سه‌ره‌دانا ملعینا!
هنده‌ك هونه‌رمه‌ند و به‌رنیاسێن مه ب ملعینی سه‌ره‌دانا بنگه‌هێن ساخله‌می دكه‌ن تایبه‌ت جهێن زارۆیان و ئه‌ڤێن ئێشێن گران لێ! یان دێ سه‌ره‌دانا كه‌مپێن په‌نابه‌ران كه‌ن یان دێ چنه به‌ر چه‌په‌رێن پێشمه‌رگه‌ی وێنان كێشن! نه ژ مرۆڤایه‌تیا خوه یان پشتگێریا خوه! به‌لكو ژ ملعینی و تنێ وه‌كی ریكلام و به‌لاڤكرنا وێنه‌یان د ناڤ ملله‌تی دا و د تورێن جڤاكی دا. خه‌لكه‌ك دێ بێژیت: سه‌حكه‌نێ چه‌ندێ دل نه‌رم و ب ڕه‌حمه ئه‌ڤ كه‌سه!چه‌ندێ زه‌لامه و دلشێره, چه‌ند مرۆڤایه‌تی یا لده‌ڤ هه‌ی! ڕوندك یێ دچاڤاندا دبڕسقن!
چه‌ند عه‌ده‌ته‌كێ نه‌شرینه ده‌مێ نه ژهه‌ستێ مرۆڤاتیێ ئه‌ڤ كه‌سانه ڤان سه‌ره‌دانا دكه‌ن! چه‌ندا نه خۆشه مرۆڤه‌ك ل سه‌ر دلێ ئێكێ نه‌ساخ بڕه‌قست!
هنگ ب چ دل وێنا ل به‌ر ڤان نه‌خۆشان دگرن؟ دا نێزیكبوونا خه‌لكی بۆ وان یان بخوه دورست بكه‌ی؟ هه‌كه ژبۆ وان بیت رێكێن دن هه‌نه به‌رێزان.
هنده‌ك ژی مێرانی و زه‌لامینیا خوه ل به‌رچه‌په‌رێن پێشمه‌رگێ مه به‌لاڤدكه‌ن پشتی شه‌ڕ خلاس بووی! دا به‌ری شه‌ڕی سه‌ره‌دانا خوه كه‌ی؟! یان ژی دێ چنه سه‌ر دلێ په‌نابه‌ران ل كه‌مپ و كومه‌لگه‌هێن ئاواران وێنان گرن! بۆچی؟ بۆ؟ حالێ وان به‌سی وانه! باشه ما چ ئاگرێت دی نینن هنگ كه‌وێ خوه ل به‌ر بژێرن؟ , ته‌ماشه‌ی هونه‌رمه‌ندێن جیهانێ بكه‌ن چاوا ب راستی پشته‌ڤانی و پشتگێرییا مرۆڤ و مرۆڤاتیێ دگرن! یێ ئاهه‌نگان دگێڕن و پاره‌ی دكه‌نه هاریكاری, یێ خوه دكه‌نه ده‌یك و باب بۆ زارۆیێن بێ خوه‌دان! كیژ هونه‌رمه‌ندێ مه زارویه‌كێ بێ دای و باب هینایه د مالا خوه‌دا؟ یان خوه كریه باب بۆ زارۆیه‌كێ نه‌خوه‌ش و نه‌ساخ؟ كێ ژ خوه دگریت؟ بۆچی هنگ وێنان ل به‌ر دگرن! وژدان چ تشته؟ و هنگۆ هه‌یه؟ ئه‌و ب سه‌دان زارۆ یێن ماینه بێ مال و خێزان ببه باب یان ده‌یك و بینه دمالا خوه‌دا خودان بكه وه‌كی زارۆیه‌كێ خوه, ئاها ئه‌ڤه‌یه مرۆڤاتی!!!هونه‌رمه‌ندێن جیهانێ وێنه‌یان ل به‌ر ئێش و ئازارێن خه‌لكی ناگرن دا خوه پێشكیش كه‌ن! من هنده‌ك پێشنیاڤ هه‌نه بۆ ملعینێن به‌رێز, ئه‌و ژی: ژ ده‌ستێ وان بهێت خانیه‌كێ خێرخوازی بۆ زارۆیێن بێ خوه‌دان بكڕن ئه‌ڤێن بووینه قوربانێن شه‌ران كو تێڤه خودان بن!؟, یان ژی هه‌رۆژ ترۆمبێلا خوه تژی خوارن بكه و به‌لاڤبكه ل سه‌ر وان زارۆیێن ل سه‌ر جادا بێ خودان!؟, یان ده‌رمانان بكڕه بۆ وان زارۆیێن ته وێنه ل به‌ر گرتین!؟, یان ژی هه‌رڕۆژ پیكه‌مه‌كا كه‌لوپه‌لان بۆ وێ كه‌مپێ ببه؟!, یان هه‌ر حه‌فتی ئاهه‌نگا بۆ زارۆیێن ئاواره سازبكه؟! یان ژی بڕینه خوارێ بچه‌كێ شه‌رمێ ژخوه بكه!
نموونه‌كا مرۆڤاتی وه‌كی هونه‌رمه‌ندا ئه‌مریكی (ئه‌نجیلا جۆلی) ئه‌ڤا هاتییه دهۆكێ و ل به‌ر چاڤێن مه هه‌میان خوه كره ده‌یكا زارۆیه‌كێ كورد, ئه‌ڤه زارۆیێ وێ یێ پێنجێ یه ئه‌و خوه لێ دكه‌ته ده‌یك! ئه‌وێ نه ژ مه‌ره‌ما وێنه‌یان و دیاركرنێ خوه كره خودان! پا بۆچی به‌رپرسه‌كێ مه ئه‌و زارۆ بخوه نه‌دبره مال و بیته باب بۆ وی؟ ما كی فه‌رتر بۆ بیته دای و باب بۆ وی زارۆی؟ یان چما هونه‌رمه‌نده‌كا مه نه دبوو ده‌یكا وی زارۆی؟! ژبه‌ركو ئه‌و وژدان ل ده‌ڤ مه نینه! ئه‌و وژدان و هه‌ست د مه‌ژیێ مه‌دا نه‌چێبوویه كو زارۆریێن بێ خودان بكه‌ینه د مالێن خوه‌دا! ئه‌م چ فێر نه‌بووین ژ هونه‌رمه‌ندا ئه‌مریكی تنێ جاره‌كا دی مه (وێنه) لبه‌ر گرتن! مه چ مفا ژ كریارا (ئه‌نجیلایێ) وه‌رنه‌گرت! كه‌سێ خوه نه‌كره ده‌ی باب بۆ زارۆیه‌كێ دن!!! ئه‌و ب سه‌دا زارۆیێن بێ خودان پێدڤی دای بابانه وێنه‌یان ل به‌ر نه‌گرن هه‌ڕن بكه‌نه زارۆیێن خوه !
