سه‌د گۆتن گوری كریاره‌كێ بن!!
ئه‌ڤ كاودانێن ب سه‌ر جیهانێ دا هاتین ب گشتی و هه‌رێما كوردستانێ ب تایبه‌تی كه‌س ژ مه نینه باجا ڤی بارودۆخی نه‌دایی، لێ كه‌سێ هه‌ره سه‌ره‌كی چینا قوتابیان بوویه ل سنۆرێ پارێزگه‌ها دهۆكێ ئه‌و ژی ده‌مه‌كێ زۆره پرۆسا خواندنێ هاتیه راوستاندن، لێ یا ژ ڤێ هه‌میێ گرنگتر و من دڤێت ئاماژێ پێ بده‌م ئه‌و ژی پاراستنا ساخله‌میا قوتابیانه كو ژ هه‌ر تشته‌كی گرنگتره چونكو قوتابیێ ئه‌ڤرۆ شه‌مالك و پاشه‌رۆژا ملله‌تێ مه‌نه، خۆشبه‌ختانه ب هاریكاریا حوكمه‌تا هه‌رێما كوردستانێ پشتی چه‌ند كه‌مپه‌ك هاتینه دروستكرن و ده‌ست ب ڤه‌گوهاستنا ڤان ئاواره‌یان هاتیه كرن بۆ ڤان كه‌مپان داكو قوتابخانه بهێنه ڤالاكرن و ده‌ست ب پرۆسا خواندنێ بێته‌كرن ب راستی ئه‌ڤه جهێ ده‌ستخۆشیێ یه بۆ هه‌ر لایه‌نه‌كێ هه‌ڤكار د ڤی ئه‌ركێ پیرۆز دا، لێ تشتێ من دڤیت ئه‌ز ئاماژێ پێ بده‌م ئه‌وه به‌ری چه‌ندین رۆژان چه‌ندین كۆمبوونێن ل سه‌ر ئاستێ بلند د ناڤ به‌را سه‌رۆكێ حوكمه‌تێ و وه‌زیرێ په‌روه‌ردێ ژ لایه‌كیڤه، ژ لایه‌كێ دیڤه وه‌زیرێ په‌روه‌ردێ و رێڤه‌به‌رێ گشتی و رێڤه‌به‌رێن قه‌زایان ل پارێزگه‌ها دهۆكێ چه‌ندین كۆمبوون هاتنه‌كرن، ب راستی مه هزر دكر دێ ڤان قوتابخانان ل سه‌ر و ژنوو نووژه‌نكه‌ن، لێ وه‌سا نه ده‌ركه‌ت و ب تنێ دو سه‌د هه‌تا سێ سه‌د هزار دیناران هاتنه خه‌رجكرن بۆ پاقژكرن ڤان قوتابخانان ب راستی بۆ من یا سه‌یر بی قوتابخانه‌ك نێزیكی دو هزار مترێن چارگۆشه و پتر و ب ڤی ره‌نگێ هاتینه تێكدان ژلایێ ئاوارانڤه نزانم دێ چاوا ب دو سه‌د هزار دیناران ئه‌ڤ قوتابخانه ئینه پاقژكرن، ب دیتنا من هه‌كه مرۆڤی خانیه‌كێ دو سه‌د متری هه‌بیت و بڤێت پاقژ بكه‌ت ب ملیۆن دیناران وه‌كو پێدڤی ناهێته پاقژكرن ئه‌رێ دێ چاوا ئه‌ڤ قوتابخانه ئێته پاقژكرن به‌رسڤ بلا بۆ هه‌وه بیت. ل دووڤ راسپاردێن په‌روه‌ردێ چه‌ندین لژنه هاتینه پێكئینان د ناڤا قوتابخانان دا ژ لایێ رێڤه‌به‌رێ قوتابخانێ و مامۆستا و سه‌میانێن قوتابیانڤه ژبۆ ڤه‌دیتنا وان زیان و كێماسێن قوتابخانێ كه‌فتین، لێ ب دیتنا من هه‌می ده‌مبۆراندن بوویه و نه زێده‌تر وه‌كی مه گوه لێ بوویه دگۆتن هه‌تا كو نه‌ئیته نووژه‌نككرن ژلایێ (بۆیاغكرن، شووشتن ب شوه‌كێ گشتی، نووژه‌نكرنا ده‌رگه‌ه و په‌نجه‌ران، ئه‌لكتریك، جهێن ده‌ست ئاڤێ.. . هتد) ده‌وام لێ ناهێته كرن، لێ نوكه رێڤه‌به‌رێ گشتی یێ په‌روه‌ردا دهۆكێ گۆت: ده‌ه ده‌فته‌رێن دۆلاری بۆ مه یێن هاتین ژ لایه‌كیڤه ئه‌ڤه جهێ دلخوه‌شیێ یه، لێ ژ وان ده‌ه ده‌فته‌ران تنێ ب گۆژمێ دو سه‌د هه‌تا سێ سه‌د هزاران هاتنه خه‌رجكرن، ئه‌رێ ما ئه‌ڤه یا به‌رئاقله ب ڤی گۆژمێ كێم ئه‌ڤ قوتابخانه بهێنه پاقژكرن!؟ وه‌كی ئه‌ز دزانم دبێژن ب تنێ دێ شوون و دێ ده‌وامێ كه‌ین، لێ ب دیتنا من ئه‌ڤ شووشته‌نه بتنێ به‌س نینه پێدڤیه پتر كار ل سه‌ر وان كێموكاسی و تایبه‌ت ژ لایێ پاقژیێ ڤه بهێته‌كرن داكو گیانێ قوتابیان و مامۆستایان ژ لایێ ساخله‌میێ ڤه بهێته پاراستن، هیڤیدارم ژ رێڤه‌به‌ریا گشتی یا ساخله‌میا پارێزگه‌ها دهۆكێ بهێته ده‌نگ و دووڤچوونا ڤان قوتابخانان بكه‌ن وه‌كو لژنه‌كا تایبه‌تمه‌ند بریارێ ل سه‌ر بده‌ن كا ئه‌رێ ئه‌ڤ قوتابخانه ژ لایێ پاقژیێ ڤه پا به‌رهه‌ڤه بۆ پرۆسا خواندنێ لێ بهێته ئه‌نجامدام! ئه‌ز باوه‌رم دێ رێژه‌كا زۆر ژ وان قوتابخانێن هاتینه پاقژكرن ب ده‌ست و تلێن مامۆستا و رێڤه‌به‌رانڤه دێ هێنه (ره‌فزكرن) و ناهێلن ده‌وام لێ بهێته‌كرن ب ڤی ره‌نگێ هاتینه شووشتن، چونكو وه‌كو پێدڤی نه‌بوویه!! ئه‌رێ ما حوكمه‌ت و وه‌زاره‌تا په‌روه‌ردێ و پارێزگه‌ه و ئه‌ڤ هه‌می رێكخراویێن ناڤخوه‌یی و بیانی.. . هتد، ئه‌ڤه بوویه به‌رهه‌مێ وێ ب تنێ ئه‌ڤ گۆژمێ كێم كو ب تنێ قوتابخانه پێ نه‌هێنه پاقژكرن بۆ من جهێ حێبه‌تیێ!؟ چونكو ئه‌و دوهن و بێهنا نه‌خوه‌ش و ئه‌و پیساتی هه‌ر مایه ب كاشی و دیوارانڤه و ئه‌ڤ كاره پێدڤی پتر ده‌می و دراڤی هه‌یه، به‌لگه ژی وینێن هوون دبینن، ئه‌ڤه پشتی قوتابخانه هاتیه پاقژكرن ب گۆژمه‌كێ زۆرێ كێم و ب ده‌ستێن رێڤه‌به‌ر و مامۆستایێن قوتابخانێ، د ده‌مه‌كیدا چه‌ندین رێكخراویێن ناڤخوه‌یی و بیانی و رێكخراویێن خێرخوازی و تیمێن ساخله‌مێ دهاتن سه‌ره‌دانان ڤان قوتابخانا دكرن لێ نزانم پشتی ده‌مێ پراكتیكی هاتی ئه‌ڤ جوامێره هه‌می كیڤه‌چوون، به‌س بۆ من دیاربوو تنێ مه‌سه‌لێن راگه‌هاندنێ بووینه و گۆتن و بێ كریار، گۆتنه‌كا كوردی یا هه‌ی دبێژیت (هزار گۆتن گوری كریاره‌كێ بن)، ل دووماهیێ ئه‌ز پێشنیاز دكه‌م ژ رێڤه‌به‌ریا ساخله‌میا پارێزگه‌ها دهۆكێ كو چاڤدێریه‌كا باش ل سه‌ر پاراستنا ساخله‌میێ بكه‌ن ل قوتابخانان چونكو پاراستنا ساخله‌میا قوتابیان گرنگتره ژ له‌زكرن ژبۆ ده‌سپێكرنا پرۆسا خواندنێ.
