سماق و برنج و تەحینا ئاكرێ بۆ دەرڤەی وەلاتی دهێنە رەوانەكرن
رێڤەبەرێ چاندنێ ل قەزا ئاكرێ دیار كر: «برنج و سماق و تەحینا قەزا ئاكرێ ب ریێا كۆمپانیەكێ بۆ وەلاتیێن ئەورۆپی دهێتە رەوانەكرن، ب تایبەتی ژی بۆ وەلاتێ ئەلمانیا و دانیمارك «.
فازڵ مستەفا، رێڤەبەرێ چاندنێ ل قەزا ئاكرێ راگەهاند: «هەموو بەرهەمێ خۆمالی، ب تایبەتی ژی برنجێ كوردی یێ شەش مەهێ ئەڤ سالە ب ریێا كومپانیەكا خۆمالی دهێتە رەوانەكرن بۆ دەرڤەی وەلاتی، ئەڤە چەند سالن كومپانیی خۆ بەرهەمێ خۆمالی یێ جۆتیاران دكەنە خۆدان و ئەڤە بۆیە ئەگەر بەرهەمێ خۆمالی بەرەڤ زێدەبوونێ بچیت ئەڤ ل ئاكرێ بەرهەمێ برنجێ دگەهتە 10 هزار تەنان كومپانییەك گەلەك شێوەیەكا رێكوپێك دروست دكەت و رەوانەی دەرڤەی وەلاتی دكەت».
ئاشكرا كر: «بەرهەمێ سماق و تەحینا ئاكرێ ژی بۆ دەرڤەی وەلاتی دهێنە رەوانەكرن، گەلەك داخوازی ژ دەرڤەی وەلاتی ل سەر بەرهەمێ خۆمالی یێ ئاكرێ هەیە، ئەڤ سالە ژی پلان هاتیە دانان چەندێن جۆرێن دێ یێن بەرهەمی خۆمالی بۆ دەرڤەی وەلاتی بهێنە رەوانەكرن».
رزگار زەكەریا، رەزڤانەكێ دەڤەرا ئاكرێیە بۆ ئەڤرۆ گۆت: ئەم گەلەك گرنگیێ ب بەرهەمێن خومالی ددەین نەمازە چاندنا سماقێ كو بەرهەمەكێ خورسكیە و ژیارا گەلەك كەسان لسەر فروتنا وێ یە سالانە ل دەست پێكا مەها هەشت دەست ب چنینا وێ دكەین، ژبەركو گەلەك سماق دكەڤیتە دناڤ بازاری دا و ناچیتە دەرڤە ژی لەوما ژی ئەزران دبیت ئەڤ سالە گەلەك زێدەبوویە، لێ بەرهەمێ سماقێ هێشتا بهایێ وێ دیار نینە، بەلێ پێشبینی دهێتە كرن جوتیار ب بەرهەمێ خۆ دلخۆش و مفادارببن.
گۆتژی: دەسپێكا بوهارێ دەست ب چاندنا شتلێن سماقی دكەین و هەتا سێ سالان دگەهیتە بەری سالانە ژی كەزاخێ بۆ دكەین و دیسا ژی هند سالان خراب دبیت و نەخوشیەك بۆ دهێت ئەگەر چو نەخوشی بۆ نەهێن پشتی سێ سالان ئەم دەست ب چنینێ دكەین، دەڤەرا مە تایبەتمەند و ب ناڤ و بانگە بۆ سماقێ، ئەگەر بهێتە فروتن ب بهایەكێ باش هندەك مال هەنە كارێ وان سماق چنینە و چو كارێن دی ناكەن، ژ بەر كو دەڤەرا مە ئاخەكا هەوایەكێ باش هەیە بۆ چاندنا سماقێ.
