سكره‌كێ ئاڤێ ل گه‌ليێ زه‌نته دهێته دروست كرن؟
ده‌رباره‌ي گه‌ليێ زه‌نته كو گه‌ليه‌كێ ب مفاو گرنك دهێته ديتن ل ده‌ڤه‌رێ و لێ مخابني ڤه‌كو هه‌تا نها وه‌ك پێدڤي پووته پێنه‌هاتيه دان ژ لايێ جهێن په‌يوه‌ندي دار ڤه و له‌ورا رۆژناما ئه‌ڤرۆ ب فه‌ر زاني ديڤچوونه‌كێ ل دۆر ڤي گه‌لي بكه‌ت و راو بوچوونێن هاولاتيان و لايه‌نێن په‌يوه‌ندي دار ژي وه‌رگرتي يه و رێڤه‌به‌رێ رێك وپران ل ئاكرێ دبێژيت سكره‌ك د هێته دروست كرن.
گه‌ليێ زه‌نته ئێكه ژ وان جهێن گه‌شت و گوزاري كو نێزيكي 12 كم ژ باژێرێ ئاكرێ دووره و دووله‌كا كووره و دناڤبه‌را دو چيايان دايه و د نيڤه‌كا وێ دا رووبارێ ئاڤێ دچيت و رێيه‌كا سه‌ره‌كيه كو باژێري ئاكرێ ب ده‌ڤه‌را نه‌هلێ و بارزان ڤه گرێ دده‌ت، هه‌روه‌سا ل وه‌رزێ بوهارێ و هاڤينێ پتريا گه‌شياران قه‌ستا ڤي جهه‌ي دكه‌ن، چونكي جهه‌كێ گه‌شت و گوزاريه.
هه‌ژار عه‌زيز ل دۆر رێيا گه‌ليێ زه‌نته بۆ رۆژناما ئه‌ڤرۆ ديار كر، ژ به‌ر كو جهه‌كێ زۆرێ ته‌سكه ب تايبه‌تي رێيا وێ كو دكه‌ڤيته دناڤبه‌را چيا و رووبارێ ئاڤێ دا، گه‌له‌ك يا ب زه‌حمه‌ته ئه‌ڤ رێيه بهێته به‌رفره‌هكرن و ئه‌م وه‌ك خه‌لكێ قه‌زا ئاكرێ داخوازكه‌ين گرنكي ب جهێن هوسا بهێته دان و بهێنه سه‌خبێركرن.
زێبار جانگير ئێكه ژ وه‌لاتيێن ده‌ڤه‌را دينارتێ خۆيا كر، گه‌ليێ زه‌نته ئێكه ژ درێژترين گه‌لي ب سه‌ر قه‌زا ئاكرێ ڤه و دكه‌ڤێته د ناڤبه‌را قه‌زا ئاكرێ و ناحيا دينارتێ و ريێا وێ بۆ چه‌ند ده‌ڤه‌رێن دي ژي دهێته بكارئينان و هاتن و چوونێ ل سه‌ر دكه‌ن، هنده‌ك خزمه‌تگوزاري لێ هاتنه كرن، لێ ب مخابني ڤه وه‌ك پێدڤي نه‌هاتينه كرن، له‌ورا ئه‌م داخواز كه‌ين هنده‌ك جۆره خزمه‌تگوزاري لێ بهێنه كرن وه‌ك به‌رفره‌هكرنا رێيێ و دانانا رێنمايێن هاتن و چوونێ و دروستكرنا گۆره‌پانه‌كێ و گرنگي دان ب كه‌رتێ گه‌شت و گوزاري ژي، چونكو رۆژانه خه‌لك وه‌ك گه‌شتيار قه‌ستا ڤي گه‌لي دكه‌ن و پووته بهێته دان، دا خه‌لكێ ده‌ڤه‌رێ ژي بێ به‌هر نه‌بيت ژ ڤي گه‌لي.
عه‌باس زێباري وه‌ك وه‌لاتيه‌كێ ده‌ڤه‌رێ بۆ رۆژناما ئه‌ڤرۆ گۆت : گه‌ليێ زه‌نته ئانكو گه‌ليێ حه‌سه‌ن ئاڤا “ئێكه ژ جهێن گه‌له‌ك سه‌ير ل هه‌رێما كوردستانێ و هه‌ر كه‌سێ د ناڤ را بهێت و قه‌ستا ده‌ڤه‌را نه‌هلێ بكه‌ت، هينگي دێ هه‌ست ب هه‌بوونا وێ كه‌ت، ب راستي هندێ سه‌يره كو گه‌له‌ك گه‌شتياران ترس يا هه‌ي و نه‌وێرن د گه‌لي را تێدا بهێن، لێ مخابن گه‌له‌ك جهێن دي يێن خوش يێن پشتگوهـ خستين، خالا گرنك ئه‌وه هه‌ر چه‌نده دو سێ جهه‌كێن بچووك ژي هه‌نه وه‌ك سه‌يرانگه‌ه و دوكانان، لێ وه‌ك پێدڤي سه‌خبێري و چاڤدێري لێ نه‌هاتيه كرن و ناهێته كرن و چه‌ندين ساله ژي ئاڤ ل ناڤ ڤي گه‌لي دا دچيت بێ كو چو مفايه‌ك ژێ بهێته وه‌رگرتن و چو به‌نداڤ ژي لێ هاتبنه دروستكرن.
ناڤبري زێده‌تر گۆت: ئاڤا ڤي گه‌لي ژ دو لايان دهێت، ئێك ژ لايێ ده‌ڤه‌را نه‌هلێ و يا دي ژلايێ نقه‌بان ڤه دهێت و ئاريشه‌كا دي ژي ئه‌وه كو ل وه‌رزێ زڤستانێ ئاڤ به‌ستن دروست دبيت ل سه‌ر جادێ و دبيته جهێ نه‌رازيبوونا شوفێران ئه‌وێن دچنه ده‌وامێ ل ئاكرێ و يان وان كه‌سان كو كاره‌ك فه‌ر هه‌بيت ل ده‌رڤه‌ي ده‌ڤه‌رێ، له‌ورا ئه‌م هێڤيا چاره‌يه‌كێ ينه.
ئه‌ندازيار محه‌مه‌د سه‌عيد رێڤه‌به‌رێ رێك و پران ل قه‌زا ئاكرێ دبێژيت: رێيا گه‌ليێ زه‌نته كو دكه‌ڤێته دناڤبه‌را قه‌زا ئاكرێ و ده‌ڤه‌را دينارتێ و نه‌هلێ و چه‌ندێن ده‌ڤه‌رێن دي ژي كو ئه‌ڤ ريێه د پلانا مه دا بوو، به‌لێ ئه‌ڤ ريێه ژي نها پارچه‌ك ژ گه‌لي هه‌تا دگه‌هيته سه‌ر رێيا سه‌ره‌كي يا ئاكرێ قه‌نديل دهێت و دروستكرن و ب قۆناغا دووماهيێ دايه، ڤێ رێيێ ژي بۆ هندێ يه كو دێ سكره‌كێ ئاڤێ دهێته دروستكرن ل بنيا ڤي گه‌لي دا.
رێڤه‌به‌رێ رێك و پران ل قه‌زا ئاكرێ گۆت ژي: ل دۆر دروست كرنا وي سكري ژي دێ پره‌ك ژي هێته لادان، ده‌رباره‌ي به‌رفره‌هكرنا رێيا گه‌لێ زه‌نته ژي نه‌يا ب ساناهيه و دڤێت ل وي ده‌مي دا ئه‌ڤ رێيه بهێته گرتن هه‌تا ل دووماهيێ يا وێ رێيێ بهێت و بۆ ڤێ يه‌كێ ژي هه‌تا ئه‌ڤ رێيه بهێته دروستكرن، دبيت بهێته فره‌هكرن يان ژي ژ لايێ دي يێ گه‌لي سايده‌ك بهێته دروست كرن، لێ دروستكرنا ڤێ رێيێ ده‌مه‌كێ درێژ پێ دڤێت و پێگوهۆرێ ڤێ رێيێ ژي نينه و هه‌كه هه‌بيت ژي هه‌تا قۆناغا دووماهيێ كو مه رێيه‌كا دي يا هه‌ي ئه‌و ژي رێيا سه‌رێ سادا يه بۆ بجيل، لێ ئه‌ڤ رێيه ژي يا كه‌ڤنه و ژ كاركه‌ڤتيه و هه‌ر ئاريشه دێ دروست بن، له‌ورا مه پرۆژێن فه‌رتر يێن هه‌ي و يا ڤه‌ده‌ره ژي.
