سنەتکرنا ژنان ل ژ دەرڤەیی نەخۆشخانان دھێتە کرن و يا به‌رده‌وامه
ئەڤرۆ نیوز:
سنەتکرن ئەو دیاردا جیھانیا کو نھا وەکو توندوتیژی و ھەرەشە بەرامبەر ژنان دھێتە کرن ھێشتا ل کوردستانێ ھەیە. شارەزایێن جڤاکی و ئایینی ددەنە دیار کرن کو رێ ب سنەتکرنا ژنان د چ قانون و ئایین و جڤاکان دا نەھاتیە دان. دکتورەک ژی دیار دکەت کو سنەتکرنێ کارتێکرنێن مەزنێن ساخلەمیێ ل سەر ژیانا ژنان ھەنە.
تایبەتمەندێ نەشتەرگەریا گشتی د. عەدنان ئاکرەیی دیار کر کو چو حالەتێن سنەتکرنێ ل نەخوشخانان نەھاتینە کرن و ئەڤێن کو دھێنە کرن ژی ل دەرڤەیی نەخوشخانەیانە و بۆ ئەڤرۆ گۆت : ئەڤە زێدەتری 15 سالایە ئەز نوشدارم و ھەتا نھا من چ حالەتێن سنەتکرنێ نەدیتینە ب تایبەتی ل نەخوشخانەیان و من ژ چ نوشدارێن دن ژی گوھلێ نەبوویە، ژبەرکو ھەتا نھا چ حالەتێن سنەتکرنا ژنان نەھاتینە نەخوشخانان ھەکە خۆ چارەسەرکرنا برینا ژنەکا سنەتکری ژی بیت پشتی ھاتیە بریندار کرن ، و ئەڤە د دەمەکێ دایە کو زور جاران حالەتێن سنەتکرنا کوران ھاتینە نەخوشخانان ب تایبەتی
پشتی ھاتینە بریندار کرن.
د. عەدنان زێدەتر گۆت: سنەتکرن ژ ئالیێ زانستی ڤە ژێڤەکرنا چەرمێ ئەندامێ مێینە یێ ژنایە کو دبێژنێ clitoris کو بەرپرسە ژ چێکرنا خوشی و ھاتنا زەوقێ سێکسی بو ژنێ دەما کو ل گەل زەلامی جووت دبیت ، ئەڤجا ھەکە ژن ھاتە سنەتکرن نکاریت بگەھیتە خوشیا سێکسی، ژلایەکێ دن ڤە ژن نەشێت وەکو پێدڤی خزمەتا سێکس و دەروونی یا زەلامێن خوە بکەن ل پاشەرۆژێ ، و بەردەوام د حالەتێن دەروونی دا دژین ، کو ئەڤ یەک ژی مەزنترین خالە کو ببیتە سەدەما وێ یەکێ ئاریشەیێن خێزانی دناڤبەرا ھەردو ھەڤژینان درۆست ببن، ژبەرکو بەردەوام ھەردو دێ گومان و بھانەیان ل سەر ھەڤدو کەن ، و ئەڤ کارتێکرنە پتر ل سەر ژنێ دیار دبیت و رەنگە ئاریشە بگەھیتە وی رادەی کو زەلام ھزرێ د ئینانا ژنەکا دن دا بکەت ، و ھندەک جاران سنەتکرن بو ژنێ دبیتە بریارا شوو نەکرنێ و ھندەک جاران ژی رەنگە ژێکڤەبوون درۆست ببیت.
سێوە فاتح وەکو راھێنەرا گەشەپێدانا مروڤی تایبەتی د وارێ ژنان دا دبێژیت: سنەتکرن جورەکە ژ جورێن توندوتیژیا دژی ژنان، ژبەرکو بێی رەزامەندیا کچ و ژنان گرنگترین و بھاترین پارچەیا لەشێ ژنان دھێتە ژێڤەکرن و سەرەرای ھەموو بزاڤێن جھێن شولەژێ بەلێ د ھەمان دەم دا نھا سنەتکرن ل کوردستانێ ھەیە و پێدڤی یە ئەڤ دیاردەیە ب ئێکجاری بھێتە بنبرکرن.
د. عەدنان ئاکرەیی ل بارا زیانێن سنەتکرنا ژنان گۆت : سنەتکرن شەھواتێن کچان کێم دکەت و کچا سنەتکری ناگەھیتە خوشیا سێکسی و دێ توشی ھەودانێن رەحم و میزلدانێ و خوون بەربوونێ بیت و دێ ئەندامێ مێنیە یێ وێ بەردەوام ئێشیت و وەرمیێت ب تایبەتی د دەما دچیتە دەست نڤێژا زراڤ ، دیسان ل دەما سورا ھەیڤانە دێ ئێشێن وێ پتر بن و ھەکە شوو کر ژی دەما زارویەک ھەبیت دێ گەلەک ژانێن وێ گران بن و دایکبوونا زارۆیان بو وێ زور زەحمەترە ژ ژنێن دن و توشی ئاریشەیێن سێکسی دبیت ل گەل زەلامێ خوە ب تایبەتی دەما ئەندامێ نێرینە و مێینە دچنە دناڤ ئێک دا و تشتێ گرنگ ئەوە کو سنەتکرنێ چ مەترسی ل سەر پەردەیا کچینیێ نینە و ئەڤ نیشانێن سنەتکرنێ ل جەم پرانیا سنەتکریان درۆست دبن.
ماموستایێ ئایینی ھەر ل سەر تەوەری جیھاد مستەفا دیار کر سنەتکرنا ژنان دابونەریتە نەک شەرعە و گۆت : د کەڤن دا ئاکنجیێن دەڤەرێن گەرم وەسا ھزر دکر کو کەش و ھەوایێ گەرم کارتێکرنێ ل سەر ژنان دکەت کو شەھواتێن وان زور دبن و کریارێن نە رەوا ل پەی درۆست دبن، ئەڤجا دا کو شەھواتێن وان پیچەکێ بھێنە خوار دھاتن سنەتکرن ، و بھانەیا وان کەسانێن کو دبێژن سنەتکرن درۆستە دزڤریت بو وێ ئایەتا قورئانێ دەما کو دبێژیت ” فطرة الله التي فطر الناس عليها ” ، و فەرموودا پێغەمبەری لسەر ئایەتا بوری دبێژیت ” الفطرة خمس أو خمس من الفطرة الختان والاستحداد ونتف الإبط وقص الشارب و تقليم الأظافر ” بەلێ ئەڤ ھەردو ئایەت و فەرموودە دەربرینێ ژ وێ یەکێ ناکەن کو ژن بھێتە سنەتکرن.
ماموستایێ ئایینی زێدەتر گۆت : رەنگە مەرەما ئایینی بو سنەتکرنا ژنان ئەو بیت کو ئێک ژ پێنج سالوخەتێن مرۆڤان ب گشتی و ژنان ب تایبەتی بپارێزیت ئەوە کو ” ئەقل ، نفش، ئایین ، سامان و دەروونە ” ، بەلێ بێی کو ژن بھێتە سنەتکرن ئەو دکاریت ئەڤان ھەر پێنج سالوخەتان ب پارێزیت ب تایبەتی د رێیا ئاینێ ئیسلامێ دا، و ببیتە ژنەکا نموونەیا رەوشت بەرز و دەھمەن پاکیێ، و بتنێ ھزرا وێ ل سەر زەلامەکێ بیت و ببیتە ھەڤژینا ئێک زەلام و خێزانەکا بەختەوەر و دلسووز و راستگو ئاڤا بکەت.
