سه‌ره‌دانا نه‌خۆشی ئه‌ركه لێ نه‌خۆشتر لێنه‌كه‌ین!
عبدالرحمن بامه‌رنی
به‌ری دو سالان بۆ یان زێده‌تر، كه‌سه‌كێ هه‌ڤال و ناسیار و خودان خێزان، تووشی نه‌خۆشیه‌كا گران ببوو، نوژداران بێ هیڤی كربوو و به‌رده‌وام ناسیار و هه‌ڤالان سه‌ره‌دانا وی دكر، لێ راستی بیت سه‌ره‌دانێن من ژ یێن وان كێمتر بوون، ژبه‌ركو مالا وان درێكا مالا مه‌دابوو، گه‌له‌ك جاران ل سه‌ر به‌ربانكی من ددیت و ئه‌ز دا ل نك راوه‌ستم و ژ دێمێ وی دیار، سه‌دان پرسیارێن بێ به‌رسڤ د مێشكێ ویدا هه‌بوون، وی هزر دكر دێ پرسیارا نه‌خۆشییا وی كه‌م، بێژمێ سه‌لامه‌تی بیت و ئه‌ڤه قه‌ده‌را خودێ یه و لێ راستی بیت من دل نه‌ددا ڤێ بێژمێ، خودان خێزان بوو، زارۆك هه‌بوون، چ موچێن فه‌رمی نه‌بوون ل پشتی مرنا وی، داهاته‌ك بۆ خێزانا وی بهێت و ته بڤێت ئه‌و هزرێن نه‌خۆشیا خوه بكه‌ت و ژ مرنێ بترسیت یان ژی هزرێن خێزان و زارۆكێن خوه بكه‌ت، پشتی مرنا وی، دێ چاره‌نڤیسێ وان بیته چ؟! لێ ژ خواندنا من بۆ دێمێ وی، بابه‌تێ نه‌خۆشیێ من به‌حس نه‌دكر، هه‌ر وه‌كو كه‌سه‌كێ ل سه‌ر خوه و ژیان ل به‌ر سینگا یا ڤه‌كری من به‌رێخوه‌ددایێ، دا بیرهاتنه‌كێ بۆ بێژم، وی كێشمه ناڤ سوحبه‌ته‌كێ، هه‌ر سوحبه‌تا با، بتنێ دویری نه‌خۆشیا وی، دویری بارودوخێ نه‌خۆش یێ ژیارێ و بڤێ چه‌ندا كورت ئه‌ز دشییام بشكورینه‌كێ بێخمه سه‌ر لێڤێن وی، هه‌ر چنه‌بیت هیڤیه‌كێ بۆ به‌رده‌وامیا ژیانێ بده‌مێ و لایه‌نه‌كێ روهن بینمه به‌رچاڤێن وی. كو ب مخابنیڤه پرانیا جاران ده‌ما ئه‌م سه‌ره‌دانا نه‌خۆشان دكه‌ین، ئه‌م دبینه ئه‌گه‌ر كو نه‌خۆشیا وی ل سه‌ر وی گرانتر لێبهێت.
ئه‌ز دێ به‌حسا نموونه‌كا دانوستاندنه‌كێ كه‌م د ناڤبه‌را من و هه‌ڤاله‌كی دا، ئه‌وی هۆسا به‌حسا سه‌ره‌دانا نه‌خۆشه‌كی كر، گوت ئه‌م چووین سه‌ره‌دانا كه‌سه‌كی بكه‌ین و ئه‌ڤا وی دگوت ل سالێن هه‌شتییان بوو ژ چه‌رخێ ده‌رباز بووی، گوت ئه‌م چووینه مالا وان ژبه‌ركو بۆ چاره‌سه‌ریێ بربوو باژێرێ مووسل ده‌ف نوژداره‌كێ زیره‌ك و ئه‌م ژی یێ دل دلی وی دده‌ین و دبێژینێ خوه ب هێز بێخه، دێ رابیه ڤه، ئه‌ڤه بتنێ په‌ژیكه‌كه، مه دیت دوو ژن ژی یێن سه‌ره هاتنه ژوور و هاتبوون سه‌را نه‌خۆشی بده‌ن و وان ژی سوحبه‌ت ڤه‌كرن و گوتێ: ئه‌رێ نه‌خۆشیا ته هه‌را گران تر لێدهێت، ره‌نگێ ته یێ زه‌رتر لێهاتی و ئه‌ڤه چیه چ نیشانێن باشیێ لته په‌یدا نه‌بوونه، ما تو چبوویه ده‌ف كیژ نوژداری؟ نه‌خۆشی ژی به‌حسا نوژدارێ خوه یێ مووسل بۆ كرن، ژنه‌كێ ژوان گوتێ هه‌ی ده‌یكا ته نه‌مینیت و به‌حسا كه‌سه‌كێ دی بۆ كر ژ تاخێ وان چبوو ده‌ف هه‌مان نوژدار، لێ ژ نه‌خۆشییا وی یا گران ژیانا خوه ژ ده‌ستدابوو و گوتێ هه‌ر كه‌سێ چوویه ده‌ف وی نوژداری سه‌رێ خوه نه‌راكریه‌ڤه. هه‌ڤالێ من گوت درێژناكه‌م، پشتی سێ رۆژان نه‌خۆشێ مه ژی وه‌غه‌ر كر و ئه‌ز پشتراستم، ئه‌گه‌ر ئه‌و هه‌ردو ژن نه‌بانه، دبیت ره‌وشا نه‌خۆشێ مه باشتر بایه.
ژڤان هه‌ردو نموونه‌یێن ل سه‌ری، دڤێت ئه‌م هشیاری سه‌ره‌دانێن خوه بین و شینا ببینه هاریكارێ نه‌خۆشی كو نه‌خۆشیا وی ل سه‌ر سڤك بكه‌ین، نه‌بینه ئه‌گه‌ر كو ئێكجار بكه‌ڤیته بن بارێ خه‌مان و هه‌ر سه‌باره‌ت نه‌خۆشیێ، نوژداره‌كی د پارچه ڤیدیۆیه‌كێ دا هۆسا به‌حسا نه‌خۆشیان دكر، گۆت پرانیا نه‌خۆشییان ب ده‌روونێ مرۆڤی ڤه دگرێداینه، ئه‌گه‌ر هزرا مرۆڤی ما ل سه‌ر نه‌خۆشیا مرۆڤی، ئه‌ڤێن ل ده‌ردوورێن مرۆڤی هه‌ر ئه‌و نه‌خۆشی ئینا بیرا مرۆڤی، ب پشت راستی مرۆڤ دێ نه‌خۆشتر كه‌ڤیت و وی نوژداری ب پشتراستیڤه دگوت و دوپاتدكر، له‌شێ مرۆڤی ئه‌و هه‌می به‌رگری یێن هه‌ین، كو ئه‌و بخوه خوه چاره بكه‌ت و ده‌ما ئه‌ڤێ پرسیار ژ نوژداری دكرن، گوتیێ پا تو بۆ نه‌خۆشییا سه‌رمایێ وه‌ك په‌رسیڤی و تایێ چ دبێژی؟ نوژداری گوت، ئه‌ڤ نه‌خۆشیه گرێدای سه‌رمایێ نه و خو نه‌پاراستنا مرۆڤی و كارێ گران.
كورتیا بابه‌تی هه‌می تشت دكه‌ڤنه بن هێزا راكێشانێ و ئه‌گه‌ر مرۆڤ یێ ره‌شبین بیت، دێ تشتێ خراب هێته رێكا مرۆڤی و به‌رۆڤاژی و گوتنه‌كا هه‌ی دبێژیت گولا بچینه دێ گولان هه‌لینی و بلا مرۆڤ گول بیت و نه بتنێ بۆ سه‌ره‌دانا نه‌خۆشی مرۆڤ گولان ببه‌ت، به‌لكو فه‌ره ئاخفتنێن مرۆڤی ژی گول ژێ ببارن.
