سكرتێرێ ئێكه‌تیا لاوان: پێدڤیه وه‌ك به‌رێ پێشینه‌یێن هه‌ڤژینیێ و خانووبه‌ران بهێنه مه‌زاختن
هه‌ولێر، قائید میرۆ
پشتی پێله‌كا كۆچا بكۆم یا گه‌نجان بۆ ده‌رڤه ده‌ستپێكری رێكخراوێن تایبه‌ت ب گه‌نجان چه‌ندین خال به‌رهه‌ڤكرینه و راده‌ستی لایه‌نێن په‌یوه‌ندیدار لهه‌رێما كوردستانێ كرینه، سكرتێرێ ئێكه‌تیا لاوانژی دبێژیت، پێدڤیه وه‌كی به‌رێ قه‌یرانێ ده‌لیڤا كاری و دامه‌زراندن بهێته ده‌ستپێكرن و پێشینه‌یێن هه‌ڤژینی و خانووبه‌رانژی بهێته ده‌ستپێكرن هه‌تا گه‌نج بشێن خۆ ئاڤا بكه‌ن.
مه‌یسه‌ر نهێلی، سكرتێرێ ئێكه‌تیا لاوێن دیموكراتا كوردستانێ بۆ رۆژناما ئه‌ڤرۆ دیاركر” پشتی پێله‌كا كۆچا گه‌نجان ده‌ستپێكری و هژماره‌كا زۆرا گه‌نجێن هه‌رێما كوردستانێ به‌ره‌ف وه‌لاتێن ده‌رڤه كۆچ كریه ب رێكێن مه‌ترسیدار، جڤاتا لاوێن كوردستانێ دانوستان لدۆر پرسا گه‌نجان بۆ ده‌رڤه كریه، كو ئه‌م غه‌مبارین ب چوونا وه‌لاتیان بۆ ده‌رڤه، چونكه گه‌نجێن مه خوین رشتیه بۆ ئازادكرن و ئاڤاكرنا كوردستانێ قوربانی داینه و هه‌رێما كوردستانێ وه‌لاتێ مه هه‌موویانه، چونكه مخابن كۆچا گه‌نجان ل ئه‌ڤێ ده‌ڤه‌را ئه‌م تێدا وه‌كی پرسه‌كا سیاسی دهێته بكارئینان و ئه‌م داخوازێ ل نه‌ته‌وێن ئێكگرتی دكه‌ین رێگریێ ل ئه‌ڤان بزاڤان بگرن یێن بۆ كۆچا نه قانوونی خه‌لكی هاندده‌ن، ب سیاسی كرنا كۆچێ دناڤبه‌را چه‌ند وه‌لاتان زیان ب خه‌لكێ مه گه‌هاندیه، دخوازین وه‌ك مافێ مرۆڤی به‌رێ خۆ بده‌ن ره‌وشا ئه‌ڤێ ده‌ڤه‌رێ و ره‌وشا كۆچبه‌ران، هه‌روه‌سا مه یاداشته‌ك دایه هه‌رسێ سه‌رۆكایه‌تیێن هه‌رێما كوردستانێ و تێدا چه‌ند خاله‌ك به‌رچاف كرینه، كو هه‌موو ئه‌و خال بۆ چاره‌سه‌ركرنا پرسا گه‌نجانن و دێ كاریگه‌ری هه‌بیت لسه‌ر كێمكرنا دیاردا كۆچا نه قانوونی، به‌رۆڤاژی كار لسه‌ر ئه‌ڤێ پرسێ كۆچا وه‌لاتیان نه‌هێته‌كرن دێ پاشه‌ڕۆژێ مه‌ترسیێن هێشتا مه‌زنتر په‌یدابن لسه‌ر كۆچا وه‌لاتیان.
سكرتێرێ ئێكه‌تیا لاوان ئاماژه‌كر” داخوازێ ل سه‌رۆكایه‌تیێن هه‌رێما كوردستانێ دكه‌ین لسه‌ر ئاستێن بلند لدۆر پرسا كۆچا گه‌نجان كۆمببن و ستراتیژه‌كێ داڕێژن بۆ ێگری كرن ل كۆچا گه‌نجان و چاره‌سه‌ری بۆ ئه‌ڤێ پرسێ بهێنه دیتن، لایه‌نێن سیاسی لهه‌رێما كوردستانێ كۆچا بكۆم یا گه‌نجان به‌رچاف وه‌ربگرن و كار ژبۆی ئاشتكرنا نیشتیمانی بهێته‌كرن، پێدڤیه نه‌ته‌وێن ئێكگرتی و رێكخراوێن تایبه‌ت ب مافێن مرۆڤی بزاڤێن خۆ بله‌زتر بكه‌ن بۆ چاره‌سه‌ركرنا پرسا كۆچا ب كۆم یا گه‌نجێن هه‌رێما كوردستانێ و وه‌كی مرۆڤ سه‌ره‌ده‌ری دگه‌لدا بهێته‌كرن، ئه‌ركێ حوكمه‌تا هه‌رێما كوردستانێ و مه داخوازكریه رێژه‌یه‌كا ده‌لیڤێن كاری ل كه‌رتێ تایبه‌ت و گشتی دابین بكه‌ت بۆ گه‌نجان، واته ده‌لیڤا كاری زۆر كاریگه‌ری دێ هه‌بیت لسه‌ر ته‌خا گه‌نجان، بتایبه‌تی مه‌رجداركرنا ئینانا كرێكار و كارمه‌ندێن بیانی و رێكخستنا كریا كاری، هه‌روه‌سا جهێ ئاكنجیبوونێ بۆ گه‌نجان بهێته دابین كرن ، هه‌روه‌سا ژلایێ دامه‌زراندنێ ده‌رچوویێن زانكۆ په‌یمانگه‌هان لسالا 2012ێ هه‌تا 2015 بهێنه دامه‌زراندن دگه‌ل دامه‌زراندنا مامۆستایێن گرێبه‌ست.
مه‌یسه‌ر نهێلێ گۆتژی” مخابن راگه‌هاندنێ و تۆڕێن جڤاكی رۆله‌كێ خراپ هه‌بوویه ل هاندنا گه‌نجان بۆ ده‌رڤه، چونكه ئه‌و بابه‌تێن دهێنه به‌لافكرن كاریگه‌ری هه‌بوویه گه‌نج به‌ره‌ف ده‌رڤه كۆچ بكه‌ن و نیشادا كچێن مۆدێل و هنده‌ك بابه‌تێن كو پێدڤی ناكه‌ت دناڤا وه‌لاتێ مه‌دا هه‌بن ژلایێ ده‌روونی و جڤاكی دبیته هاندان گه‌نج به‌ره‌ف جهه‌كێ دی كۆچ بكه‌ن، هه‌گه‌ر پێشینه‌یێن هه‌ڤژینی و خانووبه‌ران و قه‌رزێن بچووك بهێنه ده‌ستپێكرن وه‌كی به‌رێ قه‌یرانێ، ئه‌ڤه بێگومان دێ كاریگه‌ریێن باش هه‌بن بۆڤێ چه‌ندێ گه‌نجان ئومێده‌ك هه‌بیت خۆ ئاڤا بكه‌ن، هێلانا وه‌لات و كه‌س و كاران تشته‌كێ ب ساناهی نینه، چونكه چه‌ندین ساله خه‌لكێ مه قوربانی داینه و دڤێت رێك بۆ گه‌نجانژی بهێته خۆشكرن بشێن لهه‌رێما كوردستانێ بژین، هێزا گه‌نجان بۆ هه‌ر وه‌لاته‌كی گرنگیا خۆ هه‌یه نه‌خاسمه بۆ هه‌رێما كوردستانێ، ژبه‌ركو پاشه‌ڕۆژا هه‌ر ملله‌ته‌كینه.
