سلێمان رەمەزان ب بیرەوەریێن خوەش دێ بزاڤێن سەركەڤتنا ئێكێ كەت و زاخۆ چاڤ ل سێ خالێن دینە
قەیس وەیس:
چاڤەڕێ دهێتە كرن ئەڤر دەست ب گەڕا سێیێ یا هەڤڕكیێن خولا ستێرێن ئیراقێ یا فوتبۆلێ ب ئەنجامدانا سێ یاریێن گرنگ، زاخۆ ل یاریگەها دهۆكێ دێ بزاڤێن سەركەڤتنێ كەت و نەوۆز ل بەغدایە، شەمبییا بهێت دهۆك و هەولێر دێ بەرانبەر یانەیێن بەغدا چەنكن.
زاخۆ دێ بزاڤێن سەركەڤتنا دویێ كەت
بڕیارە تیما یانەیا زاخۆ بۆ یارییا دویێ ل دووڤ ئێك یاریگەها یانەیا دهۆكێ بكەتە جهێ ئەنجامدانا یاریێن خوە یێن خولێ پشتی ئەڤرۆ دەمژمێر شەشێ ئێڤاری د ناڤ جەماوەرێ خوە دا مێڤاندارییا یانەیا دیالا بكەت، ئەوا ژبەر سەخبیركرنا یاریگەها خوە نەشیایە هاتییە دهۆكێ، كوڕێن خابووری ب مورالەكا بلند دێ هێنە دناڤ یاریگەهێ دا پشتی سەركەڤتنەكا گرنگ ل سەر یانەیا جەویە ئینایی 2-1 د حەفتییا بۆری دا، لێ ئەركێ وێ ب سانەهی نابیت بەرانبەر یانەیا دیالا ئەوا د دەمەكێ باش دەرباز دكەت ژ دو یاریێن بۆری دو سەركەڤتن ل سەر ئەمانەت بەغدا و نەجەف ئینای، زاخۆ ب سێ خالان رێزا حەفتێ دهێت و دیالا ب شەش خالان ڕێزا چارێ دهێت.
دهۆك ب سەرپەرشتییا كوڕێ باژێرێ خوە گەشبینە
ل شەمبییا بهێت تیما فوتبۆلا یانەیا دهۆك دێ دناڤ ئەرد و جەماوەرێ خوە دا مێڤاندارییا یانەیا كەرخ یا بەغدایی كەت ب سەرپەرشتییا ڕاهێنەرێ باژێرێ خوە و پێشتر سلێمان رەمەزان خودانێ ناسناڤێ كۆپا ئیراقێ، پشتی دوورئێخستنا ڕاهێنەرێ خوە یێ بەرازیلی سێرجیۆ ڤاراس ئەوێ د دو یاریێن بۆری دا نەشیایی سەركەڤتنان بۆ تیمێ بینت و ل ڕێزا 18ێ بێ خال ڕاوەستینت، ژلایێ خوەڤە یانەیا كەرخ ئەوا ژ دو یاریێن بۆری سەركەڤتن ل سەر هەولێرێ ئینایی و دگەل جەویە خوسارەت بووی دێ بزاڤێ كەت ببیتە مێڤانەكا گران و ب زەحمەت بۆ ئەلهۆیێن چیا ئەوێن گڤاشتنێن جەماوەری ل سەر هەیین پێخەمەت قەرەبوویا خالان.
هەولێر و نەورۆزێ یاریێن گرنگ هەنە
ژلایێ خوەڤە ئەڤرۆ یانەیا نەورۆز دێ ل یاریگەها شەعب یا نێڤدەولەتی بیتە مێڤانا یانەیا شورتە یا بەغدایی ئەوێن د دو یاریێن بۆریدا سەركەڤتی و خوسارەتییەك هەی، ژلایێ خوەڤە یانەیا شورتە دێ بزاڤێ كەت پشتی دهۆكێ یانەیا نەورۆزێ ژی بكەتە قوربانا خۆ و خوسارەت بكەت، ل شەمبییا بهێت دەمژمێر شەشێ ئێڤاری یانەیا هەولێر دێ ل یاریگەها زەورا بیتە مێڤانا یانەیا كارەبا یا بەغدایی، هەولێر د نوكەدا سەرێ لیستێ دهێت شەش خال كۆمكرینە دێ شەڕی بۆ سێ خالێن دی كەت پێخەمەت پاراستنا جهێ خوە.
ژ یاریێن دی یێن ڤێ حەفتیێ
ئەڤرۆ پێنج شەمبی نەفت – تەلەبە، سوبەهی ئەینی، نەفت میسان- ئەلغرف، ئەلقاسم- ئەمانەت بەغدا، مووسل- نەجەف، ل شەمبییا بهێت، جەوییە – مینا، ئەلگەرمە-.
شرۆڤەكارێ وەرزشی بۆچوونا خۆ هەبوو
لدۆر یاریێن دهۆك و زاخۆ وەحید رەشید شرۆڤەكارێ وەرزشی بۆ رۆژنامەیا ئەڤرۆ گۆت: پشتی دوورئێخستنا ڕاهێنەرێ خوە یێ بەرازیلی و دەستنیشانكرنا كاپتن سلێمان رەمەزان بێگۆمان دێ جوداهی د ئاست و پلانان دا دیاربیت تایبەت ژلایێ دەرۆنی ڤە، ژبەركو ڕاهێنەرێ نوو شارەزاهییەكا باش د خولا ئیراقێ دا یا هەیی و خودان دەستكەڤتە ل پار سال و سەرپەرشتییا پرانییا یاریزانێن نوكە كرییە، بدیتنا من شیانێن هەین تیمێ ڤەگەڕینتە سەركەڤتنان لێ ئەوژی پێدڤی ب دەمی هەیە هەروەكۆ رٍاهێنەرێ پیشتر ژی پێدڤی ب دەمی بوو، لێ وەكو هزر و پلان دیاربوو راهێنەرێ بەرازیلی دگەل خولا ئیراقێ نا گۆنجیت و بەلگەژی د دو یاریێن بۆریدا ئاست و ئەنجامێن تیمێ د خراب بوون، لەوما ژی هەرزوو كارگێریێ پێنگاڤا دوورئێخستنێ دانا و دەستنیشانكرنا سلێمانی ژی یا دروست بوو، یاری ل یاریگەها مەیە و دگەل یانەیەكێ یە ب سانەهی نابیت و دچەند هەلكەڤتان دهۆكێ نەشیا سەركەڤتنێ بینت، لێ سێ خالێن ڤێ یاریێ گەلەك گرنگن و هەرچەوابیت سەركەڤتنێ بینت ژبۆ ئاشتكرنا جەماوەری و ڤەگەریانا ئاستێ جاران.
ل دۆر یارییا زاخۆ شرۆڤەكارێ ناڤهاتی گۆت: یارییا وێ ژی ب سانەهی نابیت ئاست و ئەنجامێ یارییا دووماهیێ بەرانبەر جەوییە گەشبینیەك دایە جەماوەری كو دێ بەردەوامبن، ڕاهێنەرێ وان ژی شارەزایە و خودان هزر و پلانە هەرچەندە بۆ جارا ئێكێ یە هاتییە خولا ئیراقێ لێ دیارە پێزان و ئارمانجێن هەین، لێ هەرچەوابیت یاری بزەحمەتە بەرانبەر تیمەكێ دو سەركەڤتن هەین، لێ من باوەری هەیە زاخۆ دێ بەردەوامیێ دەتە پێشكەڤتنان.
ژلایەكێ دووڤە سەرۆكێن هەردو یانەیێن دهۆك و زاخۆ ، د. عەبدوللا جەلال و عەمار فەرهاد دۆپاتی ل سەر ڕاكرنا سزایێن فدراسیۆنا فوتبۆلا ئیراقێ ل سەر جەماوەرێن هەردو یانەیان ڕاكرینە و بڕیارە یاریێن گەڕا سێیێ یا خولێ ب بەرهەڤبوونا جەماوەری بیت.
