سه‌ره‌دانا ئه‌مریكا؟!
هه‌ر وه‌كی دیار ڤێ حه‌فتیێ ژڤانه سه‌رۆك بارزانی به‌ر ب ویلایه‌تێن ئێكگرتی یێن ئه‌مریكا برێكه‌ڤیت و ل گه‌ل سه‌رۆكێ ئه‌مریكا باراك ئۆبامای و جێگرێ سه‌رۆكێ ئه‌مریكا جۆن بایدنی و كۆنگرێسی كۆم بیت و به‌حسا گرنگترین روودان و گوهورینێن ده‌ڤه‌رێ بهێته‌كرن و ژ وان پرسان پرسا پرچه‌ككرنا پێشمه‌رگه‌ی و پشكداریكرنا پێشمه‌رگه‌ی د پرۆسێسا ئازادكرنا باژارێ مووسل دا بهێته گفتوگۆكرن، ب دیتنا من چوونا سه‌رۆك بارزانی بۆ ئه‌مریكا دێ گه‌له‌ك یا گرنگ بیت ژ به‌ر كو دێ هێته ئێكلاكرن هه‌لویستێ ئه‌مریكا به‌رامبه‌ر گه‌لێ كورد، له‌ورا ب دیتنا من دێ ڤێ سه‌ره‌دانێ دو ده‌رئه‌نجام ژبۆ هه‌بن: 1- ئه‌و سه‌ره‌دان چ قازانج بۆ كوردان نابن، ژ به‌ر كو دبیت دیسا باراك ئۆباما ته‌كه‌زیێ ل سه‌ر دو خالێن سه‌ره‌كی بكه‌ت، خالا ئێكێ ده‌وله‌تا كوردی یه كو بێژیت ئه‌م ب هه‌می شێوه‌یان ره‌ت دكه‌ین و داخوازا عیراقه‌كا ئێكگرتی دكه‌ین و خالا دووێ پشكداریكرنا پێشمه‌رگه‌یه د پرۆسێسا ئازادكرنا باژێرێ مووسل دا و بێ مه‌رج و ئه‌ڤ چه‌ندا هه‌نێ ژی به‌رژه‌وه‌ندیا گه‌لێ كورد دا نینه
2- یان ژی ئه‌مریكا دڤێت تێبگه‌هیت هه‌بوونا عیراقه‌كا ئێكگرتی مه‌حاله و دبیت دابه‌شكرنا عیراقێ ده‌ست پێ بكه‌ت وه‌ك پرۆژێ جێگرێ سه‌رۆكێ ئه‌مریكا جۆن بایدنی كو عیراق ببیته سێ هه‌رێم (هه‌رێما كوردان ـ هه‌رێما سونه‌یان ـ هه‌رێما شیعه‌یان) و ئه‌ڤه باشترین چاره‌سه‌ریه بۆ نه‌هێلانا توندوتیژیا ئه‌ڤرۆ ل عیراقێ رووده‌ت، سه‌باره‌ت ئه‌وان ناوچێن ماددێ 140 دا پێدڤیه راپرسین ل وان ده‌ڤه‌ران بهێته ئه‌نجامدان و خه‌لكێ ده‌ڤه‌رێ بریارا چاره‌نڤیسێ خوبده‌ن.
ب دیتنا من پێدڤیه ئه‌مریكا تێبگه‌هیت كورد هه‌ڤپه‌یمانێن راسته‌قینه‌یێن ئه‌مریكانه ل ده‌ڤه‌رێ و ئه‌ڤرۆ پێشمه‌رگێ قه‌هره‌مان ب نوونه‌راتیا هه‌می جیهانێ روو ب روو مه‌زنترین گرۆپێ تیرۆرستی یێ داعش بوویه، ب چه‌كه‌كێ كێم و ناڤنجی ئه‌م شیاین به‌رسینگرتنا ئه‌وان تیرۆرستنان بگرین، له‌ورا پێدڤیه ئه‌و پرۆژه‌یاسایا ژ كۆنگرێسێ ئه‌مریكا ده‌ركه‌فتی د به‌رژه‌وه‌ندیا كوردان دا پێنگاڤه‌كا سه‌ره‌تایی بیت ژبۆ په‌ه‌ته‌دان ب كوردان و پێشمه‌رگه‌هێ قه‌هره‌مان.
