سلاڤه‌كا ئۆمێددار
رێژین عه‌لى بامه‌رنى
گه‌ر ل دیرۆكێ بنێرین، دێ بینین هه‌رده‌م دوژمنێن كورد و كوردستانێ سیاسه‌تا كوردقڕانێ ل كوردستانێ وه‌كو به‌رنامه په‌یره‌وكریه، ئه‌ڤ عه‌رد و ئاخا ب پیت و به‌ره‌كه‌ت داگێركه‌ران ل سه‌ر خوه دابه‌شكریه ب چاڤه‌كێ دوژمنكارى به‌رێ خوه‌دایه خه‌لكێ وێ، تایبه‌ت ده‌ڤه‌رێن جودا جودا یێن كۆ ماكا شۆره‌شێن كوردى لێ سه‌رهه‌لداین وه‌كو ده‌ڤه‌را بارزان و گه‌له‌ك ده‌ڤه‌رێن دیتر، چنكو ئه‌ڤ ده‌ڤه‌ره هه‌ر ژ ده‌ستپێكا سه‌دێ بیستێ حه‌تا نها رۆله‌كێ سه‌ره‌كى هه‌بوویه د به‌لاڤكرن و هشیاركرنا نه‌ته‌واتى دا، هه‌ر ژ سه‌رده‌مێ شێخ عه‌بدولسه‌لامى، به‌ره‌ڤانى ژ ماف و خواستێن گه‌لێ كورد كرینه هه‌ر ل چاخێ ئۆسمانیان، شیاینه ده‌ڤه‌رێن كوردى ژ زولم و سته‌ما دوژمنان بپارێزن و ل گه‌ل وان دا كه‌فتینه شه‌ڕان هه‌تاكو سالا 1914بێ دادگه‌هكرن شێخ عه‌بدولسه‌لام سێداره داى، ئه‌ڤ به‌رپرسیاریه كه‌فتیه ستوویێ كورێ وى شێخ ئه‌حمه‌دى، ئه‌ڤ قاره‌مانه ژى ل دژى داگێركه‌رێن بیانى مینا وه‌لاتێ بریتانیا راوستیایه ژپێخه‌مه‌ت هندێ ده‌ڤه‌رین خوه بپارێزن هه‌تا سالا 1935 له‌شكرێ توركیا ب هه‌ڤكاریا هێزێن بیانى شێخ ئه‌حمه‌د ئێخسیركرى و دایه ده‌ست حوكمه‌تا عیراقێ و بۆ ژێریا عیراقێ دوورخستى، ل ڤێره راپه‌رینى بوو پێشه‌نگ و پیشه‌وا مه‌لا مسته‌فاى دمینت، ئێدى پشتى چه‌ند شه‌ڕ و پێكدانان حوكمه‌تا عیراقى و هێزین بیانى گه‌هشتنه وى راده‌ى كونه‌شێن كێشا كوردى چاره بكه‌ن، نه‌چاربوون په‌نا بره به‌ر دانوستاندنان ل گه‌ل مه‌لامسته‌فا بارزانى، لێ سه‌ره‌راى ڤان هه‌ولان حوكمه‌تا عیراقى سیاسه‌تا كورد قرانى په‌یره‌وكر كه‌فته گیانێ خه‌لكێ كوردستانێ ب ئاگر و ئاسنان و كوشتنا ب كۆم و سێداره‌دان بۆ ڤه‌كرنا تۆلا شكه‌ستنێن خوه، هه‌رده‌م كورد ب دوژمنێن سه‌ره‌كى یێن خوه داناینه ب درێژیا دیرۆكێ كوردان خوین رێتی یه، لێ ده‌ستكه‌فتێن مه‌زن بده‌ستڤه ئانینه، لێ مخابنى بۆ به‌رژه‌وندیا تاكه به‌رزان بووینه، خه‌لكه‌ك بێ ده‌ستهه‌لات خودێ شه‌هید ژێ بێ باربووینه، ئانكو هه‌ر ئه‌م بخوه دوژمنێن سه‌ركه‌فتنێن خوه بووینه، لێ ب هیچ رێیه‌كى ده‌ستبه‌ردارى خه‌ون هیڤیێن خوه نه‌بووینه، ئه‌ڤ گۆڕێن ب كۆم و ئه‌نفالێن ئێك ل دووڤ ئێك مه‌زنترین شاهد و گرۆڤه بووینه بۆ وێ ئێكێ بۆ دوژمنان دیارببیت رێزێن گه‌لێ مه‌پتر دبنه ئیك و ب ئیك هه‌لویستى به‌رامبه‌ر دوژمنان ئه‌ڤرۆ هه‌ر ئه‌و وه‌لاته‌نه یێ په‌یمانان ل گه‌ل كوردان نوو دكه‌ن، چنكو دزانن كورد خودان خه‌باتن، دیرۆكن، ریێه‌ك نه‌مرن، هه‌رده‌م دژى تیرۆرێ راوه‌ستاینه، هێد هێدى یێ خوه تێدگه‌هینن كو دۆزا كوردى گه‌هشتیه چ ئاست دێ بینن وه‌لاته‌ك ب ناڤێ كوردستان نێزیكه جهێ خوه ل سه‌ر نه‌خشێ جیهانێ بكه‌ت، ژنووى ناڤێ كوردان دئینن و دبێژن كێشه‌كا ل ده‌ڤ مه هه‌ى ب ناڤێ كێشا كوردى و دڤێت چاره‌سه‌ر بكه‌ین، ئه‌ڤرۆ سه‌ره‌دانا سه‌رۆكێ كوردان دبینن، ل سه‌رانسه‌رى جیهانێ چاوا دهێته پێشوازیكرن ژلایێ سه‌رۆكه‌ك مینا سه‌رۆكێ ئه‌مریكا ڤه، ئێدى كێشا كوردى ده‌ربازى سنۆرێن جیهانى بوویه ول هیڤیا ده‌ستك فت و بجهینانا خه‌ونێن خوه‌ینه ئه‌و خه‌ونێن رۆندك ژچاڤان زوها كرین، زارۆ بێ باب ل هه‌مبێزا دایكێ بێ بابكرین، رۆژێن ره‌ش، كاره‌ساتێن بێ وێنه، چاڤه‌ریكرن، خونێن هه‌ر شه‌ڤ چیرۆكه‌كا بێ وێنه ودووماهی هزاران خه‌ون ژێ چێكرین ئه‌و خه‌ونێن سڕێ برى ژ سه‌قه‌ما زفستانه‌كا ساڕ، لێ به‌رێ خوه‌دانا گۆریه‌كا گه‌ش ل كیلگه‌هه‌كا نه‌فتا سه‌رێ چیایی ژ به‌رێ خودانێن وێ ب هزاران خه‌ون و هیڤى بێ گه‌شكرین ئه‌ڤرۆ ب دانانا ئالایێ كوردى ل كۆچكا سپى و رۆناهى دایى جیهان پێ هشیاركرى.
