سكالا دژی یوسف ئیمام ب تنێ شەڕێ دەروونی بوو
ل چەند رۆژێن بۆری یوسف ئاری ئەلئیمام یاریزانێ ڕەڤەندا كورد و خەلكێ پارێزگەها دهۆكێ ل وەلاتێ سوید بەرانبەر سكالایا فیدراسیۆنا تەپا پێی یا كوێتێ بوو ئەوا ل فیدارسیۆنا جیهانی فیفایێ تۆماركری ب بۆهانا نەبوونا بەلگەیێن پێدڤی ژ فیدراسیۆیا سویدی بۆ یا ئیراقێ و یاریزانێ ناڤهاتی یاری بۆ هەلبژارتیێ سوید یێن ل بن 23ێ سالی دا یاری یا كری و ئەڤچەندە بەرۆڤاژی رێنمایێن فیفایێ نە.
ل دۆر ڤێ یەكێ پایز عەبدولحەمید بابێ یۆسفی ئیمام بۆ رۆژنامەیا ئەڤرۆ گۆت: ئەو دەمێ بۆ جارا ئێكێ یوسفی پەیوەندی ب هەلبژارتیێ لاوێن ئیراقێ كری مە بەلگەنامەیێن پێدڤی ژ فیدراسیۆنا وەلاتێ سوید بۆ فیفایێ بەرهەڤكر بوون و ئەوان ژلایێ خوەڤە بۆ فیدارسیۆنا ئیراقێ هنارتبوو، ئەوا وەلاتێ كوێت دژی یاریزانێ كورد دكەت بتنێ شەڕێ دەرۆنی بوو و نە زێدەتر، ئەز یێ ل وەلاتێ سوید و یوسف یاریزانێ مالمۆ یە لێ ب فەرمی نە یێ هەلبژارتیێ سویدە، ئەڤچا ئەوا وەلاتێ كوێتێ كر چو كارتیكرنێ ل سەر دەرۆنێ یوسف ئیمام ناكەت.
سكالایا فیدارسیۆنا تەپا پێی یا كویتێ هات بەری ئەنجامدانا یارییا خوە دگەل هەلبژارتیێ ئیراقێ ل سەر ئاستێ ئۆلمپی ل بن ژیێ 23ێ ژ چارچووڤێ ڤاڤارتنێن كۆما شەشێ و دەربازبوون بۆ قارەمانییا ئاسیا 2024ێ، ئەوا 43 وەلاتێن ئاسیا پشكداری تێدا كرین و هاتینە بەلاڤكرن ل سەر11 كۆمان، قارەمانێن هەر كۆمەكێ دگەل هەلبژارتیێ قەتەر وەكو مێڤاندار دێ دەربازبنە یاریێن دووماهیێ.