سكرێن هه‌رێمێ شان نینن د ده‌مێ هشكه‌سالیێ دا ئاڤا پێدڤی دابین بكه‌ن
هه‌ولێر، قائید میرۆ:
به‌رپرسه‌كێ حوكمه‌تا هه‌رێما كوردستانێ ئاشكرا كر، هێشتا بارانێن پێدڤی د ئه‌ڤ ساله دا نه‌هاتینه و دبێژیت: ئه‌گه‌ر ره‌وش هوسا بیت، ئه‌ڤ ساله ژی ل ئیراق و هه‌رێما كوردستانێ هشكه‌سالی دێ هێته راگه‌هاندن و بتنێ ل سه‌ر بارانێن بهارێ مایه بڕیارا هشكه‌سالیێ بهێته‌دان.
ئه‌كره‌م ئه‌حمه‌د، رێڤه‌به‌رێ گشتیێ سكرێن هه‌رێما كوردستانێ بۆ رۆژناما ئه‌ڤرۆ دیار كر، ره‌وشا ئیراقێ ژلایێ هشكه‌سالیێ ڤه یا باش نینه و ل هه‌رێما كوردستانێ ژی كێمتر ژ سالا بۆری باران باریه و گۆت: “هه‌تا نوكه رێژه‌كا كێم یا ئاڤێ د هه‌ردو سكرێن مه‌زنێن دوكان و ده‌ربه‌ندیخان دا هێشتا مایه، له‌وڕا ژی مه‌ترسیا هشكه‌سالیێ ل ئیراق و هه‌رێما كوردستانێ یا هه‌ی، به‌لێ هێشتا ده‌م نه‌هاتیه بڕیارا دووماهیێ ل دۆر هشكه‌سالیێ بهێته‌دان، ئه‌گه‌ر ره‌وش یا هوسا بیت و ڤێ هه‌یڤێ و هه‌یڤا داهاتی بارانێن زۆر نه‌بارن ره‌وش یا باش نابیت”.
ئه‌كره‌م ئه‌حمه‌د گۆتژی: “سكرێن هه‌رێما كوردستانێ ئه‌و شیان نینن د ده‌مێ هشكه‌سالیێ دا ئاڤا پێدڤی بۆ هه‌موو هه‌رێما كوردستانێ دابین بكه‌ن و بتنێ دو سكرێن مه‌زن ل هه‌رێما كوردستانێ هه‌نه، ئه‌و ژی هه‌ردو ل سنوورێ پارێزگه‌ها سلێمانیێ نه، مه 17 سكرێن بچووك ژی هه‌نه هه‌تا راده‌یه‌كی دشێن ئاڤێ دابین بكه‌ن، ئه‌گه‌ر پلانا ستراتیژیا سكران نه‌هێته بجهئینان و ببیته هشكه‌سالی دێ زیانێن مه‌زن گه‌هنه هه‌رێما كوردستانێ”.
