سه‌رباری ڤارێ دادڤان به‌رده‌وام خه‌له‌تییان دژی تیما مه دكه‌ن
عەلی حاجی:
د داخویانیەکێ دا ئەندامەکێ دەستەیا کارگێریا یانه‌یا زاخۆ یا وەرزشی بۆ رۆژنامه‌یا ئەڤرۆ دیار کر بڕیارێن دادڤانی ئەگەرێن سەرەکی یێ خوسارەتیا تیما وان بوو بەرامبەر نەجەف و وان سکالا تومار کرییه.
زێدەتر دلژار عەدنان گۆت: تیما مە بەرامبەر یانەیا نەجەف ژ خولا ستێرێن ئیراقێ دا باشترین ئاست پێشکێشکر و هەژی تومارکرنا گولا وەکهەڤیێ بوون لێ بریارێن خەلەت و نەدروست یێن دادڤانی بوونە ئەگەر تووشی خوسارەتیێ ببیت دیسان دو یاریزان و راهێنەرێن تیمێ ژی ب کارتا سۆر دوور بێخیت، بریارێن دادڤانی نەبتنێ زیان ب یانەیا مە گەهاندیه هەتا دێ زیانا وێ بەرامبەر قوە جەویە ژی بیت، ئەوا دادڤانی ئەنجامدایی ب زانایانە ئەو کارو دژی یانەیا زاخۆ ئەنجامدا و سەرباری هندێ ژی دو پەنەلتیێن دروست نەهەژمارتن و چەندین فاولێن نەدروست ل سەر یانەیا مە هژمارتن، سەیرە سەرباری هەبوونا ڤارێ هەتا نوکە دادڤان ب دەست ڤان خەلەتیان دژی یانەیا مە دکەن، ب شێوەیەکێ فەرمی مە سکالا خوە تومارکریە ل سەر دادڤانی و ئەو نەحەقیا دژی یانەیا مە دا هاتیە کرن نابیت ب ساناهی دەرباز ببیت، هەمی یانەیان خوزیکێن خولا ستێڕێن ئیراقێ دخاستن لێ دادڤان یێ ڤێ خولێ ژناڤ دبەن و بەرەڤ ئاقارەکێ دیتر دبەن.
ناڤبری گۆت ژی: سەرۆکێ یانەیا زاخۆ عەمار فەرهاد پەیوەندی ب سەرۆکێ فیدراسیۆنا فۆتبۆلا ئیراقێ کریە ل سەر ڤی بابەتی و ئەو ب خوە ژی هاتیە سەر خەت دوپاتی ل هندێ هاتیە کرن کەسێ کەمتەر خەم دێ هێتە سزادان، هەکە خەلەتیێن دادڤانی نەبان یانەیا مە تووشی خوسارەتیێ نە دبوو.
