخواز یێ بارزانیێ نەمر؛ هاریكاریێن مرۆڤی یێن ب فەر هنارتنە رۆژئاڤا و ئالیكاریەكا باشا گەلێ مە ل رۆژئاڤا بكەن خەلكەكی زۆر ل برسی بوونێ رزگار بكەن، سەرۆك بارزانی هەمی شیانێن خۆ بكارئینان د رێكێن دیپلۆماسی و جڤاكی ڤە كو بكارن رێكەفتنەكێ د ناڤبەرا هەسەدێ و ئەحمەد شەرعی دا بكەن و ئەو هەرەشەیێن ل سەر گەلێ مە نە هێلن و جارەكا دی گەلێ مە ژ كۆمكۆژی و ئەنفالەكا دی رزگار بكەن.
جەنابێ سەرۆك بارزانی ب لەز گەهشتە خزمەتا پاپایێ ڤاتیكانێ و داخوازا هاریكاریێ ژێ كر بۆ رۆژئاڤا؛ پایەدارێن مەزنێن ئەورۆپی و ئەمریكی هایداركرن كو پێدڤیە هاریكاریا گەلێ كورد ل رۆژئاڤا بكەن و ژ وێ زۆردایێ بپارێزن یاكو ل سەر گەلێ مە دهێتە مەشاندن.
جەنابێ سەرۆكێ هەرێمێ نێچیرڤان بارزانی هەر ل رۆژا ئێكێ ڤە خۆ ب خۆدانێ رۆژئاڤا زانی و بزاڤێن دیپلۆماسیێن مەزن كرن، كو زۆرداری ل كوردان نەهێتەكرن و ب هەمی رێكێن سیاسی و مرۆڤی هەولدان؛ چارەسەریا بۆ ڤان ئاڵۆزیا ڤەبینن، سوپاس بۆ خۆدێ كو هەولێن وان ئەنجامەكێ باش هەبوو كو كارین مەزلۆم عەبدی و ئەحمەد شەرعی ل سەرمێزەكێ كۆم بكەن و رێكەفتنەكا مێژوویی د ناڤبەرا خۆدا واژوو بكەن و دوماهیێ ب شەڕ و ئالۆزیان بینن و ڤێجارێ ژی گەلێ مە ژ جینۆسایدەكا چاڤەرێكری دەربازبكەن.
بۆ گەلێ رۆژئاڤا و هەمی كوردەكی دیاربوو كو خەمخۆر و گیانفیدایێن كوردستانێ كینە و هەتا چ ئاستەكی؛ جەنابێ سەرۆك بارزانی بێ جوداهی بارێ خەمێن كوردینێ ل پشتا خۆ كریە و خۆ ب بەرپرسیار دزانیت ب ئەركێ خۆ یێ كوردینیێ و مرۆڤایەتێ رابیت ل هەر جهەكی زۆرداری ل سەر كوردان هەبیت، ئەڤرۆ سەرۆك بارزانی یێ بوویە ئومێد و هیڤیا هەر كوردەكی كو خەونێ ب رزگاریێ و ئازادیێ ڤە دبینیت، یێ بوویە جهێ باوەریا هەمی خانەوادێن شەهیدان و زۆرلێكریێن كوردستانێ.
كاریگەریێن هاریكاریێن حوكمەتا هەرێمێ و گەلێ كوردستانی بۆ رۆژئاڤا گیانێ كوردایەتیێ و هزرا ئێكبوونا نەتەوا كورد و چارەنڤیسێ ئێكگرتنا گەلێ كوردستانی ب هێزتر لێكر و بۆ دۆست و دوژمنان دیاركەفت كو پارتی بێ جوداهی خەمخۆرا هەمی كوردان و هەمی خاكا كوردستانێ یە.