سندوقه‌ك دێ بۆ وان زارۆیێن نه‌خۆشیا په‌نجه‌شێرێ هه‌ی هێته دانان
ئەڤرۆ نیۆز،زنار تۆڤی:
ئه‌ڤرۆ رۆژا ئێکشەمبی 11/6/2016 فه‌رهاد ئه‌مین ئه‌ترووشی پارێزگه‌رێ دهوكێ ل گه‌ل هژماره‌كا ده‌وله‌مه‌ند و سه‌رمایه‌دار و به‌لێنده‌رێن پارێزگه‌ها دهوكێ كۆمبوو، دكۆمبوونێ دا كو نوونه‌رێ رێڤه‌به‌ریا گشتی یا ساخله‌میا پارێزگه‌ها دهوكێ و رێڤه‌به‌رێ سه‌نته‌رێ په‌نجه‌شێرا زارۆكان ل نه‌خۆشخانا هیڤی و رێڤه‌به‌رێ ئه‌وقافا دهوكێ و سه‌رۆكێ ژۆرا بازرگانی و به‌رپرسێ لقێ دهوك یێ به‌لێنده‌ران به‌رهه‌ڤ ببوون .
ل دەستپێکێ به‌رپرسێ سه‌نته‌رێ په‌نجه‌شێرا زاروكان كورتیه‌ك دا سه‌ر چاوانیا دامه‌زراندنا ڤی سه‌نته‌ری و ئه‌و پێنگاڤێن هاتینه هاڤێتن بۆ دانانا ڤی سه‌نته‌ری ل دهوكێ و دیاركر:كو ل سالا 2007 ێ هاتیه دامه‌زراندن و تا 2013 ێ حكومه‌تا هه‌رێمێ هه‌موو پێدڤیێن ڤی سه‌نته‌ری دابین دكرن لێ پشتی قه‌یرانا دارایی و نه‌بوونا بوودجێ كێماسی كه‌فتنه د سه‌نته‌ری و ده‌رمانێن سه‌نته‌ری دا و دیاركر نه‌خۆشترین سال بۆ سه‌نته‌ری سالا 2016 و 2017 ێ نه له‌وما داخاز كر كو پێدڤیه هاریكاری و پشته‌ڤانی ل ڤی سه‌نته‌ری بهێته كرن داكو خه‌لكه‌كێ هه‌ژار و ده‌ست كورت بهێته چاره‌سه‌ر كرن ژبه‌ر كو هه‌ر نه‌خۆشه‌ک پێدڤی ب زێده‌تر ژ حه‌فتی هزار دولارایه بۆ چاره‌كرنێ و دابینكرنا ده‌رمانێن پێدڤی.
ژلایێ خوەڤه پارێزگه‌رێ دهوكێ‌ده‌ست خوشی ل رێڤه‌به‌ریا گشتی یا ساخله‌میا دهوكێ كر بۆ وی كارێ ژ هه‌ژی بۆ خزمه‌تكرنا ڤان نه‌ساخان دکەن و سوپاسیا به‌رهه‌ڤبویا كر كو ل دووڤ گازیا وان هاتین بۆ پشته‌ڤانیكرنا نه‌خۆشێن ڤێ ئیشا گران و دیار كر كو ل هه‌موو دونیایێ ئه‌ڤ سندوقێن تایبه‌ت دهێنه دانان بۆ كۆمكرنا هاریكاریا بۆ ڤان ره‌نگه نه‌خۆشیان و داكوكی ل سه‌ر رێكخستنا ئالیه‌ته‌كا باش كر بۆ كۆمكرنا پاره‌كێ باش بۆ ڤان نه‌خوشان و پشته‌ڤانیا كارگێریا پارێزگه‌هێ بۆ ڤێ سندوقی دوپاتكر و به‌ری هه‌موو ب كوژمه‌كێ باش پشته‌ڤان بیت.
هه‌روه‌سا داخوازی ژ زانایێن ئاینی كر كو وه‌كو ئه‌ركه‌كێ ئاینی خه‌لكه‌كێ هانبده‌ن بۆ پشته‌ڤانیكرنا ڤی كارێ پیرۆز.
ژلایێ خوەڤه رێڤه‌به‌رێ ئه‌وقافا دهوكێ ئاماژه كره وێ چه‌ندێ كو پشته‌ڤانیكرنا ڤێ سندوقێ ئه‌ركه‌كێ ئاینی یه و خودێ دقورئانا پیروزدا ئاماژه كره هندێ كو ببیته ئه‌گه‌ر بو ساخبوونا كه‌سه‌كی هه‌روه‌كی ته هه‌موو مرۆڤ ساخكرین و گۆت ئه‌ڤ كاره ژ گه‌له‌ك كارێن دی فه‌رتره كو مرۆڤێن زه‌نگین خوە لێ بكه‌نه خودان،تایبه‌ت مالێ خودێ بۆ ڤان كارا بهێته مه‌زاختن،ل،دووڤدا به‌رهه‌ڤبویا بۆچوونێن خوە ل دوور چاوانیا دانانا سندوقا ل جهین تایبه‌ت بۆ كۆمكرنا هاریكاریێ بۆ نه‌خۆشێن زارۆ یێن توشی ئێشا په‌نجه‌شیرێ بووین دیارکرن.
ل سالا 2007 سه‌نته‌رێ په‌نجه‌شێرا زارۆكا ل نه‌خۆشخانا هیڤی هاتیه دانان و تا نوكه 86 كه‌سا ژبه‌ر ڤێ ئێشێ گیانێ خوە ژده‌ست دایه و 110 نه‌خۆش هاتینه چاره‌كرن و نوكه 110 نه‌خوشێن دی لبن چاره‌سه‌ریێ نه و پێدڤی ب چاره‌سه‌ریا به‌رده‌وام و چاڤدێریا نۆژدارا و ده‌رمانێن تایبه‌تن.
