سه‌ركه‌فتنا گاره دێ ده‌ربازبوونێ مسۆگه‌ر كه‌ت
ئه‌ڤرۆ،
چاڤه‌ڕێ دهێته كرن ئه‌ینیا بهێت تیما فۆتسالا یانا گاره یا كچان یاریا خوه یا دویێ ژ خولا پلا ئێكا كوردستانێ ژ ده‌رڤه‌یی یاریگه‌ها خوه ب هیڤیێن سه‌ركه‌فتنێ و ده‌ربازبوونێ بۆ چارگۆشا زێرین ئه‌نجامبده‌ت ده‌مێ دبیته مێڤانا یانا سنۆر یا باژێرێ سۆران.
د یاریا ئێكێ دا كچێن گاره سه‌ركه‌فتنه‌كا مه‌زن ل سه‌ر كچێن هێرش ئینابوو ب پێنچ گۆلان بێی به‌رامبه‌ر، ژلایێ خوه‌ڤه یانا سنۆر ب هه‌شت گۆلان به‌رامبه‌ر گۆله‌كێ سه‌ركه‌فت بوو ل سه‌ر سۆلاڤ.
لدور دووماهی به‌رهه‌ڤیێن نوونه‌را پارێزگه‌هێ ئاراز سالح راهێنه‌رێ فۆتسالا گاره بۆ رۆژناما ئه‌ڤرۆ گوت: ئه‌ڤ یاریه گه‌لك یا گرنگه و بهێزه، سه‌ركه‌فتی دێ پلێتا ئێكسه‌ر بۆ چارگۆشا زێرین وه‌رگریت، یاری ب سانه‌هی نابیت ژبه‌ركو دێ ژ ده‌رڤه‌یی یاریگه‌ها مه بیت و تیما سنۆر ژ هه‌ڤڕكێن ب هێزی بۆ ده‌ربازبوونا پلا نایاب، هه‌رچه‌نده هه‌كه پێشبینیا خراب ژی بكه‌ین نه شیاین ب سه‌ركه‌فین هیڤیێن خوه ژ ده‌ست ناده‌ین بۆ یاریا دویێ ژی نا هێلین پلێتا ده‌ربازبوونێ ژ ده‌ست مه بچیت، لێ ئه‌م هزرا ڤێ یاریێ دكه‌ین و دڤێت هه‌موو شیانێن خوه بۆ ده‌ستڤه‌ئینانا سه‌ركه‌فتنێ ته‌رخانبكه‌ین، سه‌رباری تیما مه بێی یاریزانێ پیشه‌كاره ئه‌وژی ژبه‌ر نه شیانێن دارایی یێن كارگێریێ بۆ دابینكرنا یاریزانه‌كا شاره‌زا یا پیشه‌كار، لێ دێ رژدبین و من باوه‌ری ب ئاست و شیانێن یاریزانێ خوه هه‌یه سه‌ركه‌فتنێ د یاریا سنۆر دا تۆماركه‌ین و د چارگۆشا زێرین ژی دا دێ هه‌موو ئارمانجامه پلێتا ده‌ربازبوونێ بۆ پلا نایاب بیت.
