سنێلەیێن ژییێ وان كێمتر ژ 18 سالیێ دهاتنە سێدارەدان ئەو بۆ من گەلەكا نەخووش بوو
ديدار، سالار محةمةد دؤسكى:
1-3
پێشمەرگە و زیندانیێ سیاسی، حسێن محەمەد عەلی دێرەشی ل سالا 1952 ل گوندێ دێرەشێ ل دەڤەرا بەرواری بالا ژدایك بوویە، ل سالا 1960 دەست ب خواندنا ئاینی ل بەر دەستێ فەقی و مەلا ل گوندێن (بەلیتێ، زێوكا شێخا، مرێبا، ئاكرێ) كریە، ل سالا 1970 دەست ژ خواندنێ بەردایە و هەتا 1975 ل گوندێ دێرەشێ بوویە، پاشی دەست ب كارێ ئازاد كریە، و ل ئادارا 1976ێ ل سەنتەرێ قەزا ئامێدیێ دەست ب رێكخستنێن نهێنی كر و بەردەوام بوویە هەتا هاتیە دەستەسەركرن.
پێشمەرگە و زیندانیێ سیاسی، حسێن محەمەد عەلی دێرەشی د دیدارەكێ دا بۆ رۆژناما ئەڤرۆ گۆت: هەڤالەك مە هەبوو بناڤێ (حەیدەر حاجی حەیدەر) یێ ئێسفكی بوو و (محەمەد صدیق هروری) هەر ئێك لژنەكێ بوو هەر دو كەسایەتیان رێكخستن دكر، ل گەل چەند هەڤالێن دی و پەیوەندی ب مەهاتەكرن، و كەسێ ئێكێ بووم ل سەنتەرێ ئامێدیێ بهێمە رێكخستن و (جەمال قەدشی) ل سەنتەرێ قەدشێ هاتە رێكخستن، و ئەو سەر ب (حەیدەر حاجی) ڤەبوو و دیسا (محەمەد صەدیقی) ژی هندەك رێكخستی ل ئامێدیێ هەبوون، بەلێ مە ئێكودو نەدنیاسی و هەتا نەهاتینە دەستەسەركرن مە ئێكودو نەدنیاسی، و دەمێ هاتیمە رێكخستن ل ئامێدسێ وەك بەرپرسێ رێكخراوێ هاتمە دەست نیشانكرن، و ناڤێ رێكخراوا مە (زۆزك) بوو، و هەڤالێن من نیاسین وەك بەرپرسێ رێكخراوێ (ئەحمەدێ بەگو، عەبدالرحمانێ باسك، ئیبراهیم تەیب رەزیكی، عبدالرحمان عەبدوقادر)، چەند هەڤالێن دی ژی بوون هەمی دبوونە بیست كەس و كارێ مەیێ رێكخستنێ پێنچ هەیڤان ڤەكێشا، و مە ئاگەه ژێ نەبوو كو تورا مەیا رێكخستنێ ئاشكرا بوویە، ل دهۆكێ هندەك كەس هاتبوونە گرتن و مە نەڤیا ب رەڤین و مە دگۆت دڤێت ئەم هندەك بمینن و بەرەوام بین، وی دەمی ئەم گەنج بووین و خوین گەرم بووین و زێدەتر مە رادگەهاند كو شۆرەش دێ دەست پێ كەت، و شۆرەشا بهێت ناڤەكێ نوی یەو رێكخستەكا پیلایی و كەسانێن رەوشەنبیر و زیرەك تێدا هەنە، و رەخنەگرتن ل شۆرەشا پێشتر هەبوون و بەر ب هندەك كارێن باشتر بچین و بەلاڤووك دهاتنە بەلاڤەكرن، و مە ددانا هەڤالان و هێشتا چ پێشمەرگە ل چ عەردان نەبوون، و بتنێ مە دیار كربوو كو شۆرەشێ دەست پێكر و چریسكا شۆرەشێ هەلدایە، و ئەم ئاگەهداربووین ل زێبارێ هندەك پەیدابوون وەك (سەعیدێ عەبێ، مەلا ئەحمەدێ باكرمانی، حەسەنێ بەرێسكی و محەمەدێ بەرێسكی) ئەڤان خوە رادەستی حوكمەتێ نەكر و تڤنگێن خوە هەلگرتن و مانە د چیایی دا، و هەر وی دەمی چ پەیوەندی ل گەل كەسەكێ نەبوو ژی، وی دەمی هەر كەسەكێ ژ خوە ترسیا با دا چیتە گەهیتە وان، و دا یێ پاراستی بیت و ئەف كومە هێدی هێدی زێدەبوو.
ل دور گرتنا خوە ژی ناڤبری گۆت: كارێ هەر دو لژنێن پارتی دیموكراتی كوردستان ئەوێن پێشتر من بەحس كری یێ بەردەوام بوو، و كەسەكێ ئاگەه ژ كەسەكێ نەبوو، و ئێك هەبوو یێ بەرنیاسە ل ئامێدی و بەرنیاس ب بوو ب هەڤالێ ئەمنێ، و دووڤدا چوو خوە كرە پێشمەرگە و هاتە كوشتن وی كەسی ئەم وەك رێكخستنێن نهێنی ئاشكراكرین، و دناڤا لژنا (محەمەد صەدیقی) دا بوو، گەلەك بزاڤكرن هەڤالێن وی بهێنە ئاشكرا كرن، چونكە دەست ل گەل ئەمنێ ژی هەبوو و دەنگوباس دگەهاندنە ئەمنێ، و گەلەك ناڤ دیار كربوون و لژنا مە ژی ئاشكرا كر، و ئەو ل گەل دو هەڤالێن وی یێن سەر ب لژنا دی ڤە رێككەفتن كر بوو، كو بچن ببنە پێشمەرگە و ئێك ژوانا برایێ وی رێكخستیێ من بوو، و ئەوان دگۆت دێ بێژینێ بلا بێژیتە بەرپرسێ خوەیێ ئێكێ پشتەڤانیا مە بكەت، دا بچین ببینە پێشمەرگە، و هاتنە نیك من و داخوازا نڤیسارەكێ كر وەك پشتەڤانی دا ب كەسانێن باش دناڤا پێشمەرگەی دا بهێنە نیاسین، و بهێنە وەرگرتن، و من پەیوەندی ب هەڤالێ خوەیێ قەدشێ كر، گۆت وەرە دێ نڤیسارەكێ چێكەین و بلند كەین و مە ئیمزا كر، كو هەڤالێن مە نە و رێكخستی نە و ئاشكرا بووینە و دێ بنە پێشمەرگە ، و هەر سێ كەس چوون دەمێ گەهشتینە زالگەها (دەشتولیكێ) ئەو دو كەسێن هەڤالێ دی ژ زالگەهێ دەربازبوون و چوون بوونە پێشمەرگە، و ئەو كەسێ دیێ پێشتر مە ئاماژە پێكری كو ل گەل ئەمنێ كار دكر ل ئامێدیێ ڤەگەریا، و هاتە ئەمنێ گوت ئەڤە بەلگەكێ فەرمی یە، و ئەف كەسە بەرپرسێن رێكخراوێن پارتی دیموكراتی كوردستانن ل ئامێدی و قەدشێ، و هەر دوێ رۆژا وی كاغەز رادەست كری، ل دهۆكێ كاك (حەیدەر) هاتە گرتن، ل ئامێدیێ ئەز هاتمە گرتن 22/8/1976، وی دەمی ل دوكانێ بووم و داخوازا ناڤێ من كر، گۆت ل گەل مە وەرە ئەمنێ و گۆت دێ نوكە ڤەگەری و هەتا نیڤا جادێ ئینام و رادەستی دو پولیسان كرم، دەستێن من گرێدان و برمە ئەمنێ من دیتن چەند هەڤالێن مە هاتینەگرتن، و ل ئامێدیێ ئەم نەقوتاندین و بتنێ گەفكرن هەبوو، و هاڤێتنە ژوورەكا دەست ئاڤێ ڤە و نێزیك دەمژمێرەكێ مامە شپێرڤە، و پتر ژ چار دەمژمێران ماینە وێرێ، و دووڤدا دەرخستم و رەوانەی بنگەهێ پولیسان كرین.
