سه‌ركه‌فتنا بێ وه‌لات چاوا وه‌رزشا كوردستانێ گرانیا سیاسه‌تێ هه‌لدگریت؟
عومران میكائیل
د نه بوونا ده‌وله‌ته‌كا سه‌ربه‌خۆ یا كوردی دا، وه‌رزشڤانێن كورد خۆ ل به‌رانبه‌ر هه‌ڤكێشه‌كا سه‌خت دا دبینن، ئه‌و ژی هه‌ڤڕكیێ د ئاستێن به‌رز دا دكه‌ن كو نوونه‌راتیا ناسنامه‌یا نه‌ته‌وه‌یا خۆ بكه‌ن، ب ڤێ چه‌ندا هه‌نێ بده‌ستڤه‌ئینانا سه‌ركه‌فتنێن راسته‌قینه و بلند راگرتنا ئالایێ به‌رز و هه‌رده‌م بلند یێ كوردستانا پیرۆز كو خاكا مه‌یه و جهێ شانازی و سه‌ر بلندیا هه‌ر تاكه‌كێ كورده.
ب ڤێ چه‌ندێ وه‌رزشا كوردی روی ب روی فشاره‌كا سیاسیا به‌رده‌وام دبیت چ ژ لایێ وان وه‌لاتان یێن كوردستانێ پارچه دكه‌ن یان هه‌ر وه‌لات و لایه‌نه‌كێ دی كو دژاتیا به‌رده‌وام یا كوردان دكه‌ت، لێ وه‌رزشا كوردی به‌رده‌وامه ژ سه‌فه‌را خۆ، هه‌لگرا هیڤیێن نه‌ته‌وه‌یا خۆیه كو د هه‌روه‌لا هندێ دانه ئالایێ كوردان ژی جهێ خۆ د ناڤ ئالایێن دی یێن جیهانێ دا هه‌بیت.
كوردستانێ دا گه‌له‌ك یانه‌یێن وه‌رزشی هه‌نه ژ وانان دهۆك، زاخۆ، نه‌ورۆز، هه‌ولێر، د رێزبه‌ندیا ٢٠ یانەیێن باشترینێن ئیراقێ دا، سه‌ره‌رای داهاتێ وان ب به‌راورد ژ یانه‌یێن دی یێن ئیراقێ ب شێوه‌كێ به‌رچاڤ كێمتره وتووشی ئاسته‌نگێن دارایی دبن، هه‌ر چه‌نده ڤان یانه‌یان ئاسته‌كێ ب هێز یێ هه‌ی و هه‌ڤركیێ دگه‌ل یانه‌یێن دی یێن ئیراقێ دكه‌ن، لێ ب ده‌ست كێمیا ژێده‌رین دارایی دنالێن.
یانه‌یا دهۆكێ د چه‌ندین سالێن قه‌یرانا داریدا ده‌ربازبوویه، تووشی چه‌ندین كێشه‌یێن به‌رچاڤ بوویه كو بووینه سه‌ده‌ما راگرتن و راوه‌ستاندنا گه‌له‌گ ژ چالاكێن وه‌رزشی یێن یانێ، لێ هه‌ر د سه‌ر وێ چه‌ندێ دا یانه‌یا دهۆك د ڤی ماوه‌یێ سه‌خت و نه‌سه‌قامگیر دا پیشكه‌فتنه‌كا به‌رچاڤ د ئاست و ئه‌نجامێن خۆ دا ب خۆڤه دیت، ئه‌ڤه ژی ئاماژه‌یا ڤه‌گه‌ریانه‌كا ب هێز بوویه بۆ د ناڤا گۆره‌پانا وه‌رزشی دا، ئه‌ڤ دۆخێ سه‌خت و نه‌جێگیر نه‌بوویه ئاسته‌نگ به‌رامبه‌ر یانه‌یا دایك بۆ دیاركرنا ئاستێ وێ یێ هه‌ره به‌رز، چونكو یانه‌یا دهۆك پشت ب پالپشتیكرنا لایه‌نگر و هانده‌رێن خۆڤه به‌ستییه، ئه‌ڤه ژی بوویه ئه‌گه‌ر كو ئه‌و جه‌ماوه‌رێ مه‌زنێ یانه‌یا دهۆك ب دل شكه‌ستی نه‌مینت و به‌رده‌وام چاڤ ل سه‌ر سه‌ركه‌فتنان بیت.
ئه‌ڤه ژبلی هه‌ولێن ئیداره‌یا نوو بوو ئاڤه‌دانكرنێ، گرنگیدانێ ب یانی، ئاماده‌كاریێن چاك ژبۆ هندێ كو سه‌ركه‌فتنێن بێ سنوور بده‌ستخۆڤه بینن و ناڤێ خۆ ل هه‌ر جهه‌كی دیار و به‌رچاڤ بكه‌ن، ئێك ژ ده‌ستكه‌فتێن گرنگ یێن یانەیێ ده‌ستڤه‌ئینانا کۆپا كه‌نداڤی بوو ب پالپشتیا جه‌ماوه‌ره‌كێ كو گه‌رموگۆریا خۆ بۆ یانه‌یێ دیاركر.
هه‌روه‌سا سه‌ركه‌فتنا هه‌ردو یانه‌یێن دهۆك و زاخۆ بۆ فینالا کۆپا ئیراقێ روودانه‌كا ناوازه‌یه د دیرۆکا فوتبۆلا ئیراقێ دا، له‌وما ئه‌ڤ ده‌ستكه‌فته نابیت ب رێكه‌فتن بهێته هژمارتن، به‌لكو ب ره‌نگڤه‌دانا كوالێتی و كارێ ته‌كنیكی وكارگیری یا یانه‌یێن كوردانه، ژبلی پلانێن درێژخایه‌ن هه‌بووینه.
سه‌ركه‌فتنا هه‌ردو یانه‌یێن دهۆك و زاخۆ و گه‌هشتن ب یاریا دووماهیێ، دوپات دكه‌ت كو گورانكاری د هه‌ڤسه‌نگیا هێزێ دا هاته ئه‌نجامدان، كو ئێدی یانه‌یێن پاله‌وان یێن پارێزگه‌‌هێن ئیراقێ تاكه یانه نینن ژ بۆ بده‌ستڤه‌ئینانا ناسناڤان، لێ د نوكه دا یانه‌یێن كوردی رۆلێ پێشه‌نگ د دیاركرنا ناسنامه‌یا پاله‌وانی دا بده‌ستڤه ئینایه، هه‌روه‌سا یانه‌یا زاخۆ دێ نوونه‌راتیا ئیراقێ د کۆپا كه‌نداڤی دا بۆ وه‌رزێ ٢٠٢٥-٢٠٢٦، ئەڤە دەرئەنجامێ ڕێزبەندییا زاخۆ یا سێیێ د خولا ستێرێن ئیراقێ دا هاتبوو.
سه‌ره‌رای ده‌ستكه‌فتێن یانه‌یێن وه‌رزشی یێن كوردی، هه‌تا نها هیچ پالپشتیه‌كا دارایی و مۆرالی ژ حوكمه‌تا ئیراقێ یان ده‌زگه‌ها وه‌رزشیڤه یا فه‌رمی وه‌كۆ لژنه‌یا ئۆلمپی و فدراسیۆنا فوتبۆلێ پێ نه‌هاتیه ئه‌نجامدان، ئه‌ڤه ژی وێ چه‌ندێ دگه‌هینیت كو یانه‌یێن كوردی و وه‌رزش تێكه‌لی سیاسه‌تێ هاتینه‌كرن ژ لایێ حوكمه‌تا ئیراقێ ڤه.
