سلێمان ره‌مه‌زان: ده‌ستكه‌فتێ دهۆكێ ب ئێكگرتن هاته تۆماركرن
ئه‌ڤرۆ،
د دیداره‌كێ دا راهێنه‌رێ تیما ته‌پا پێی یا یانا دهۆك دیاركر ده‌ستكه‌فتێ تیما وان و ڤه‌گه‌ڕیان بۆ خولا پلا نایابا ئیراقێ ب ئێگكرتنا كۆم بوو، پشتی شیاین د یاریا ڤه‌بڕیا قۆناغا پله‌ی ئۆڤ دا ده‌ربازبووین بۆ پلا نایاب ب سه‌ركه‌فتین ل سه‌ر هه‌ردو یانێن ناسریه و ئه‌مانه‌ت به‌غدا بینن د یاریێن وان دا ئه‌وا ل باژێرێ به‌غدا هاتیه كرن.
زێده‌تر سلێمان ره‌مه‌زان بۆ رۆژناما ئه‌ڤرۆ گۆت: پێخوشحالین پشتی ڤه‌قه‌تیانه‌كا درێژ دۆباره یانا مه ڤه‌گه‌ڕیا پلا نایابا ئیراقێ ب سه‌رفه‌رازی ئه‌ڤچه‌نده ژی بۆ ئێكگرتنا كۆم یا كارگێریا یانێ، كادرێ راهێنانێ و هه‌موو یاریزانان ئه‌وێن ئامۆژگاریێن مه وه‌رگرتین و پشته‌ڤانیا جه‌ماوه‌رێ یانێ چو ئه‌وێن هاتینه به‌غدا وه‌فاداریا خوه دیاركری و به‌رده‌وام پشته‌ڤانی كرین هه‌تا دووماهی چڕكه یان ئه‌وێن ل دهۆكێ و پاركا نه‌وروز پشته‌ڤان بووین، پێنه‌ڤێت خه‌مخوریا كارگێریا یانێ كو هه‌ر ژ رۆژا ئێكێ بۆ دابینكرنا هه‌ر تشته‌كێ پێدڤی پێخه‌مه‌ت سه‌ركه‌فتنا كاروانێ تیمێ و گه‌هشتن بۆ ئارمانجا خوه ژ گرنترین خالێن ده‌ربازبوونا تیمێ بوون به‌ر ب نایابا ئیراقێ.
هه‌روه‌سان ناڤهاتی دیاركر وه‌كو راهێنه‌رێ پارێزگه‌هێ و خودان سه‌ربۆر و شاره‌زاهی دێ ب هه‌موو شیانێن خوه ل گه‌ل پشته‌ڤانیا كارگێریا یانێ بۆ وه‌رزێ بهێت یێ خولا ئیراقێ زلهێزیا دهۆكێ د هه‌ڤڕكیێن خولێ دا ڤه‌گه‌ڕینن و گۆت: ئه‌م رژدین به‌رده‌وامیێ بده‌ینه ئه‌نجام و ده‌ستكه‌فتێن خوه و دلێ جه‌ماوه‌رێ یانێ خۆشكه‌ین.
