سـەرۆکـێ نوو یێ پارتـا کـۆماری چـاڤەرێی پشتەڤـانیا کـوردانە
ب، سه‌رجان مەحمود:
د کۆنگرێ ٣٨ێ یێ پارتا کۆماریا گەل دا کەمال کلچدار ئۆغلۆ نەشیا دەنگێ پرانیا ئەندامێن کۆنگرەی بدەستڤە بینیت و ب جهێ وی ئۆزگور ئۆزەل شیا سەرکەفتنەکا مەزن بدەستڤە بوو و وەکو سەرۆکێ نوو یێ جەهەپێ هاتە هەلبژارتن، سەرۆکێ نوو یێ جەهەپێ د ئاخڤتنا خوە دا دیار کر، ل تورکیا پرسا کوردی نەهاتیە چارەسەرکرن و ئەو دێ بۆ چارەسەرکرنا پرسا کوردی کار کەن.
پارتا کۆماریا گه‌ل (CHP) کۆنگرێ خوه 38ێ سازکر و د کۆنگرێ دا ئۆزگور ئۆزه‌ل ل هه‌مبه‌ر که‌مال کچلدار ئۆغلۆ سه‌رکه‌فتنه‌کا دیرۆکی بده‌ستڤە ئینا و بوو سه‌رۆکێ نوو یێ پارتا کۆماری و دهێته چاڤه‌رێ کرن کو د سیاسه‌تا پارتا کۆماری دا گوهۆرینێن مەزن بهێنه کرن.
ئۆزگور ئۆزه‌ل د ئاخڤتنا خوه یا پشتی سه‌رکەفتنێ دا سلاڤ ل باژێرێن کوردستانێ کر و راگه‌هاند کو ئه‌و سیاسه‌تا قه‌یومێ یا ده‌ستهه‌لاتێ قه‌بوول ناکەن و دڤێت سه‌لاحەدین ده‌میرتاش بله‌ز بهێته ئازادکرن و گۆت: (ئه‌ز سوپاسیا ئه‌ندامێن کۆنگرێ دکه‌م و بلا هه‌ر که‌س پشتراست بیت دێ بۆ دیمۆکراسیێ کار کەین و ژ ئه‌ڤرۆ پێڤه دێ ئاماده‌کاریێن هه‌لبژارتنێن باژێرڤانیان کەین).
ئۆزگور ئۆزه‌ل هه‌روه‌سا راگه‌هاند ژی کو دێ ل هه‌مبه‌ر سیاسه‌تا قه‌یومان یا ده‌ستهه‌لاتا تورکیا راوه‌ستن و هه‌ول ده‌ن گرتیێن وه‌ک سه‌لاحەدین ده‌میرتاش و گرتیێن سیاسی بهێنه ئازاد کرن و گۆت: (ئەز ل ڤێرێ سلاڤێن تایبەت بۆ خەلکێ مە ل دیاربەکرێ و وانێ دشینم، من دڤێت گەلێ مە یێ پشتراست بیت ئەم دێ پێکڤە دەست ب قۆناغەکا نوو کەین، ئەم دێ پێکڤە بۆ ئازادیێ و دیموکراسیێ کار کەین، پێدڤیا تورکیا ب قۆناغەکا نوو یا هەی، دەستهەلاتا نها نەشیایە پرسا کوردی ل تورکیا چارەسەر بکەت، وەکو سەرۆکێ نوو یێ جەهەپێ ئەز دێ ب هەموو شیانێن خوە بۆ ئازادی و دیموکراسیێ و چارەسەرکرنا پرسا کورد ل تورکیا کار کەم).
چاڤدێرێن سیاسی دیار دکەن، ئێک ژ ئەگەرێن سەرەکی یێن کو وەسا کر کلچدار ئۆغلۆ نەشیا پشتەڤانیا ئەندامێن کۆنگرەی بدەستڤە بینیت بۆ شکەستنا وی د هەلبژارتێن بۆری ڤەدگەریت، چونکی پشتی هەلبژارتنان و شکەستنا کلچدار ئۆغلۆیی پرانیا ئەندامێن سەرکردایەتیێ داخواز ژ وی کربوون دەست ژ دەستهەلاتێ بەردەت، لێ کلچدار ئۆغلۆ یێ رژد بوو دێ وەکو سەرۆکێ پارتا کۆماریا گەل ل سەر ئەرکێ خوە بەردەوام بیت، ژ بەر هندێ ژی د کۆنگرەی دا ئەندامێن کۆنگرێ پشتەڤانی لێ نەکرن.
هندەک ژ چاڤدێرێن سیاسی ل تورکیا ژی وەسا دبینن سیاسەتا نەرم یا سەرۆکێ نوو یێ جەهەپێ دشێت وەسا بکەت ل باژێرێن مەزن یێن تورکیا وەلاتیێن کورد پشتەڤانیێ ل بەربژارێن جەهەپێ بکەن، چونکی سالا بهێت ل تورکیا هەلبژارتنێن باژێرڤانیان هەنە و سەرکەفتنا پارتا کۆماریا گەل د هەلبژارتنێن باژێرڤانیان دا دشێت ببیتە ئەگەرێ دەستپێکرنا قۆناغەکا نوو ل تورکیا، ژ بۆ ڤێ یەکێ پشتەڤانیا وەلاتیێن کورد بۆ بەربژارێن جەهەپێ ل باژێرێن مەزن یێن تورکیا گرنگیەکا خوە یا تایبەت هەیە.
دەزگەهێن راگەهاندنا تورکیا ژی دیار دکەن، هەلبژارتنا ئۆزگور ئۆزه‌ل وەکو سەرۆکێ نوو یێ پارتا کۆماریا گەل دشێت ببیتە ئەگەرێ دەستپێکرنا قۆناغەکا نوو، چونکی پێدڤیا جەهەپێ ب گوهۆڕینێن مەزن ڤە هەیە، ئەو دشێت گوهۆڕینان بکەت، لێ ئەو یەک ژی ب ساناهی نابیت، چونکی دێ گەلەک ئاستەنگی بۆ دروست بن، لێ هەکە هەموو ئەندامێن سەرکردایەتیێ پشتەڤانیێ ل سیاسەتا وی بکەن، بێگومان دێ شێت جەهەپێ بکەتە پارتەکا گەلەک بهێز، چونکی پێدڤیا تورکیا ب ئۆپۆزسیۆنەکا بهێز یا هەی، کلچدار ئۆغلۆ نەشیا ببیتە جهێ باوەریا جەماوەرێ خوە.
